İri kartofçuluq rayonu olan Tovuzun aran bölgəsində kartof əkini sürətlə davam edir. Dağlıq ərazilərdə isə əkin prosesinə havalar bir qədər mülayimləşdikdən sonra başlanacaqdır. Torpaq mülkiyyətçiləri kartofu həm əllə, həm də texnika vasitəsilə əkirlər. Sahələrdə yerli kartof toxumu ilə yanaşı, Gədəbəydən və Ukraynadan gətirilən toxumlar da əkilir.
Havaların yağmurlu keçməsi səpini ləngitmir. Kartof əkini əsasən Qovlar şəhərində, Düz Qırıqlı, Əyyublu, Dönük Qırıqlı, Aşağı Quşçu kəndlərində aparılır. Xatırladaq ki, ötən il 4492 hektarda kartof əkən fermerlər hər hektardan 304,55 sentner olmaqla ümumilikdə 136 min 803,1 ton məhsul götürmüşlər.
Təsərrüfat sahibləri əkin zamanı əsasən xarici "Orkestra", "Arizona", "Anna Karaleva", "Silvanna", "Aqriya" və "Aqila", yerli isə "Telman", "Əmiri-600", "Vaqif", "Çənlibel", "Uğur", "Turan" sortlarına üstünlük verirlər. Fermerlərin sözlərinə görə, bu sortlar əkilən sahələrin hər hektarından 50 tondan çox məhsul götürülür.
Uzun illər kartofçuluqla məşğul olan fermer Ədalət Məhərrəmov deyir ki, son vaxtlar yerli sortlarla yanaşı, daha məhsuldar olan xarici sortlara da üstünlük verirlər. "Hazırda "Arizona" sortu əkirik. Bu sort məhsuldar olduğundan hər il sahələrdən bol məhsul götürürük. Toxum əsasən xaricdən gətirilir", - deyə o bildirir.
Rayonda kartof istehsalında bir neçə böyük təsərrüfat var. Onlardan "Tovuz Aqrokompleks" MMC 75, Azər Aqrar Dövlət İstehsalat və Emal Birliyi 94 hektarda kartof əkməyi planlaşdırıb. Fərdi təsərrüfatlardan Mehman İsgəndərov 23, Sakit Hüseynoov 21, Nazilə İmamverdiyeva 14,7, Mətanət Məmmədova 8,4 hektarda kartof əkiblər.
Sonda qeyd edək ki, bu ilin məhsulu üçün rayonda 5 min hektara yaxın kartof əkini proqnozlaşdırılıb. İndiyədək 3280 hektarda kartof əkilib. Tovuz fermerləri cari il 140-160 min ton məhsul götürməyi hədəfləyiblər.
S.YUNİSOĞLU,
"Azərbaycan"
