Torpaqlarımız bərəkətli, insanlarımız çalışqandır

Qalır bu üstünlüklərdən yararlanıb qarşıya qoyulan vəzifələri icra etmək 

Xəbər verildiyi kimi, bir neçə gün əvvəl Qaxda Prezident İlham Əliyevin 25 may 2026-cı il tarixli sərəncamı ilə təsdiq etdiyi "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahəsinin inkişafına dair 2026-2030-cu illər üçün Dövlət Proqramı"nın icrası ilə bağlı müşavirə keçirilmişdir.

Fasilə zamanı müşavirədə iştirak edən fermerlər, iş adamları ilə görüşüb söhbət etdik, dövlət proqramı ilə bağlı onların fikirlərini öyrəndik, təkliflərini dinlədik. İlk həmsöhbətimiz olan "Ulu Aqro" MMC-nin rəhbəri Vüqar XƏlilov dedi ki, öncə kənd təsərrüfatının inkişafını müəyyən edən "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahəsinin inkişafına dair 2026-2030-cu illər üçün Dövlət Proqramı"nın müzakirəsinə həsr olunmuş bu tədbirin təşkilatçılarına təşəkkürümü bildirirəm: "Dövlət proqramının başlıca hədəfi olan - ekstensiv yanaşmadan intensiv - hər hektardan daha çox məhsul götürən modelə keçidin real mənzərəsini rəqəmlərlə diqqətinizə çatdırmaq istərdim. 2025-ci ildə meyvəçilik üzrə nəticələrimiz Qax rayonu üzrə istehsal olunan ümumi meyvə həcminin 63,4, dənli bitkilər üzrə 9,9, o cümlədən buğda üzrə 17,2 faizini təşkil etmişdir. Yeri gəlmişkən, onu da qeyd edim ki, müəssisəmizdə 145 nəfər daimi, 1400 nəfər mövsümi işçi çalışır. Yeni dövlət proqramı 2026-2030-cu illər üçün aqrar sektorun intensiv, ixracyönümlü və yüksək əlavə dəyər yaradan modelə keçidini hədəfləyir. Rəhbərlik etdiyim "Ulu Aqro" bu istiqamətlərin, demək olar ki, hamısından - intensiv bağçılıq, pivot və müasir suvarma, soyuducu logistika və zəncirvari emal modelindən istifadə etməklə ortaya əməli nəticələr qoyur. Təbii ki, bütün bunlar dövlət proqramının regionda uğurla icra olunması üçün hazır baza rolunu oynayır. Müşavirədə də qeyd olunduğu kimi, qarşıda bizi yeni layihələr, yeni hədəflər gözləyir. Yaxın dövrlərdə badam və qoz daxil olmaqla qərzəkli meyvə emalını, həmçinin heyvandarlıq sahəsini inkişaf etdirməyi planlaşdırırıq. İnamla deyə bilərəm ki, kənd təsərrüfatı sahəsində əldə etdiyimiz uğurlar Prezident İlham Əliyevin aqrar sahəyə göstərdiyi davamlı diqqət və qayğısının nəticəsidir".

Növbəti müsahibimiz iş adamı Dilarə ƏhmƏdova oldu. O, ölkəmizdə qadın futbolunun əsasını qoyan və inkişaf etdirən xanımlardandır. Bu sahədə qazandığı uğurlara görə dövlət başçısı tərəfindən "Tərəqqi" medalına layiq görülüb. 10 ildən çoxdur ki, Dilarə Əhmədova fermer kimi fəaliyyət göstərir. Həmin günlərdən söz açan Dilarə xanım dedi ki, 2015-ci ildən rəsmi qeydiyyatdan keçərək qadın fermer kimi fəaliyyətə başlayıb: "İlk günlər arıçılıqla məşğul oldum. Sonra bağçılıq təsərrüfatı yaratdıq, fındıq bağları saldıq. Dövlət tərəfindən verilən subsidiyalarla təsərrüfatımızı xeyli genişləndirdik. İqtisadiyyat, Kənd Təsərrüfatı nazirlikləri, BMT-nin Ərzaq və Kənd Təsərrüfatı Təşkilatı bizə müasir avadanlıqlar verdilər, fəaliyyət göstərməyimiz üçün əlverişli şərait yaratdılar. Çox keçmədi ki, "Akasiya" kooperativini açdıq. İndi həmin kooperativə rəhbərlik edirəm. 40 nəfər daimi işçimiz var. Zaman keçdikcə dövlətin diqqət və qayğısı sayəsində təsərrüfatımızı daha da genişləndirdik. Bu gün arıçılıqla, bağçılıqla, taxılçılıqla məşğul oluruq. 50 hektardan çox fındıq və alma bağlarımız var. Azərbaycan Prezidenti İlham Əliyevin təsdiq etdiyi yeni dövlət proqramı biz fermerləri ürəkdən sevindirdi. Çünki qəbul olunmuş sənəd bizim kimi çalışqan iş adamlarının fəaliyyətinə müsbət təsir göstərəcək, təsərrüfat sahələrimiz genişlənəcək, bazarlara çıxışımız asanlaşacaq, istehsal əvvəlki illərə nüsbətən artacaq, həmçinin problemlərimiz operativ həllini tapacaq.  Dövlət proqramı ilə yaxından tanış olanda gördük ki, biz iş adamlarının təklif etdikləri məsələlər də sənəddə öz əksini tapıb. Müşavirədəki çıxışları çox maraqla dinlədim. Belə bir müşavirənin keçirilməsi çox yaxşıdır. Dövlət proqramından gözləntilərimiz böyükdür. Hiss edirik ki, dövlət tərəfindən kənd təsərrüfatının inkişafına diqqət və qayğı var. Bu, sözsüz ki, nəticəsiz qalmayacaq". 

"2003-cü ildən fermer kimi fəaliyyət göstərirəm", - deyə digər iş adamı Hüseyn Tarverdiyev söhbətimizə qoşuldu: "Arxada qalan bu illər ərzində iş prosesində heç vaxt hansısa bir maneə ilə qarşılaşmamışıq. Yəni heç vaxt deyilməyib ki, bu olmaz, o olmaz. Qanun çərçivəsində nə vaxt, nə istəmişiksə, təmin ediblər. İş adamı kimi həmişə, hər yerdə dövlətimiz tərəfindən diqqət və qayğı görmüşük. Bu illər ərzində yaradılmış şəraitdən bacarıqla istifadə edərək təsərrüfatımızı inkişaf etdirmişik. Torpaqlarımız bərəkətli, insanlarımız çalışqandır. Qazandığımız uğurların əsasında dövlətimizin diqqət və qayğısı, yüksəksəviyyəli təminatımız və zəhmətsevərliyimiz dayanır. Müşavirədə həvəslə iştirak etdik. Çünki bu gün burada danışılan fikirlər bizim sabahkı fəaliyyətimizin əsasını təşkil edəcək. Ona görə də çıxışları böyük maraqla dinlədik. Kənd təsərrüfatının inkişafı ilə bağlı qəbul olunmuş dövlət proqramı biz fermerləri çox sevindirir. Çünki bu gündən sonra fəaliyyət göstərməyimiz üçün daha da əlverişli şərait yaradılacaq. Proqramın uğurla həyata keçirilməsi bizim işə olan məsuliyyətimizi də, diqqətimizi də artıracaq. Sahələrdən daha çox məhsul götürərək ərzaq təminatına olan ehtiyacın ödənilməsinə öz töhfəmizi verəcəyik. Dövlətimizin biz iş adamlarına göstərdiyi etimadı əməli işimizlə doğruldacağıq". 

Söhbətimizi Qaxın Turaclı kənd sakini, iş adamı Nəcəf MirzƏyevlə davam etdirdik. Dedi ki, 2020-ci ildə "Şan balı" adlı kooperativ yaradaraq arıçılıqla məşğul olmağa başlayıb: "Zaman keçdikcə dövlətimizin dəstəyi ilə təsərrüfatımızı daha da genişləndirdik. İndi arıçılıqla yanaşı, 3 hektardan çox fındıq bağı da salmışıq. Artıq ağaclar bar verir, məhsulumuz bol olur. İmkanlarımız artdıqca təsərrüfatımızı da genişləndiririk. Biz fermerlər, iş adamları hər addımda dövlət dəstəyini hiss edirik. Dövlətimiz aqrar sahənin inkişafı istiqamətində daim mühüm addımlar atır. Prezident İlham Əliyevin 25 may 2026-cı ildə kənd təsərrüfatı məsələlərinə həsr olunmuş müşavirədə səsləndirdiyi fikirlər göstərdi ki, dövlət aqrar sahənin inkişafına böyük önəm verir. Kənd təsərrüfatının inkişaf etdirilməsi üçün qəbul edilmiş dövlət proqramı da bunu göstərir. İş adamı kimi deyə bilərəm ki, bu, tam yerində və zamanında verilmiş qərardır. Müşavirədə çıxış edənlər çox dəyərli və vacib fikirlər səsləndirdilər. İnanırıq ki, bu fikirlər, irəli sürülən ideyalar tez bir zamanda həyata keçəcək, reallığa çevriləcək. Kənd təsərrüfatının inkişafı üçün qəbul olunmuş dövlət proqramı biz iş adamlarına yeni imkanlar yaradacaq. Bu proqramın kooperativlərin inkişafına da böyük dəstək verəcəyini gözləyirik. Ölkədə aqrar sahənin inkişafı məqsədilə həyata keçirilən zəruri tədbirlər, fermerlərə, iş adamlarına və sahibkarlara göstərilən dövlət dəstəyi yaxın zamanlarda müsbət nəticələr verəcək. Buna zərrə qədər şübhəmiz yoxdur".

Vahid MƏHƏRRƏMOV,

"Azərbaycan"