"Ermənistan yarandığı zamandan indiyə kimi heç vaxt müstəqil dövlət olmayıb, konstitusiyasında və sözdə müstəqil olduğunu desə də, bu ölkə böyük dövlətlərin yedəyində və arxasında gizlənərək onların siyasətini yürüdüb, onların diktəsini həyata keçirməklə məşğul olub. Azərbaycan torpaqlarını 30 ilə yaxın işğalda saxlaması, bu ərazini boz bölgəyə çevirməsi də böyük güclərin diktəsi, dəstəyi ilə baş tutub".
Bu sözləri "Azərbaycan" qəzetinə Milli Məclisin deputatı Vüqar İskəndərov deyib. O bildirib ki, Azərbaycanın gücü, Ali Baş Komandanın qətiyyəti, uğurlu siyasəti və qəhrəman ordumuzun 2020-ci ildə qazandığı böyük qələbə və birgünlük antiterror əməliyyatı ilə suverenliyimizin bərpası bölgədə yeni siyasi mühit formalaşdırıb. Azərbaycan burada güclü tərəfdir. Bundan başqa, Azərbaycan qalib tərəf olmasına baxmayaraq, bölgədə müharibənin bitməsi və yeni düzənin formalaşması üçün sülh müqaviləsinin müəllifi oldu. Beş baza prinsiplərindən irəli gələn məsələlərlə bağlı iki ölkə arasında danışıqların aparılması istiqamətində Azərbaycanın səylər göstərməsi ciddi faktdır. "Artıq münaqişənin bitməsindən 4 il keçməsinə baxmayaraq, Ermənistan bu və ya digər formada sülhdən yayınmağa çalışır. Əslində, keçirilən üçtərəfli və çoxtərəfli görüşlərdə böyük uğurların əldə olunmaması, Ermənistanın öz ərazisindən plasdarm kimi istifadə edilməsinə razılıq verməsi, siyasətində qarışıq münasibətlər formalaşdırması, Kollektiv Təhlükəsizlik Müqaviləsi Təşkilatına faktiki üzv olaraq Qərbə tərəf reveranslar etməsi, Rusiyadan uzaqlaşdığını göstərərək ticarət dövriyyəsini dəfələrlə artırması, ərazisində ABŞ səfirliyinin 2 mindən yuxarı nümayəndəsinin olması, Avropa İttifaqının, hətta NATO-nun hərbi mütəxəssislərinin uzun müddətdir Ermənistan sərhədinə yerləşməsi və mütəmadi olaraq "binokl şou"su göstərməsi, İranla olan münasibətlər təsdiqləyir ki, bu dövlət əks qütbdə olan qüvvələri öz ərazisində yerləşdirməklə özünü çıxılmaz vəziyyətə salıb", - deyə deputat bildirib.
V.İskəndərov qeyd edib ki, sülh müqaviləsi üzrə 15 maddənin razılaşdırılması, digər iki məsələ üzrə problemin yaranması məsuliyyəti Ermənistanın üzərinə düşür. Çünki bu məsələlər konkret sülh müqaviləsi imzalamaq üçün əsas şərtlərdir və onların həll olunmaması sülh sazişinin imzalanmasını yubadır. Ermənistan rəsmilərinin tez-tez sülhdən danışmasına baxmayaraq, bu ölkənin öldürücü silahlarla silahlanması onların əsas niyyətini göstərir. Prezident İlham Əliyevin Dmitri Kiselyova verdiyi müsahibəsində qeyd etdiyi kimi, Ermənistanla şərti də olsa 1000 kilometrdən artıq sərhədimiz var. Həmin sərhədə yaxın Ermənistan tərəfində hərbi hissələrin tikilməsi, hərbi insfrastrukturun salınması, Azərbaycan tərəfdə isə yeni şəhər və kəndlərin salınması, əhalinin köçürülməsi, mülki insanların yaxın məsafədə yaşaması gələcəkdə eskalasiyaya gətirib çıxara bilər. Bu da arzuolunmazdır.
Deputat vurğulayıb ki, Azərbaycan və Ermənistan bir çox məsələdə razılığa gələrək sülh istiqamətində müsbət nümunə ortaya qoysalar da, amma bu danışıqların tam irəliləməsinə başda Fransa olmaqla, ABŞ, digər dövlət və anti-Azərbaycan qüvvələri imkan vermirlər: "Azərbaycan dəfələrlə Avropa İttifaqı missiyasının şərti sərhəddəki yarıtmaz fəaliyyətini və arzuolunmaz olduğunu, onların getmələrinin vaxtının çatdığını, Ermənistanın silahlanmasının kövrək sülhə mənfi təsir etdiyini bəyan edib. Düşünürəm ki, rəsmi İrəvan Azərbaycanın təklif və tələblərini gözardı etməməli, real icrası üçün əməli addımlar atmalıdır".
Əsmər QARDAŞXANOVA,
"Azərbaycan"
