Qonşu dövlətlərə qarşı ərazi iddialarını hələ də saxlaması, əlaqələrin normallaşdırılmasına qarşı çıxması Ermənistanın tənəzzülünü davam etdirməkdə, üzləşdiyi problemlərin miqyasını daha da artırmaqdadır. Baş nazir Nikol Paşinyanın vəziyyəti dəyişdirəcəyinə ümid edən sadə ermənilər isə hansısa yeniliklərin olmamasından getdikcə daha güclü formada narazılıq edirlər.
Ölkədə N.Paşinyanın reytinqinin sürətlə aşağı düşməsi müşahidə olunur və hətta fikirlər səslənir ki, bu gedişlə onun və komandasının hakimiyyətdən devriləcəyi istisna edilmir.
Ermənistanda sosial-iqtisadi vəziyyətin təhlili aydın şəkildə göstərir ki, ölkədə inflyasiya böyük sürətlə dərinləşdiyi halda, əhalinin gəlirlərində hansısa artım yoxdur. Yaranan fərq nisbəti insanların durumunun daha da ağırlaşmasına, onların ifrat yoxsulluq həddində yaşamasına səbəb olmaqdadır.
Bu fonda Ermənistan hökumətinin iki məsələ ilə bağlı aciz qaldığı bildirilir. "4rd.am" nəşrinin yazdığına görə, bunlardan biri narkotik maddələrin artıq məktəbə çatması, digəri isə onlayn mərc oyunları ilə bağlıdır.
Çox maraqlıdır ki, bu günə qədər Ermənistan sərhədlərindən ölkəyə qanunsuz narkotik vasitələrin keçirilməsinin qarşısının alınmasına dair ciddi bir statistika yoxdur. Bu isə bir daha sübut edir ki, narkotik maddələrin dövriyyəsi erməni hökumətinin əsas gəlir mənbələrindən biridir və dövlət bu işdə xüsusi maraqlıdır.
Rəsmi rəqəmlər Paşinyan hakimiyyəti dövründə onlayn mərclərin həcminin 1800 dəfə artdığını göstərir. İşsizlik, sosial problemlər məngənəsində boğulan ermənilər çarəni ya narkotik maddələrin alverində, ya da onlayn mərclərdə müəyyən məbləğ əldə etməkdə görürlər. Bu isə böyük faciələrə, problemlərə səbəb olur. Qumar oyunlarının və psixoaktiv maddələrin yayılmasının statistikası artıq təhlükəli həddə çatıb. Bu işə azyaşlıların və hərbçilərin də cəlb edilməsinə başlanılıb.
Hazırda Ermənistanda rəsmi statistikaya görə, 7612 nəfər könüllü olaraq narkotik istifadəçisi kimi qeydiyyatdan keçərək müalicə alır. Amma reallıq odur ki, ölkədə narkotik istifadəçilərinin sayı 250 mindən çoxdur. Onların böyük əksəriyyətini gənclər təşkil edir. Rəsmi statistika göstərir ki, 2018-ci ildən sonra 18-25 yaşlılar arasında narkotik maddədən istifadə 108 faiz artıb. Bu dövrdə narkotiklə əlaqəli cinayətlərin sayı 47 faiz artıb. Bu, sadəcə rəsmi rəqəmlərdir. Reallıq isə daha faciəvidir.
Ölkədə onlayn qumarla bağlı da mənzərə acınacaqlıdır. Təkcə 2023-cü ildə Ermənistanda onlayn uduşlu oyunlara mərclərin ümumi məbləği 6,3 trilyon dramdan çox olub ki, bu da 43 milyon dollar deməkdir. Onlayn mərc və qumar oyunlarında da korrupsiya riskləri nəzərə çarpır. Məsələn, bu sahədə əsas payçı olan iş adamlarının dövlət məmurları ilə sıx əlaqələri var.
Bu arada daha bir maraqlı məqam işsizlərin arasında qadınların sayının getdikcə artmasıdır. Hesab edilir ki, Ermənistanda işsizlər arasında kişilərin azlıq təşkil etməsi təəccüb doğurmamalıdır. Çünki kişilərin əksəriyyəti öz ailəsini dolandırmaq məqsədilə ölkəni tərk edərək Rusiyaya və digər ölkələrə üz tutub. Xarici ölkələrə gedənlərin sayı bir milyonu ötüb. Hökumət isə vəziyyəti ört-basdır etmək üçün saxta rəqəmlərlə xalqı aldatmaqla məğuldur.
Elçin CƏFƏROV,
"Azərbaycan"
