"Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"ndan irəli gələn vəzifələrin icrası istiqamətində Şəmkir rayonunda da müvafiq tədbirlər həyata keçirilir.
Rayonun kənd təsərrüfatı potensialından səmərəli istifadə olunması, yeni istehsal sahələrinin yaradılması və aqrar sektorda fəaliyyət göstərən sahibkarların dəstəklənməsi istiqamətində müvafiq tədbirlər görülür. Qarşıya qoyulmuş vəzifələrin reallaşdırılması məqsədilə təsərrüfat sahibləri ilə mütəmadi görüşlər keçirilir, onların arzu və istəkləri dinlənilməklə mövcud problemlərin vaxtında aradan qaldırılması istiqamətində işlər həyata keçirilir.
Məlum olduğu kimi, dövlət proqramında balıqçılığın inkişaf etdirilməsinə də diqqətlə yanaşılması qeyd edilmişdir. Bunu nəzərə alan rayon icra hakimiyyətinin nümayəndələri tez-tez balıqçılıqla məşğul olan təsərrüfatlara gedir, mövcud vəziyyətlə yaxından tanış olur. Elə bu günlərdə görülən işlərin genişləndirilməsi və rayonda balıqçılığın inkişaf etdirilməsi məqsədilə Şəmkir Rayon İcra Hakimiyyətinin başçısı Rəşad Tağıyev rayonun Qapanlı kəndində yerləşən balıqçılıq təsərrüfatında olmuşdur. İcra başçısına təsərrüfatın fəaliyyəti, burada həyata keçirilən işlər, balıq yetişdirilməsi prosesi və istehsal imkanları barədə ətraflı məlumat verilmişdir. Təsərrüfatın rəhbəri Müsbət Həsənov bildirmişdir ki, burada əsasən sazan və belamur balıqları yetişdirilir. Balıq körpələri Suqovuşan və Bərdədən əldə olunur və iki su hövzəsində ildə 8-10 ton balıq istehsal edilir. Yem bazasının müəyyən hissəsi daxili imkanlar hesabına formalaşdırılır. Belə ki, təxminən 10 hektar sahədə yonca yetişdirilir və həmin yonca balıqlar üçün yem hazırlanmasında istifadə olunur. Bununla yanaşı, taxıl və digər ənənəvi yem komponentlərindən də yararlanılır.
Təsərrüfata baxış zamanı o da məlum olmuşdur ki, burada balıqçılığın ənənəvi istiqamətləri ilə yanaşı, nərəkimilərin yetişdirilməsinə də başlanılmışdır. Artıq iki ilə yaxındır bu istiqamətdə iş aparılır və ərazidə quraşdırılmış 4 hovuzda ümumilikdə 2000 ədəd nərə balığı körpəsi yetişdirilir.
Söhbət zamanı qeyd edilmişdir ki, dövlət proqramı kənd təsərrüfatı ilə yanaşı, balıqçılıq və akvakultura sahələrinin inkişafı üçün də geniş imkanlar açmışdır. Vurğulanmışdır ki, Şəmkirin mövcud təbii və iqtisadi potensialından səmərəli istifadə etməklə bu sahədə fəaliyyət göstərən təsərrüfatların genişləndirilməsi rayonun aqrar inkişafına mühüm töhfələr verə bilər.
Sabir ƏLİYEV,
"Azərbaycan"
