Ümidləri, arzuları nurlu simalarında şəfəq saçan şagirdlərin arasındayıq. Bura yerləşdiyi məkanın adını daşıyan Şəfəq qəsəbəsi tam orta məktəbidir.
Şagirdlərin simasında kədərdən daha çox qürur, iftixar hissi təcəssüm edir. Təhsil aldıqları orta məktəbdə keçirilən növbəti tədbir Vətən müharibəsində şəhid olmuş Rövşən Zahid oğlu Təhməzova həsr olunub. Qəhrəmanın 29-cu doğum gününü onsuz qeyd edirlər. Şəfəq qəsəbəsi tam orta məktəbin direktoru Almaz Hüseynova vurğulayır ki, bu təhsil ocağında tez-tez vətən torpaqlarımızın azadlığı uğrunda canından keçmiş qəhrəmanlarımıza həsr olunmuş tədbirlərin keçirilməsi onlara ehtiramımız, mənəvi borcumuzdur: "44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusu Ermənistan silahlı qüvvələrini məğlub edərək Qarabağ və Şərqi Zəngəzuru 30 illik işğaldan azad etdi. Bu müqəddəs yolda Azərbaycanın yüzlərlə igid övladı şəhid oldu, sağlamlığını itirdi. Bu gün qalib xalq olmağın qüruru ilə yaşadığımız üçün vətəni canından, doğmalarından çox sevmiş, sinəsini düşmən güllələrinə sipər etmiş igidlərimizə minnətdarıq. Biz onların xatirəsini hər zaman əziz tuturuq".
Məktəb direktorunun sözlərini tədbir iştirakçılarının üzündəki ifadə də təsdiq edirdi. Sonra şagirdlər Vətən müharibəsində qəhrəmanlıq göstərmiş igidlərimizə həsr olunmuş, vətənə məhəbbət tərənnümlü şeirlər söylədilər.
Tədbirdən sonra məktəbin sinifdənxaric oxu üzrə təşkilatçısı Şəms Cabbarova ilə sinif otaqlarını dolaşırıq. Məktəbə qədəm qoyduğun andan hiss edirsən ki, bu bina yalnız şagirdlərə təhsil verən bir məkan deyil. Burada sanki divarlar da, şəkillər də danışır. Məktəbin foyesində şəhidlərin portretləri düzülüb. Hər səhər məktəbə qədəm qoyan neçə-neçə şagird atasının, qardaşının və Vətən torpaqlarının azadlığı, onların qürurla, xoşbəxt yaşaması naminə canından keçmiş digər qəhrəmanların baxışları ilə salamlaşırlar.
Yaşı az olsa da, bu təhsil ocağı şanlı bir tarixin şahididir. Məktəb Vətən müharibəsindəki böyük qələbəmizdən sonra - 2021-ci ildə açılıb. Bu bina da məktəb üçün tikilib.
Məktəbin özü kimi, yerləşdiyi yaşayış məntəqəsi də yenidir. Abşeron rayonunun inzibati ərazisində salınmış bu yaşayış massivi 2023-cü ilin oktyabrında rəsmən "Şəfəq" adlandırılıb. 2024-cü ilin aprelində Prezident İlham Əliyevin təsdiqlədiyi "Abşeron rayonunun inzibati ərazi bölgüsündə qismən dəyişiklik edilməsi haqqında" qanunla Şəfəq yaşayış məntəqəsinə qəsəbə statusu verilib.
Məktəbin direktoru Almaz Hüseynova məlumat verir ki, o vaxt bu məktəbdə 120 şagird təhsil alırmış. Hazırda Şəfəq qəsəbəsi tam orta məktəbində şagirdlərin sayı 928 nəfərə çatıb.
Qeyd edək ki, Şəfəq qəsəbəsi sakinlərinin çoxu gözdən əlillər, Birinci və İkinci Qarabağ müharibələri əlilləri və şəhid ailələrindən ibarətdir. Şəfəq qəsəbəsi tam orta məktəbində bu səbəbdən həssas təbəqənin uşaqları - şəhid və qazi, gözdən əlil olan ailələrin övladları təhsil alırlar. Məktəbdə 45-ə yaxın şəhid övladı oxuyur. O uşaqların heç vaxt gözləri gülmür. Xoş söz də desən, gözlərindən qəm, qüssə çəkilmir. Almaz Hüseynova deyir: "Onların hər birinə xüsusi həssaslıq və qayğı ilə yanaşılır. Onların qəlbini azacıq da oxşamaq üçün ad günlərində yaxınlaşıb kiçik də olsa, sürpriz hazırlayırıq. Sinif yoldaşları da o uşaqlara olduqca həssaslıqla, hörmətlə yanaşırlar, bir dəfə onları incidən olmayıb. Onlar məktəbin rəhbərliyindən, müəllim heyətindən həmin uşaqlara hansı münasibəti görürlərsə, o cür davranırlar".
Məktəbin direktoru qeyd edir ki, şəhid övladları atalarının və onların timsalında Vətən uğrunda döyüşmüş bütün igidlərimizin qəhrəman olduqlarını yaxşı anlayırlar. Odur ki, qürur, iftixar hissləri kədərlərindən böyükdür: "Onlar sanki atalarının adlarını yaşatmaq üçün böyüyürlər. Bu səbəbdən məktəbimizdə təşkil olunan tədbirlərdə can-dildən iştirak edirlər. Məktəbimizdə tez-tez müxtəlif tədbirlər, viktorinalar, ustad dərsləri keçirilir. Zəfər Günü xüsusi təntənə ilə qeyd olunur. Şagirdlərimiz şeirlər söyləyir, səhnəciklər göstərirlər. Şəhid övladları atalarının, qardaşlarının şəkilləri həkk olunmuş köynəklərlə çıxış edirlər. Şəhid övladları şeir deyərkən, mahnı oxuyarkən çox vaxt kövrəlirlər. Amma onlar, eyni zamanda böyük qürur hissi yaşayırlar. Yaşca kiçik olanlar yoldaşlarına atalarının şəklini fəxrlə göstərib "Bu mənim atamdır", - deyirlər".
Məktəbin direktoru diqqətə çatdırır ki, övladları və ya qardaşı bu məktəbdə təhsil alan şəhidlərimizin doğum və anım günlərinin qeyd olunması da məktəbimizdə ənənəyə çevrilib: "Həmin günlərdə şəhidlərimizin evlərini də ziyarət edirik. Məktəbimizdə təşkil etdiyimiz tədbirlərə qəsəbəmizdə yaşayan, hətta doğmaları bu məktəbdə təhsil almayan şəhidlərimizin belə ailə üzvlərini dəvət edirik. Böyük məmnuniyyətlə dəvətimiz qəbul olunur".
Şəfəq tam orta məktəbində ən diqqətçəkən məqamlardan biri də şəhidlərin adlarının yaşadılmasıdır. Şəhid övladının təhsil aldığı sinfə atasının adı verilib. Ancaq elə sinif var ki, orada bir deyil, iki, üç, hətta dörd şəhid övladı oxuyur. Almaz Hüseynova bildirir: "Belə olduğu halda o sinfə ən birinci gəlmiş uşağın şəhid atasının adını veririk. Digər siniflərimizə şəhidlərimizin adını verərkən onların başqa siniflərimizdə bacı-qardaşlarının oxuyub-oxumadığına diqqət yetiririk. Əgər şəhidimiz subay olubsa, övladı qalmayıbsa, onun adını bacısının, yaxud qardaşının oxuduğu sinfə veririk".
Sinif otaqlarına baş çəkdikcə düşünürük ki, uşaqlar hər gün yalnız məktəb dərsliklərindən, müəllimlərindən deyil, həm də divara vurulmuş bu şəkillərdən tariximizi öyrənirlər. Məktəbin foyesində və giriş hissəsində də şəhidlərin fotoları və xatirə guşələri yaradılıb.
Tənəffüs zamanı məktəbin bir neçə müəllimi ilə də həmsöhbət oluruq. Deyirlər ki, şəhid övladları ilə işləməyin xüsusi həssaslıq tələb etdiyini dərsin planlaşdırılmasından uşaqlarla sağollaşana qədər hər mərhələdə nəzərə alırıq. Almaz Hüseynova: "Torpaqlarımızın işğal və azad edildiyi tarixi günləri tədris etdiyimiz fəndən asılı olmayaraq, mütləq şagirdlərimizə xatırladırıq. Şagirdimizin atasının şəhid olduğu gün isə sinifdə ümumi məlumat veririk. Atasının şəhidliyini xüsusi vurğulamırıq. Qələbəyə olan töhfəsini, vətənimizdə rahat yaşamağımızda onun atasının da əməyi olduğunu qeyd edirik. Ailələri ilə də əlaqə saxlayırıq, onların evlərinə baş çəkirik".
Müəllim - cəmiyyətin gələcəyini formalaşdıran ən məsuliyyətli peşə sahiblərindən biridir. O, yalnız şagirdlərinə bilik öyrətmir, həm də onların dünyagörüşünün, xarakterinin və həyata baxışının formalaşmasında mühüm rol oynayır. Gənc nəslə milli-mənəvi dəyərləri, vətənə sevgi və vətənpərvərlik hisslərinin aşılanmasında, onların layiqli vətəndaş kimi yetişməsində müəllimlərin rolu böyükdür. Müəllimin verdiyi düzgün istiqamət uşağın gələcək taleyinə təsir edə bilir. "Buna görə də müəllim peşəsi böyük məsuliyyət, vicdan və fədakarlıq tələb edir".
Məktəbin gənc müəllimlərindən soruşuruq: "Hazırkı dövrdə müəllim olmaq çətin deyil?" Cavab verirlər ki, ola bilər yeni başlayanda çətinlik çəkirdik, amma artıq yox. Məktəbin coğrafiya müəllimi Aytən Məhərrəmli artıq beşinci ildir müəllim işlədiyini söyləyir: "Və özümü tamamilə aid olduğum yerdə hiss edirəm", - deyir.
Şəms Cabbarova isə qeyd edir ki, 20 ildir ki, dərs deyirəm, uşaqlarla sevərək işləyirik: "Çalışdığımız təhsil ocağında qayda-qanuna, nizam-intizama əməl olunduğu üçün əlavə problemlərlə qarşılaşmırıq. Elə müəllimlərimiz var ki, hər gün Şəfəq qəsəbəsinə gəlmək üçün uzun yol qət edir və bundan qətiyyən şikayətlənmir".
Hər bir şagirdin uğuru, yalnız özünün, ailəsinin deyil, eyni zamanda təhsil aldığı məktəbin, ona dərs deyən müəllimlərin uğurudur. Almaz Hüseynova Şəfəq qəsəbəsi tam orta məktəbin məzunlarının qazandığı uğurlardan fərəhlə söz açır: "Məzunlarımız arasında Bakı Dövlət Universitetində, Azərbaycan Dövlət Tibb Universitetində, Polis Akademiyasında və başqa ali məktəblərdə təhsillərini davam etdirənlər, peşə, sənət öyrənib müxtəlif sahələrdə çalışanlar var. Onların dövlətə, xalqa faydalı vətəndaş kimi yetişmələri, öz həyatlarını düzgün qurmaları bizi sevindirir".
Məktəbin məzunlarından biri də Ağadadaş Xəlilovdur. Ağadadaş hazırda Milli Müdafiə Universitetinin nəzdində olan Bakı Hərbi Kollecində Aviasiya ixtisası üzrə I kursda təhsil alır. Ağadadaş kiçik yaşlarından hərbçi olmaq istəyib. Ancaq Bakı Hərbi Kollecində oxumağı o, yalnız özünün ən böyük arzusunu gerçəkləşdirmək üçün seçməyib. Həm də bununla Vətən müharibəsində şəhid olmuş atasının - hərbçi Nadir Ağadadaş oğlu Xəlilovun arzusunu reallaşdırıb. Ağadadaş deyir: "Atam mənim hərbçi olmağımı istəyirdi. Bu peşəyə yiyələnmək uşaq çağlarımdan mənim də ən böyük arzum oldu. Mən Vətənə xidmət etməklə həm atamın xatirəsini yaşatmaq, həm də onun mənə öyrətdiyi milli dəyərlərimizi qorumaq istəyirəm. Çünki şəhid övladı olmaq yalnız bir ad deyil, onu ömür boyu daşımaq böyük bir məsuliyyət və qürurdur".
Bu məktəbdən ayrılarkən bir daha anlayırsan ki, Vətən sevgisi yalnız dərsliklərdə öyrədilmir. O sevgi şəhid şəkillərinin qarşısında dayanıb susan uşağın baxışlarında, müəllimin qayğı dolu münasibətində, sinif otaqlarında yaşadılan xatirələrdə yaşayır.
Zöhrə FƏRƏCOVA,
"Azərbaycan"
677jpg_1781134810.jpg)
jpg_1781243662.jpg)
