Tovuz Rayon Prokurorluğunun inzibati binasında media nümayəndələri, qeyri-hökumət təşkilatlarının təmsilçiləri və ictimai fəalların iştirakı ilə "Açıq qapı" günü keçirilmişdir.
Əsas məqsədi prokurorluq orqanlarının fəaliyyəti barədə ictimaiyyətə daha geniş məlumat vermək, vətəndaş cəmiyyəti institutları ilə əməkdaşlığı inkişaf etdirmək, eləcə də hüquqi maarifləndirmə sahəsində görülən işləri iştirakçıların diqqətinə çatdırmaq olan tədbiri giriş sözü ilə Tovuz rayon prokuroru Maarif Hüseynov açaraq bildirmişdir ki, bu cür görüşlər dövlət qurumları ilə ictimaiyyət arasında qarşılıqlı etimadın möhkəmləndirilməsinə, açıq dialoqun təşviqinə və vətəndaşların hüquqi məlumatlılığının artırılmasına mühüm töhfələr verir. O, rayon prokurorluğunun fəaliyyət istiqamətləri, cinayətkarlığa qarşı mübarizə sahəsində görülən tədbirlər, vətəndaş müraciətlərinə baxılması qaydaları və qanunun aliliyinin təmin olunması istiqamətində həyata keçirilən işlər barədə ətraflı məlumat vermişdir.
Baş Prokurorluğun Mətbuat xidmətinin böyük prokuroru Kənan Zeynalov çıxışında prokurorluq orqanlarında həyata keçirilən müasir islahatlar, rəqəmsallaşma prosesləri və vətəndaş məmnunluğunun artırılmasına yönəlmiş təşəbbüslərdən danışmışdır. Qeyd olunmuşdur ki, "Elektron prokurorluq" informasiya sistemi və digər innovativ hallar vətəndaşlara göstərilən xidmətlərin keyfiyyətinin yüksəldilməsinə, müraciətlərin daha operativ və şəffaf şəkildə araşdırılmasına imkan yaradır.
Sonra iştirakçılar üçün rayon prokurorluğunun fəaliyyət sahələri barədə təqdimatlar keçirilmiş, onları maraqlandıran məsələlər ətrafında geniş müzakirələr aparılmış və ünvanlanan suallar cavablandırılmışdır.
Tədbir çərçivəsində qonaqlar həmçinin Tovuz Rayon Prokurorluğunun inzibati binası ilə tanış olmuş, əməkdaşların iş şəraiti və gündəlik fəaliyyəti barədə məlumat əldə etmişlər. Bundan başqa, tədbir çərçivəsində "Elektron prokurorluq" informasiya sisteminin funksional imkanları nümayiş etdirilmiş, müasir kriminalistik texnika və avadanlıqların istintaq prosesində tətbiqi barədə əyani təqdimat keçirilmişdir.
Sabir ƏLİYEV,
"Azərbaycan"
677jpg_1781134810.jpg)
jpg_1781243662.jpg)
