"Milli Qurtuluşun hüquqi təməlləri və qanunçuluq" mövzusunda konfrans keçirilib

Tovuz rayonu Nizami adına Mədəniyyət Evində keçirilən konfransda iştirakçılar öncə Heydər Əliyevin həyat və fəaliyyətini əks etdirən sərgi ilə tanış olmuşlar. Sonra Ümummilli Liderin və Vətənimizin müstəqilliyi, ərazi bütövlüyü və suverenliyi uğrunda canlarını fəda etmiş şəhidlərimizin xatirələri birdəqiqəlik sükutla yad edilmişdir.

Milli Məclis deputatlarının, Respublika Baş Prokurorluğunun məsul əməkdaşlarının, rayon icra hakimiyyəti rəhbərlərinin, hüquq-mühafizə orqanları nümayəndələrinin, Müdafiə Nazirliyinin, Ombudsman Aparatının və rayon ağsaqqallarının iştirakı ilə keçirilən konfransda Baş Prokurorluğun idarə rəisi Ceyhun Kazımov çıxış edərək Milli Qurtuluş Gününün Azərbaycan dövlətçiliyində sabitliyin təmin olunması, hüquqi dövlət quruculuğunun möhkəmləndirilməsi və qanunun aliliyinin bərqərar olunması baxımından tarixi əhəmiyyət daşıdığını qeyd etmiş, Ulu Öndər Heydər Əliyevin rəhbərliyi ilə hüquq sistemində aparılan islahatların bu gün də davamlı inkişafın əsasını təşkil etdiyini diqqətə çatdırmışdır. Milli Məclisin deputatı Nizami Səfərov çıxışında bu tarixi mərhələnin müasir Azərbaycan dövlətçiliyinin hüquqi-siyasi əsaslarının formalaşmasında həlledici rol oynadığını, konstitusion inkişafın və qanunvericilik sisteminin güclənməsinə şərait yaratdığını qeyd etmişdir.

Sonra Tovuz rayon prokuroru Maarif Hüseynov, Baş Prokurorluğun Mətbuat xidmətinin böyük prokuroru Kənan Zeynalov, Müdafiə Nazirliyinin Mətbuat və İctimaiyyətlə Əlaqələr İdarəsinin rəisi Anar Eyvazov, Ombudsmanın Qərb Regional Mərkəzinin rəhbəri Səbuhi Abbasov, Yeni Azərbaycan Partiyası Tovuz rayon təşkilatının sədri Nihad Pənahov və Azərbaycanın Milli Qəhrəmanı Qasım Rzayevin qardaşı Valeh Rzayev çıxış edərək Milli Qurtuluşun hüquqi dövlət quruculuğu, milli həmrəylik və qanunçuluğun möhkəmləndirilməsində əvəzsiz rolundan danışmışlar.

Konfransda Tovuz Rayon İcra Hakimiyyətinin başçısı Məmməd Məmmədov çıxış edərək Milli Qurtuluşun hüquqi əsaslarının və qanunçuluğun təbliği baxımından mühüm əhəmiyyət daşıdığını vurğulamışdır. Qeyd etmişdir ki, 15 İyun-Milli Qurtuluş Günü Azərbaycanın dövlətçilik tarixində dönüş nöqtəsi olmaqla ölkəmizi xaos və parçalanma təhlükəsindən xilas etmişdir. Ümummilli Lider Heydər Əliyevin əsasını qoyduğu dövlətçilik kursunun Prezident İlham Əliyev tərəfindən uğurla davam etdirildiyini diqqətə çatdıran natiq ölkədə həyata keçirilən hüquqi islahatların regionların inkişafına mühüm töhfə verdiyini, Tovuz rayonunda qanunçuluğun təmin olunması istiqamətində prokurorluq orqanları ilə səmərəli əməkdaşlığın davam etdirildiyini bildirmişdir. 

Sonda Heydər Əliyevin həyat və fəaliyyətinə, eləcə də onun müəyyən etdiyi quruculuq və şəhərsalma siyasətinə həsr olunmuş "Qurulan gələcək" sənədli filmi nümayiş etdirilmişdir.