Bu gün Azərbaycan iqtisadiyyatında qadın sahibkarlığı kiçik və orta biznesin dinamik inkişafda olan hissəsini təşkil edir. Qadın sahibkarlığının fəaliyyəti getdikcə artır.
Statistika göstərir ki, kiçik və orta sahibkarlıq subyektləri sırasında qadınların sayı daha çoxdur. İri sahibkarlıq sahələrində onların təmsilçiliyi hələ ki, bir qədər məhdud xarakter daşıyır. Buna görə də əsas məsələlərdən biri qadınların iri biznes strukturlarında iştirakının genişləndirilməsi, eləcə də sahibkarlığın müxtəlif seqmentlərində onların rolunun artırılmasıdır. Bu istiqamətdə həm iqtisadi təşviq mexanizmlərinin, həm də sosial dəstək tədbirlərinin tətbiqi mühüm əhəmiyyət kəsb edir.
Hazırda qadın sahibkarlar üçün xüsusi proqramlar mövcuddur. Həmin proqramlar çərçivəsində güzəştli kreditlərin verilməsi, aşağı faizli maliyyə resurslarına çıxış imkanlarının yaradılması əsas dəstək alətləri kimi çıxış edir. Bu maliyyə mexanizmləri qadın sahibkarların biznes fəaliyyətinin genişləndirilməsinə, yeni təşəbbüslərin reallaşdırılmasına və rəqabət qabiliyyətinin artırılmasına şərait yaradır.
Milli Məclisin deputatı Vüqar Bayramov qadınların iqtisadi fəallığının artırılmasında və onların sahibkarlıq mühitinə daha fəal şəkildə cəlb olunmasında bu təşəbbüslərin xüsusi əhəmiyyətə malik olduğunu vurğulayır: "Görülən tədbirlər nəticəsində qadın sahibkarlığının institusional bazasının möhkəmləndirilməsi istiqamətində mühüm addımlar atılmışdır. Gözləntilər ondan ibarətdir ki, növbəti mərhələlərdə mikro, kiçik və orta sahibkarlıq sahələrində qadınların payı daha da artacaq, eyni zamanda iri biznes strukturlarında da qadınların təmsilçiliyi genişlənəcək. Bu proses ümumilikdə ölkənin iqtisadi inkişafına, sosial bərabərliyin təmin olunmasına və inklüziv iqtisadi mühitin formalaşmasına töhfə verəcək".
Ölkəmizdə fərdi sahibkarların 23 faizindən çoxunu qadınlar təşkil edir. Bu rəqəmlə biz dünyada həmin sahədəki göstəriciyə yaxınlaşmışıq. Ümumilikdə, o nəticəyə gəlinir ki, Azərbaycan qadınlarının sahibkarlıq potensialı yüksəkdir, lakin bu potensialın tam gerçəkləşməsi üçün institusional dəstək, maliyyə imkanları və sosial şəraitin daha da yaxşılaşdırılması tələb olunur. Və bu dəstək göstərilir də! "Uğurlu tərəfdaşlıqda xanım sahibkarlar" layihəsi bu dəstək çərçivəsində gerçəkləşən tədbirlərdən biridir. Layihə 2024-cü ildən start götürüb. Burada əsas məqsəd qadın sahibkarlar arasında işgüzar əlaqələrin genişləndirilməsidir. Layihədə müxtəlif sektorların nümayəndələri olan qadın sahibkar iştirak edirlər. Layihə çərçivəsində müxtəlif mövzularda təlimlər və tədbirlər, işgüzar səhər yeməkləri, ofis-istehsalat ziyarətləri və sosial fəaliyyətlər təşkil olunur.
Keçən ilin yanvarında Kiçik və Orta Biznesin İnkişafı Agentliyi (KOBİA), "Marsol Group" və İş Adamları Cəmiyyətinin Milli Assosiasiyasının (İCMA) birgə təşkilatçılığı, Kapital Bankın rəsmi tərəfdaşlığı ilə "Uğurlu tərəfdaşlıqda xanım sahibkarlar" layihəsi ikinci dəfə başlanıb və mart ayında yekunlaşıb.
Yekunda "Uğurlu tərəfdaşlıqda xanım sahibkarlar" layihəsinin məqsədi bir daha vurğulanıb. Layihədə müxtəlif sektorlardan olan 70-dən çox qadın sahibkarın iştirak etdiyi bildirilib. Layihə çərçivəsində onların biznes bacarıqlarının artırılması üçün idarəetmə, satış, netvörkinq kimi mövzularda təlimlər keçirilib. Ofis və istehsalat ziyarətləri layihə iştirakçılarına yeni biznes əlaqələri qurmağa, istehsal müəssisələrinin fəaliyyəti ilə yaxından tanış olmaqda imkan yaradıb. Sahibkarlara dəstək göstərən müxtəlif qurumların nümayəndələri ilə təşkil olunmuş işgüzar görüşlərdə qadın sahibkarlar biznes üçün imkanlar, dövlət dəstəyi tədbirləri barədə ətraflı məlumat əldə ediblər. Layihə çərçivəsində müxtəlif növ sosial fəaliyyətlər də təşkil olunub. İşgüzar görüş və təlimlərdə fərqlənən qadın sahibkarlara sertifikatlar və hədiyyələr təqdim edilib.
Budur, KOBİA, "Marsol Group"un və İCMA-nın birgə təşkilatçılığı ilə "Uğurlu tərəfdaşlıqda xanım sahibkarlar" layihəsinə yenidən start verildi. "Bakı KOB evi"ndə keçirilən tədbirdə iştirakçılara ölkəmizdə qadın sahibkarlığının inkişafına dəstək tədbirləri, bu sahədə özəl sektorun təşəbbüsləri və layihə barədə ətraflı məlumat verildi. Bir daha qeyd edildi ki, artıq üçüncü ildir keçirilən layihənin məqsədi qadın sahibkarların iqtisadi və sosial həyatda fəallığının artırılması və onlar arasında işgüzar əlaqələrin genişləndirilməsidir.
Builki layihəyə müxtəlif sektorları təmsil edən 100-dən çox qadın sahibkar qatılacaq. Layihə çərçivəsində müxtəlif mövzularda təlim, seminar və master-klaslar, işgüzar görüşlər, ofis-istehsalat ziyarətləri və sosial fəaliyyətlər təşkil olunacaq.
Layihə bu dəfə də mart ayında yekunlaşacaq. "Kapital Bank", "Məlhəm Beynəlxalq Hospital", "Corian Baku", "Ətirşah Parfüm", "Gizli Bahçe" restoranı və "Moon Group" layihə ilə tərəfdaşlıq edir və ona dəstək göstərirlər.
Flora SADIQLI,
"Azərbaycan"
jpg_1768485517.jpg)
