İlham Əliyev ABŞ və Fransanı reallıqları qəbul edib, regionun lider dövləti olan Azərbaycanla işləməyə çağırdı
"Azərbaycan sülh prosesinə sadiqdir. Məhz biz İkinci Qarabağ müharibəsi başa çatdıqdan sonra sülh danışıqları təşəbbüsü ilə çıxış etdik. Əslində, biz sülh yolu ilə həllin beş əsas prinsipini işləyib hazırladıq və sülh müqaviləsinin mətninin layihəsini təqdim etdik. Beləliklə, biz əgər sülh istəmiriksə, niyə bunların hamısını hazırlamışıq?!"
Prezident İlham Əliyevin bu fikirləri son günlərdə Qərb mətbuatında "Azərbaycanın Ermənistana qarşı hücuma hazırlaşması" iddiasının həm yalan, uydurma olduğunu təsdiqlədi, həm də bir daha Azərbaycanın əsl məqsədini dünyaya nümayiş etdirmiş oldu.
Alman İqtisadiyyatının Şərq Komitəsinin sədrinin rəhbərlik etdiyi nümayəndə heyəti ilə görüşdə İlham Əliyev əsl həqiqətləri açıqladı və bildirdi ki, ikili standartların hökm sürdüyü Avropa İttifaqı Azərbaycana qarşı saxta məlumatlar əsasında ittihamlar səsləndirir, ölkəmizin Ermənistana hücuma hazırlaşması ilə bağlı feyklər tirajlayır. Fransanın Avropa İttifaqının Ukraynanı ərazi bütövlüyünü təmin etmək üçün müdafiə etdiyi bir şəraitdə tam tərsinə, ərazi bütövlüyünü təmin etdiyinə görə Azərbaycanı günahlandırması anlaşılmazdır. Bu, islamofobiya nümunəsidir.
Dövlət başçısı onu da vurğuladı ki, vaxtilə ATƏT-in sabiq Minsk qrupunda olmuş Fransa, ABŞ və Rusiya kimi ölkələr Azərbaycanı öz yolundan döndərmək üçün illərlə müxtəlif alətlərdən istifadə ediblər.
Prezident konkret faktlarla, arqumentlərlə müqayisə apararaq reallıqları diqqətə çatdırıb. Belə ki, Azərbaycan əraziləri 30 il Ermənistanın işğalı altında olarkən barbar ermənilər həmin əraziləri dağıdıb yerlə yeksan ediblər. Bir milyona yaxın soydaşımız məcburi köçkün vəziyyətinə düşüb. Torpaqlarımızı işğal altında saxlayan Ermənistan bu müddətdə BMT Təhlükəsizlik Şurasının məlum qətnamələrinə, beynəlxalq hüququn normalarına, o cümlədən humanitar normalara məhəl qoymayıb.
Amma heç bir beynəlxalq təşkilat, mərhum Minsk qrupu da Ermənistana "gözün üstə qaşın var" deməyib. Məhz bu cəzasızlıq mühitindən yaxşıca yararlanan Hayastan istədiyi vandalizmi həyata keçirib. Azərbaycan suverenliyini və ərazi bütövlüyünü bərpa etdikdən və Qarabağda separatizm yuvasını dağıtdıqdan sonra hücumlara məruz qalıb. Lakin 2 ili tamam olan Rusiya-Ukrayna müharibəsində ərazi bütövlüyünü bərpa etmək istəyən Ukraynaya Qərb ölkələri silahlar göndərir və bəyan edirlər ki, Ukrayna öz ərazi bütövlüyünü təmin etməlidir.
Bəs belə olan halda Azərbaycan hansı yolu seçməli idi?!
30 il sülh istəyən Azərbaycana heç bir dəstək göstərilmədi və öz gücünə ərazilərini işğaldan azad etdiyinə görə təzyiqlərə məruz qalır. Prezident İlham Əliyev bunun izahını verərək vurğuladı ki, biz Cənubi Qafqazda ayırıcı xətlərin qurulması cəhdlərini görürük. Bununla bağlı Azərbaycanda bir çox insan belə düşünür ki, Avropa institutları tərəfindən Cənubi Qafqazda Gürcüstanın və Ermənistanın çox yaxın qəbul edildiyi, Azərbaycanın isə demonizə edildiyi bir şəraitdə yeganə çıxış yolu islam dinimizdir: "Mən demirəm ki, bu, mənim şəxsi fikrimdir, insanların çoxu belə düşünür. Biz öz ərazi bütövlüyümüzü və suverenliyimizi bərpa etdikdən sonra Avropa Şurası Parlament Assambleyası Azərbaycan nümayəndə heyətinin səs hüququndan məhrum edilməsi barədə qərar qəbul edir. Əfsuslar olsun ki, bu qərar Almaniya parlamentinin üzvünün təşəbbüsü ilə qəbul olunub və o şəxs Kansler Şoltsun rəhbərlik etdiyi partiyanın üzvüdür. Bu, ikili standart deyilmi, yoxsa bizimlə aparılan bir oyundur?!"
Azərbaycan Prezidenti Almaniyanın da bu prosesdə ikili oyun oynadığını vurğulayaraq dedi ki, bu ölkənin kansleri qərəzsizlik nümayiş etdirir, onun bəyanatları və fəaliyyəti bunu göstərir. Onun rəhbərlik etdiyi partiyanın üzvü isə AŞPA-da 2 qeyri-xristian ölkəsindən biri olan Azərbaycanı uzaqlaşdırmaq istəyir və bunu nümayişkaranə və məqsədyönlü şəkildə edir. Azərbaycan isə bu qurumun sessiyalarında iştirak etməmək qərarına gəlib. Əgər Azərbaycanın öz mövqeyini bildirmək hüququ yoxdursa, nəyə görə orada olmalıdır?!
İlham Əliyev qətiyyətli şəkildə vurğuladı ki, əgər bir il ərzində nümayəndə heyətimizin hüquqları bərpa olunmazsa, Azərbaycan Avropa Şurasından tamamilə çıxmağı barədə məsələyə ciddi şəkildə baxa bilər.
İndi Almaniya Ermənistanla Azərbaycan arasında sülh müqaviləsinin imzalanması istiqamətində tərəflər arasında görüşlərin keçirilməsinə vasitəçilik edir. Ölkə liderlərinin Münxendə, xarici işlər nazirlərinin isə Berlində görüşlərinin təşkili Almaniyanın sülh prosesinə konstruktiv yanaşmağa çalışdığını göstərir. Yəni Almaniya qonşuluğunda yerləşən, Prezidentin söylədiyi kimi, alovun üstünə benzin tökən və Ermənistanı öldürücü silahlarla təchiz edən Fransadan fərqli olaraq, sülh prosesində neytrallıq nümayiş etdirir. Amma bu ölkənin KİV-ində Azərbaycana qarşı çirkin kampaniya aparılır. Azərbaycan haqqında bilərəkdən mənfi təəssürat yaradılır.
İlham Əliyev bir daha bəyan etdi ki, bütün bunlar, o cümlədən Azərbaycana qarşı qarayaxmalar, iftiralar, hədə-qorxu dili ilə danışıqlar həyata keçirilən işlərə mane ola bilməz. Azərbaycan dövləti istər ərazi bütövlüyünün bərpası, istərsə də iqtisadi gündəliyi ilə bağlı xalqın, ölkənin rifahı naminə möhtəşəm işlər görür.
Artıq qonşu Rusiya Federasiyası əsl reallıqları anlayır və yeni reallıqları qəbul edir. ABŞ və Fransanı da eyni addımı atmağa çağıran İlham Əliyev bəyan etdi ki, əks təqdirdə vəziyyət onların planlaşdırdığı kimi olmayacaq. Bu ölkələr Cənubi Qafqazda regionun aparıcı ölkəsi, güclü iqtisadiyyatı, ordusu, geniş beynəlxalq əlaqələri olan Azərbaycan ilə işləməlidirlər.
Rəşad BAXŞƏLİYEV,
"Azərbaycan"
