Ermənistanda iqtidar və müxalifətin bir-birinə qarşı hücumlarının daha radikal xarakter alması müşahidə edilir. Keçmiş hakimiyyət nümayəndələri baş nazirə qarşı şiddətli hücum başladıblar. 

Paşinyanı hakimiyyətdə olduğu son  7 il ərzində Qarabağa dair "nəsə gizli plan qurmaq"da günahlandırılir və yekunda təslim olma aktını imzaladığına görə ona satqın, xain damğası vururlar. Son vaxtlar isə sülh müqaviləsinin imzalanmasının gündəmdə olduğu bir vaxtda baş nazirin Ermənistanı yeni müharibəyə aparacağına dair fikirlər səsləndirirlər.

"Hraparak" qəzeti yazıb ki, artıq Ermənistanda bəzi fiqurlar müxalifət formalaşdırmaq məqsədilə fəaliyyətə başlayıblar. Qeyd edilib ki, onlar qondarma mərkəzçi qüvvənin formalaşdırılması istiqamətində siyasi məsləhətləşmələr aparırlar: "Bu qüvvə ilk növbədə öz qarşısına Ermənistandakı psevdoqərbçilərin maskasını qoparmaq, onların Ermənistanın düşməni olduğunu və Nikol Paşinyanın maraqlarına xidmət etdiyini cəmiyyətə göstərmək vəzifəsini qoyacaq".

Bildirilib ki, məsləhətləşmələrdə Ermənistanın keçmiş ombudsmanı Arman Tatoyan, İrəvanın keçmiş meri Ayk Marutyan, Erməni Milli Konqresi, "Həyat üçün ölkə" və bir sıra digər qüvvələr iştirak edirlər.

"Ermənistan" müxalifət blokunun deputatı Qeqam Manukyan deyib ki, baş nazir Nikol Paşinyanın Milli Assambleyadakı bəyanatına əsaslanaraq, mümkün cinayətlə bağlı MTX-nin direktoru Armen Abazyana mesaj təqdim edib. Belə ki, Paşinyan deputat Kristin Vardanyanın sualını cavablandırarkən "Ermənistan" müxalifət blokunun parlament fraksiyasını Ermənistana qarşı hibrid müharibədə və təxribatda iştirakda ittiham edib. 

Müxalifətçi deputat qeyd edib ki, bu, Cinayət Məcəlləsinin 299-cu maddəsinin, yəni dövlətə xəyanətin elementlərini ehtiva edir: "Mən məktuba Nikol Paşinyanın sözlərini əlavə etmişəm. MTX-nin direktorunu bu hesabata baxmağa, sonra isə prosesin gedişi barədə məlumat verməyə çağırıram".

Manukyanın fikrincə, Nikol Paşinyanın son 6 ildən artıq müddətdə verdiyi hər bir məsuliyyətsiz bəyanat cavabsız qalmamalıdır: "Gəlin görək Ermənistana qarşı hibrid müharibə aparan, ölkəmizdə xarici dövlətlərin lüğətindən istifadə edən, erməni xalqına qarşı fəaliyyət göstərən kimlərdir".

Bu arada "Hraparak" nəşri yazıb ki, milislərin maaşları xeyli azaldılıb, əvvəlki 200 min və daha çox məbləğdən 120-130 min drama düşüb. Qeyd edilib ki, milislər Ermənistan Müdafiə Nazirliyi ilə müqavilə bağlayan və sərhəddə dayanan könüllülərdir: "Bizə məlumat edən vətəndaşın sözlərinə görə, problem pulda deyil, dövlətin onlara münasibətindədir. İrəvan küçələrində çubuq fırladan orta təhsilli patrulçular faktiki olaraq 400 min dramdan çox maaş alır, sərhəddə dayananlar isə üç dəfə az maaş alırlar".  

Görünən odur ki, Ermənistanda daxili siyasi vəziyyət tədricən mürəkkəbləşməyə doğru gedir. Bununla da ölkə sonu görünməyən daxili siyasi böhrana qədəm qoyacaq.

Elçin CƏFƏROV,

"Azərbaycan"