Bura hərbi Memorial məzarlığıdır. Vətən müharibəsində, 2023-cü ilin antiterror əməliyyatında canından keçən oğullarımızın uyuduğu müqəddəs məkan...
Burada qəribə bir sükut hökm sürür. Bu sükutun içində nə qədər məna, nə qədər həsrət, nə qədər yarımçıq qalmış ömür, nə qədər deyilməmiş söz var.
Ölkənin müxtəlif bölgələrindən hər gün bura insanlar gəlir. Əllərində güllər, ürəklərində sözə çevrilməyən dərdlər... Burada üzbəüz durduğu məzardaşı ilə dərdləşən də var, ağı deyən də, ürəyindəki dərdi sözə çevirə bilməyib göz yaşı axıdan da.
Hər gün məzarların üstündəki güllər təzələnir. Amma elə həsrətlər var ki, illər keçsə də, acısını heç nə ilə ovutmaq olmur.
Burada nişanlısının məzarı üstünə gül qoyub nakam sevgisini ağlayanlar da var, qardaşının yoxluğuna alışa bilməyən bacılar da. Ömür-gün yoldaşını itirmiş gənc xanımlar da var, oğlunun yoxluğuna bir ömür inana bilməyən valideynlər də.
Hər məzarın arxasında nakam bir tale, yarımçıq bir həyat, bir ailənin ümidi, bir vaxtlar xəyallarda qurulan xoşbəxt gələcək var.
Bəlkə də müharibənin əsl mahiyyəti məhz burada, bu məzarların qarşısında daha aydın görünür. Müharibə təkcə itirilən torpaq, dağılan ev, atəş açan silah deyil. Müharibə həm də yaşanmamış gənclik, gerçəkləşməmiş arzu, nakam sevgi, övladının səsini bir daha eşidə bilməyən anaların qəlbində bitməyən ağrıdır...
Diqqət yetirin... Başdaşlarındakı fotoların gözləri sanki bir nöqtəyə dikilib, hamısı da ziyarətçilərə baxır.
Elə bil ki, səssizcə deyirlər ki, biz sizə Vətənimizi əmanət etdik. Onu qoruyun! Uğrunda can verdiyimiz torpağın qədrini bilin! Arxamızda qoyduğumuz doğmalarımıza sahib çıxın! Ürəyi yaralı valideynlərimizi unutmayın!
Bu məzarlar bizə həm qəhrəmanlığın qiymətini, həm də sülhün dəyərini xatırladır. Bu gün ən böyük arzumuz odur ki, bir daha analar oğul dağı görməsin, sevgilər yarımçıq qalmasın, heç bir ailənin qapısı qara xəbərlə döyülməsin. Göylərimizdə ölüm saçan raketlər deyil, sülhün rəmzi olan göyərçinlər uçsun.
Dövlətimizin başçısının davamlı sülhə yönəlmiş səylərinin arxasında da bir həqiqət dayanır: xalqların rifahı, gələcək nəsillərin təhlükəsizliyi, yeni faciələrin qarşısının alınması.
Çünki sülh zəiflik deyil, insan həyatına verilən dəyər, gələcəyə uzadılan əldir.
Bu məzarlıqlarda ömürlər susub. Onların bizə əmanət etdiyi amal isə yaşayır.
Qoy o amal yaşasın! Vətən yaşasın, insanlar yaşasın!
Bir daha heç bir ana övladını, bacı qardaşını, gənc xanım nakam sevgisini, gözüyaşlı körpə, yeniyetmə gənc atasını məzarlıqlarda axtarmasın!
Elşən QƏNİYEV,
"Azərbaycan"
jpg_1793653540.jpg)
