Tovuzlu fermerlər bu fəsildə həmçinin köhnə ilin yekunlarını götür-qoy edirlər

Bölgələrdə əhalinin əsas gəlir mənbəyi olan aqrar sahənin inkişafı üçün ardıcıl və əməli tədbirlər görülür. Bu baxımdan iri kənd təsərrüfatı rayonu olan Tovuz da istisna deyil. Tovuz fermerlərinin bu gün qarşısında duran əsas vəzifə ənənəvi sahələr olan taxılçılıq, kartofçuluq, üzümçülük və heyvandarlığın inkişafını sürətləndirməkdir.

Ümumiyyətlə, rayonda aqrar sektorun strateji sahələrindən olan taxılçılığa xüsusi diqqət verilir. Bu məqsədlə hər il əkin sahələrini artırmaq, daha çox taxıl istehsalına nail olmaq üçün bütün qüvvələr səfərbərliyə alınır. Keçən il də əvvəlki ildən çox, yəni 14137 hektar sahədə taxıl əkilmişdir. Əkilmiş sahənin 11902 hektarı payızlıq buğda, 2235 hektarı payızlıq arpa olmuş, hər hektardan 33,3 sentner olmaqla 41199 ton məhsul götürülmüşdür. 

Kənd təsərrüfatının digər sahələrində də yüksək göstəricilərə nail olunmuşdur. Götürək kartofçuluğu. Ölkəmizdə Gədəbəydən sonra ikinci ən çox kartof istehsalçısı olan Tovuzda ötən mövsüm 5496 hektar sahənin hər hektarından 298,6 sentner olmaqla 164083 ton məhsul yığılmışdır. Bundan başqa, ötən il rayon üzrə 24,4 min ton tərəvəz, 780,2 ton bostan, 87 min ton çuğundur, 4,4 ton tütün, 11,7 min ton yazlıq qarğıdalı, 30,4 min ton üzüm, 24,5 min ton meyvə və giləmeyvə toplanmışdır. 

Məlum olduğu kimi, ölkə başçısının 27 noyabr 2017-ci il tarixli sərəncamı ilə 2018-2025-ci illərdə Azərbaycan Respublikasında baramaçılığın inkişafına dair Dövlət Proqramı qəbul edilmişdir. Rayon kümçüləri bu sənəddən irəli gələn vəzifələrin icrası üçün bir sıra tədbirlər həyata keçirmişlər. Nəticədə təkcə ötən mövsüm 54 kümçü tərəfindən 3867,60 kiloqram yaş barama istehsal olunaraq "Azəripək" MMC-yə təhvil verilmişdir. 

Bir neçə fakt da bu gün daha çox haqqında söhbət gedən heyvandarlıq barədə. Öncə onu qeyd edək ki, Tovuz heyvandarlığın inkişafı sahəsində həmişə yüksək göstəricilərə nail olmuşdur. Bu ənənə az-çox indi də davam edir. Keçən ilin əvvəlinə olan məlumata görə, rayon üzrə qaramalın baş sayı 41 min, qoyun və keçilərinki 164 min olmuşdur. Rayonda mal-qaranın cins tərkibinin yaxşılaşdırılması istiqamətində də çoxsaylı tədbirlər görülür. Keçən il 4 süni mayalanma mütəxəssisi tərəfindən 598 baş inəkdə mayalanma aparılmış, 348 baş sağlam buzov alınmışdır. 

Tovuzlu heyvandarlar çalışırlar ki, bu sahənin alimləri ilə əməkdaşlıqlarını genişləndirsinlər. Elə bu məqsədlə keçən il Tovuz Dövlət Aqrar İnkişaf Mərkəzinin heyvandarlıq sektorunun əməkdaşları və rayonda fəaliyyət göstərən fermerlər Heyvandarlıq Elmi Tədqiqat İnstitutunda keçirilən seminarlara qatılmış və öyrəndikləri yenilikləri təsərrüfatlarında tətbiq etmişlər. Səmərəsi gözlənildiyindən də yaxşı olmuşdur.

 Sabir ƏLİYEV,

 "Azərbaycan"