Dünyanın mədəni irsi bəşəriyyətin əvəzolunmaz sərvətidir və onun qorunması birgə səy tələb edir. Bu çərçivədə tarixi abidələrinin bərpasına və qorunmasına yönəlmiş beynəlxalq layihələrin dəstəyi xüsusi rol oynayır. Heydər Əliyev Fondu bu proseslərdə fəal iştirak edərək, mədəniyyətlərarası dialoq prinsiplərinə və dünya irsinin qorunub saxlanmasına mühüm töhfə verir.
AZƏRTAC xəbər verir ki, ötən illər ərzində Heydər Əliyev Fondu tərəfindən Vatikanda bəşəri əhəmiyyət daşıyan bir sıra tarixi abidələrin bərpası, mədəni irsin qorunması sahəsində işlər görülüb. Fondun dəstəyi sayəsində Vatikanda Müqəddəs Marçellinio və Pietro katakombalarının, Müqəddəs Pyotr Kilsəsində “Roma Papası I Leon ilə Hun imperatoru Atillanın görüşü” barelyefinin bərpası, Müqəddəs Sebastian Bazilikasında yeni muzeyin yaradılması, sarkofaqların restavrasiyası və digər layihələr həyata keçirilib.
Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyeva Müqəddəs Taxt-Taca səfərləri çərçivəsində bərpa edilən abidələr və incəsənət nümunələri ilə tanış olub, Vatikanda bir sıra mühüm görüşlər keçirib.
Heydər Əliyev Fondunun dünya mədəni və dini irs obyektlərinin, xüsusən də Vatikan ərazisində, çoxillik və məqsədyönlü fəaliyyəti Azərbaycanın multikulturalizm və dinlərarası dialoq ideyalarına dəstəyinin bariz nümunəsidir. Belə ki, Müqəddəs Kommodilla katakombalarında qorunan ən mühüm abidələrdən ikisi olan Müqəddəs Feliks və Adauktusun yeraltı bazilikasındakı freskalarında və Leo kubikulundakı freskalarda bərpa işləri tamamlanıb. Oktyabrın 16-da Heydər Əliyev Fondunun prezidenti Mehriban Əliyeva, Müqəddəs Arxeologiya üzrə Pontifik Komissiyasının prezidenti Monsenyor Paskuale Yakabone, Vatikan Dövlətinin Mədəniyyət üzrə Pontifik Şurasının sabiq prezidenti Kardinal Canfranko Ravazi və digər rəsmi şəxslərin iştirakı ilə onların açılışı keçirilib. Bu hadisə Heydər Əliyev Fondu ilə Müqəddəs Arxeologiya üzrə Pontifik Komissiya arasında 2021-ci ilin martın 4-də imzalanmış katakombalar kompleksinin qorunub saxlanmasına və bərpasına yönəlmiş müqavilənin kulminasiya nöqtəsi olacaq. Bu sənəd Heydər Əliyev Fondunun dəstəyi sayəsində Müqəddəs Arxeologiya üzrə Pontifik Komissiyasına Müqəddəs Marçellinio və Pietro katakombalarının, Müqəddəs Sebastian Bazilikasında sarkofaqların restavrasiyası da daxil olmaqla, bərpasını həyata keçirməyə imkan verən uzunmüddətli və səmərəli əməkdaşlığın növbəti mərhələsi oldu.
Konservasiya proqramı Müqəddəs Kommodilla katakombalarının gələcəkdə geniş ictimaiyyətə açılmasını təmin etmək məqsədilə onların populyarlaşdırılmasını hədəfləyir. Birinci vitse-prezidentin bərpa edilmiş Müqəddəs Kommodilla katakombalarının açılış mərasimində iştirakı bu tərəfdaşlığın davamlı olmasının göstəricisidir.
Heydər Əliyev Fondunun Vatikandakı xristian abidələrinin qorunmasına verdiyi göstərdiyi diqqət xeyriyyəçilik deyil, həm də müsəlman ölkəsinin ümumbəşəri dəyərlər xəzinəsinə verdiyi mühüm töhfə, gələcək nəsillərin rifahı naminə mədəniyyətlər və dinlər arasında körpülərin möhkəmlənməsi deməkdir.
jpg_1764922515.jpg)
