- 2006-cı ilə qədər rəsmi əmək stajım mövcuddur. Sonrakı illərdə isə fərdi əmək fəaliyyəti ilə məşğul olmuşam və həmin dövr üzrə fərdi sosial sığorta hesabımda vəsait formalaşmayıb. Hazırda pensiya yaşına çatmışam, lakin mənə yaşa görə əmək pensiyası deyil, yalnız sosial müavinət təyin edilib. Bu hal qanunvericiliyə uyğundurmu? 2006-cı ilə qədər olan əmək stajım əmək pensiyasının təyinində nəzərə alınmalı deyilmi?
Ağa RÜSTƏMOV,
Bakı şəhəri
- "Əmək pensiyaları haqqında" Qanuna və "Əmək pensiyalarının təyin edilməsi, hesablanması, yenidən hesablanması, bir növdən başqa növə keçirilməsi və ödənilməsi" Qaydalarına əsasən, 2006-cı il yanvarın 1-dək olan əmək (sığorta) stajı əmək pensiyasının təyinində nəzərə alınmalıdır. Xüsusilə, 2019-2025-ci illərdə pensiya yaşına çatmış şəxslərə yaşa görə əmək pensiyası təyin edilərkən, onların 2006-cı il yanvarın 1-dək olan sığorta stajı 25 il kimi hesablanır və bu dövr üzrə faktiki stajınız varsa, həmin illər pensiya hüququnun müəyyən edilməsində nəzərə alınmalıdır. Həmin dövr üzrə qazanılmış pensiya hüquqları pensiya kapitalına çevrilir və fərdi şəxsi hesabınızda əks etdirilməlidir. Əgər yalnız sosial müavinət təyin edilibsə və 2006-cı ilə qədər kifayət qədər əmək stajınız varsa, bu, qanunvericiliyə uyğun deyil və qərardan şikayət vermək hüququnuz var. Praktikada, 2006-cı ilədək olan əmək stajı təsdiqedici sənədlərlə təqdim olunmalı və pensiya təyinatında nəzərə alınmalıdır.
- Bu il növbəti əmək məzuniyyətindən istifadə edə bilmədiyim üçün kompensasiya aldım. Amma 36 təqvim günü əvəzinə yalnız 30 təqvim günü əsas məzuniyyət hesablandı, əlavə məzuniyyət günləri nəzərə alınmadı. Bu, qanunla düzgündürmü?
Tamella QULİYEVA,
Sumqayıt şəhəri
- Azərbaycan Respublikasının Əmək Məcəlləsinə əsasən, istifadə edilməmiş əmək məzuniyyətinə görə kompensasiya həm əsas, həm də əlavə məzuniyyət günləri üçün ödənilməlidir. Əsas məzuniyyət yalnız əlavə məzuniyyətlərlə birlikdə verilməli və onların müddətləri cəmlənməlidir. Əgər işçi növbəti əmək məzuniyyətindən tam istifadə etməyibsə, ona həm əsas, həm də əlavə məzuniyyət günlərinin hamısına görə kompensasiya ödənilməlidir. Yalnız əsas məzuniyyət günlərinə görə kompensasiya hesablanıb, əlavə məzuniyyət günləri nəzərə alınmayıbsa, bu qanunsuzdur və əlavə 6 gün üçün də kompensasiya ödənilməlidir.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
jpg_1782946307.jpg)
