Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin Yeni Azərbaycan Partiyasının VIII Qurultayında çıxışı ölkəmizin yeni inkişaf mərhələsinin əsas prioritetlərini və qarşıda duran strateji vəzifələri aydın şəkildə ortaya qoydu.
Bu Qurultayın Azərbaycanın ərazi bütövlüyünün və suverenliyinin tam bərpa olunmasından sonra keçirilməsi onun tarixi və siyasi əhəmiyyətini daha da artırır. Artıq Azərbaycan yeni reallıqlar şəraitində öz inkişafının növbəti mərhələsinə qədəm qoyur və qarşıda duran əsas vəzifələr də bu reallıqlardan irəli gəlir.
Cənab Prezidentin çıxışında xüsusi vurğulandığı kimi, Azərbaycanın əldə etdiyi tarixi Zəfərlərin əsasında xalq-iqtidar birliyi, milli həmrəylik, güclü dövlətçilik və ardıcıl siyasi strategiya dayanır. 2020-ci ilin 44 günlük Vətən müharibəsində qazanılan Qələbə və 2023-cü ildə suverenliyimizin tam bərpası uzun illər ərzində həyata keçirilən məqsədyönlü siyasətin məntiqi nəticəsidir.
Bu baxımdan, Yeni Azərbaycan Partiyasının keçdiyi yolu Azərbaycanın müasir dövlətçilik tarixindən ayrı təsəvvür etmək mümkün deyil. Ulu Öndər Heydər Əliyevin rəhbərliyi ilə yaradılan Yeni Azərbaycan Partiyası ölkəmizin ən mürəkkəb dövründə xalqın siyasi iradəsini və dövlətçilik maraqlarını ifadə edən aparıcı siyasi qüvvə kimi formalaşdı. Ulu Öndərin 1993-cü ildə xalqın təkidli tələbi ilə hakimiyyətə qayıdışı isə Azərbaycanın dövlət müstəqilliyinin qorunması və möhkəmləndirilməsi baxımından həlledici mərhələ oldu.
Bu gün həmin dövlətçilik kursu möhtərəm Prezidentimiz cənab İlham Əliyevin rəhbərliyi ilə yeni tarixi şəraitə uyğun şəkildə uğurla davam etdirilir. Güclü dövlət, müstəqil siyasət, iqtisadi dayanıqlılıq, qüdrətli ordu və milli maraqların qətiyyətlə qorunması bu siyasətin əsas dayaqlarıdır.
Ərazi bütövlüyümüzün və suverenliyimizin bərpası böyük tarixi məqsədlərimizin həyata keçirilməsini təmin etdi. İndi isə qarşımızda yeni vəzifələr dayanır. Qarabağ və Şərqi Zəngəzurun bərpası, Böyük Qayıdışın sürətləndirilməsi, keçmiş məcburi köçkünlərin doğma yurdlarına qayıdışının təmin olunması və azad edilmiş ərazilərin iqtisadi potensialının ölkənin ümumi inkişafına inteqrasiyası qarşıdakı mərhələnin əsas prioritetlərindəndir.
Bu gün azad edilmiş ərazilərdə aparılan genişmiqyaslı quruculuq işləri artıq real nəticələr verir. Yeni yaşayış məntəqələri, yollar, sosial obyektlər, enerji və digər infrastruktur layihələri Qarabağın və Şərqi Zəngəzurun gələcək inkişafının möhkəm əsaslarını formalaşdırır. Bu, Azərbaycanın öz siyasi iradəsi və iqtisadi imkanları hesabına həyata keçirdiyi böyük quruculuq prosesidir.
Cənab Prezidentin təhlükəsizlik və müdafiə məsələlərinə verdiyi önəm də yeni dövrün reallıqlarından irəli gəlir. Müasir dünyada geosiyasi proseslərin sürətlə dəyişdiyi bir şəraitdə güclü ordu və etibarlı müdafiə sistemi dövlətimizin müstəqil siyasətinin mühüm təminatlarından biridir.
Eyni zamanda, ideoloji və informasiya təhlükəsizliyi məsələləri də xüsusi diqqət tələb edir. Rəqəmsal texnologiyaların həyatımıza sürətlə daxil olduğu indiki dövrdə milli-mənəvi dəyərlərin qorunması, gənc nəslin vətənpərvərlik ruhunda yetişdirilməsi, tarixi həqiqətlərin düzgün təbliği və cəmiyyətin dezinformasiyalardan qorunması dövlətçilik baxımından mühüm əhəmiyyət daşıyır.
Azərbaycanın müstəqil və milli maraqlara əsaslanan xarici siyasəti də ölkəmizin mövqeyinin möhkəmlənməsində mühüm rol oynayır. Azərbaycan bu gün həm regional, həm də beynəlxalq səviyyədə etibarlı tərəfdaş kimi çıxış edir, müxtəlif dövlətlərlə qarşılıqlı faydalı əməkdaşlığı genişləndirir və qlobal gündəlikdə öz mövqeyini fəal şəkildə ortaya qoyur.
İqtisadi inkişaf və sosial rifah da qarşıdakı mərhələnin əsas istiqamətlərindəndir. Minimum əməkhaqqının, pensiyaların və sosial müavinətlərin artırılması ilə bağlı açıqlanan hədəflər dövlətimizin sosial siyasətinin davamlı xarakter daşıdığını göstərir. İqtisadi dayanıqlılığın qorunması, investisiyaların cəlb edilməsi, yeni iş yerlərinin yaradılması və regionların inkişafı insanların rifahının yüksəldilməsinə xidmət edir.
Azərbaycanın enerji siyasəti isə həm iqtisadi, həm də geosiyasi baxımdan xüsusi əhəmiyyət daşıyır. Ölkəmiz müxtəlif enerji resurslarının hasilatı, istehsalı və ixracı sahəsində geniş imkanlara malikdir. Neft və qazla yanaşı, elektrik enerjisi, neft-kimya məhsulları və gübrə istehsalı, eləcə də bərpa olunan enerji potensialının inkişaf etdirilməsi Azərbaycanın enerji imkanlarını daha da genişləndirir.
Bu gün Azərbaycanın enerji resursları yalnız iqtisadi inkişafımız üçün deyil, regional və beynəlxalq enerji təhlükəsizliyi baxımından da mühüm əhəmiyyət daşıyır. Qarşıdakı dövrdə enerji potensialımızdan daha səmərəli istifadə, yeni layihələrin həyata keçirilməsi və ixrac imkanlarının genişləndirilməsi ölkəmizin iqtisadi gücünü və regional əhəmiyyətini daha da artıracaq.
Yeni Azərbaycan Partiyasının VIII Qurultayı bir daha göstərdi ki, qarşıdakı mərhələdə əsas hədəf əldə etdiyimiz tarixi Zəfərləri möhkəmləndirmək, Azərbaycanın iqtisadi və siyasi gücünü daha da artırmaq və yeni inkişaf imkanlarından səmərəli istifadə etməkdir. Cənab Prezident İlham Əliyevin müəyyən etdiyi strateji kurs bu məqsədlərin həyata keçirilməsi üçün aydın istiqamət və möhkəm siyasi iradə formalaşdırır. Xalqımızın birliyi və dövlətimizin gücü ilə Azərbaycan qarşıdakı illərdə də yeni uğurlara imza atacaq.
Fatma Yıldırım,
Milli Məclisin deputatı
jpg_1790976482.jpg)
jpg_1791122740.jpg)
