Sarkisyan və Köçəryanın ardınca Petrosyanın da qatil olduğu üzə çıxdı
İllərdir Ermənistanın əlləri azərbaycanlıların qanına bulaşmış qatil prezidentləri deyəndə, adətən, Robert Köçəryan-Serj Sarkisyan cütlüyünün murdar adlarını ikrahla çəkirdik. Milli kimliyimizə susayan bu canilər xalqımızın başına gətirdikləri soyqırımlarını, qətliamları hay həyasızlığı ilə dilə gətirərək vəhşi əməllərini hətta beynəlxalq ictimaiyyət qarşısında etiraf etməkdən belə çəkinməmişdilər.
Açığı, erməni qatil prezidentlərin bu siyahısında Qarabağda baş verən ən qəddar hadisələrin törədildiyi, torpaqlarımızın Ermənistan tərəfindən işğal edildiyi dönəmdə prezidentlik etmiş Levon Ter-Petrosyanın adının olmaması böyük şübhə doğururdu və qətiyyən inandırıcı deyildi ki, bütün bu qanlı proseslərdə qondarma dövlətin birinci prezidenti iştirak etməsin.
Bu günlərdə Levon Ter-Petrosyanın 1993-cü il iyulun 23-də "Yerkrapa" könüllülər birliyinin toplantısında çıxışının yayılan videoyazısı isə şübhələnməkdə haqlı olduğumuzu bir daha təsdiq etdi.
Prezident qismində etdiyi bu çıxışında Petrosyan da Köçəryan və Sarkisyan kimi ermənilərin həyata keçirdikləri işğalçılıq siyasətindən, azərbaycanlılara qarşı etnik təmizləmədən, bir sözlə, xidmət etdiyi faşizm ideologiyasından bəhs edərək, bu murdar əməllərini utanmadan dilə gətirir.
Ermənistanı necə monoetnik dövlətə çevirdilər?!
Görün özünü dünyaya məzlum xalq kimi sırıyaraq onun-bunun ianəsi hesabına dolanan "biçarə" ermənilərin prezidentləri milli düşmənçilik zəminində azərbaycanlılara qarşı törətdikləri barbar əməlləri necə etiraf ediblər.
Qondarma Ermənistan dövlətinin birinci prezidenti Levon Ter-Petrosyan 1993-cü il iyulun 23-də - Ağdamın işğalı günündə "Yerkrapa" könüllülər birliyinin qarşısında qürrə ilə deyir: "Ermənistan və Dağlıq Qarabağ erməni xalqının 600 ildən bəri həll edə bilmədiyi bir problemi həll etdi. Ermənistan və Dağlıq Qarabağ yad millətlərdən tamamilə təmizləndi. Təkrar edirəm, bu, 600 illik problem idi. Bunun əhəmiyyətini erməni xalqı bundan sonra ən azı 600 il hiss edəcək".
Petrosyan faşizm xislətlərini bu fikirləri ilə açıq şəkildə ortaya qoyaraq, düz 6 əsrdir ki, ermənilərin Qarabağ, indiki Ermənistan ərazisini yad millətlərdən, yəni min illərdir bu ərazilərdə var olan yerli azərbaycanlılardan tamamilə təmizlədiklərinin "şad" xəbərini çatdırır. O, prezident olaraq özünün də irqçi, Azərbaycan xalqına qarşı nifrət bəsləyən, işğalçılıq siyasətini dəstəkləyən biri olduğunu gizlətmir.
Adi şəxsin dilindən yox, Ter-Petrosyanın qismində prezident tərəfindən səsləndirilən bu etiraflar həmçinin qondarma dövlət olan Ermənistanın yarandığı gündən işğalçılıq ideologiyasına xidmət etdiyindən xəbər verir.
Erməni faşistin çıxışı həm də Ermənistanın bu gün nə üçün monoetnik dövlətə çevrilməsinin səbəblərinə aydınlıq gətirir. Eyni zamanda bu, dünyada multikultural, tolerant ölkə kimi nümunə olan Azərbaycanı vaxtaşırı etnik təmizləmədə günahlandıran Qərbdəki erməni havadarlarına veriləcək fakta əsaslanan cavabdır.
Petrosyanın maskası cırıldı
Əsasən, azərbaycanlıların etnik təmizlənməsinə köklənmiş həmin çıxışını Petrosyan belə davam etdirir: "Təsəvvür edin ki, əgər bu gün Ermənistanda 1988-ci ildə olduğu kimi, 180 min yad millətin nümayəndəsi olsaydı, bu gün bizim dövlətimiz olmazdı. Biz Zəngəzuru, şimal-şərq rayonlarımızı, Sevanın (Göyçə gölü) sahillərini qorumaq iqtidarında olmazdıq. Hətta burada bir neçə muxtariyyət yaranardı. Unutmayın ki, üç rayonda azərbaycanlılar çoxluq təşkil edirdi - Vardenis, Masis və Amasya. Zəngəzurda onların sayı həddindən artıq çox idi. İndi bu problem həll edilib".
Təkcə 1988-ci ildə Ermənistan ərazisindən 300 min azərbaycanlının qovulması danılmaz faktdır. Açıqca görünür ki, Petrosyan bilərəkdən bu rəqəmi olduğundan dəfələrlə az göstərib, necə deyərlər, hiyləgər hay nə olar, nə olmaz deyə, gələcəyə də əlyeri saxlayıb. Ancaq bu günə qədər yaxşı maskalanmağı bacaran məkrli Petrosyan erməni murdarlığına xas qürrəyə elə qapılıb ki, sözün həqiqi mənasında, tülkülüyünü bir anlıq unudaraq azərbaycanlıların çoxluq təşkil etdikləri əraziləri adbaad saymaqdan da özünü saxlaya bilməyib. Vaxt gələcək bu çıxışının xalqımıza qarşı iyrənc planlar quran başına ip kimi dolanacağını hesaba almayıb.
Petrosyanın özünün də etiraf etdiyi kimi, düz 6 əsrdir ki, xalqımıza məxsus torpaqlara yiyələnmək üçün azərbaycanlılara qarşı çirkin plan quran erməni "ideoloq"larının davamçıları 1988-ci ildən etibarən bu murdar ideyalarını açıq müstəviyə daşıdılar. Elə Levon Ter-Petrosyanın da başçılığı altında Ermənistandakı azərbaycanlılar sonuncu nəfərinə kimi yurdlarından didərgin salındılar. Xarici havadarlarının köməyilə Ermənistan yenicə müstəqillik qazanmış, ordusu belə formalaşmamış Azərbaycana qarşı işğalçılıq siyasətinə başladı. Qarabağ və onun ətrafındakı ərazilər ard-arda işğal edildi, 800 min azərbaycanlı məcburi köçkün vəziyyətinə düşdü. Əhalimizə divan tutuldu, soyqırımları həyata keçirildi...
Qərbi azərbaycanlıları tarixi torpaqlarına qovuşduracaq faktlar
Diqqət edin, məşhur britaniyalı jurnalist, "Qara bağ" kitabının müəllifi Tomas de Vaalın 2000-ci ildə sabiq Ermənistan prezidenti Serj Sarkisyandan aldığı müsahibədə isə qondarma dövlətinin adıçəkilən prezidenti qandondurucu əməllərinə görə öyünür: "Xocalı hadisələrinədək azərbaycanlılar elə bilirdilər ki, biz onlarla zarafat edirik. Onlar elə düşünürdülər ki, ermənilər mülki əhaliyə qarşı əl qaldıracaq insanlar deyil. Biz bu anlayışa (stereotipə) son qoyduq".
Bununla da bitmir, qondarma dövlətin daha bir prezidenti Robert Köçəryan 2004-cü ildə AŞPA-dakı çıxışı ilə özünü ifşa etmişdi.
Həmin zaman istər çıxışında, istərsə də suallara cavabında Köçəryan daxili hisslərini büruzə verməklə özünü ifşa etmiş və hərbi əməliyyatlarda iştirakı ilə fəxr etdiyini demişdi. Bu isə Köçəryanın da müharibə canisi olduğunu və əllərinin yüzlərlə azərbaycanlının qanına batdığının təsdiqi idi.
Vaxtilə qondarma dövlətin prezidentləri olmuş Levon Ter-Petrosyan, Serj Sarkisyan, Robert Köçəryan tərəfindən səsləndirilən və bəzi nümunələrini verdiyimiz bu tükürpərdici etiraflardan da görünür ki, erməni faşistləri hər zaman düşünüblər ki, azərbaycanlılara qarşı bu cür vəhşiliklər törədərək onların gözlərini qorxudacaq, tarixi torpaqlarımızın ermənilər tərəfindən zəbtinə göz yumduracaqlar. Lakin artıq haqq öz yerini tapıb. Murdar düşmən Qarabağımızdan birdəfəlik gedib. Erməni hərbi qatillərin bir çoxu tutularaq Azərbaycan qanunları ilə mühakimə edilirlər. Elə Azərbaycan xalqına düşmən kəsilən Sarkisyanın, Köçəryanın, 30 ildən sonra olsa da üzə çıxan Petrosyanın qanlı etirafları da beynəlxalq məhkəmələrdə onların əleyhinə işləyəcək əsaslı əleyh-dəlillərdir.
Həm də elə məhz bu təkzibedilməz faktlar əsasında qərbi azərbaycanlılar da tarixi torpaqlarına qayıdacaqlar.
Yasəmən MUSAYEVA,
"Azərbaycan"
