27 Sentyabr - Anım Günü ərəfəsində Vətənimizin ərazi bütövlüyü və suverenliyi uğrunda canından keçən şəhidlərimizin əziz xatirəsi Tovuz rayonunda dərin ehtiramla yad edilir. Tovuz Rayon İcra Hakimiyyətinin başçısı Məmməd Məmmədovun iştirakı ilə rayon sakinləri və şəhid ailələri dağ kəndlərindəki Vətən müharibəsi şəhidlərinin məzarlarını ziyarət etmiş və onların əziz xatirələrinə ehtiramlarını bildirmişlər.
Rayonun Qaralar, Qaradaş, Çeşməli, Çatax, Əsrik Cırdaxan, Koxanəbi, Bayramlı və Azaflı kəndlərindən olan tədbir iştirakçıları şəhidlərimizin məzarlarını ziyarət edərək məzarları üstünə gül-çiçək dəstələri düzmüşlər.
Ziyarət zamanı şəhidlərin keçdiyi şərəfli döyüş yolu, Vətən uğrunda göstərdikləri misilsiz qəhrəmanlıq və fədakarlıq bir daha ehtiramla xatırlanıb. Bildirilib ki, şəhidlərimizin əziz xatirəsi xalqımızın yaddaşında daim yaşayacaq, onların qəhrəmanlığı gələcək nəsillər üçün əsl Vətən sevgisi və vətənpərvərlik nümunəsi olacaqdır.
Görüş zamanı icra başçısı şəhid ailələrinin üzvləri ilə söhbət etmiş, onların qayğıları ilə maraqlanmışdır. Bildirilmişdir ki, şəhid ailələri daim dövlətin diqqət və qayğısı ilə əhatə olunmuşlar. Onların sosial-məişət problemlərinin həlli və müraciətlərinin araşdırılması istiqamətində müvafiq tədbirlər həyata keçirilir. Qeyd olunmuşdur ki, şəhidlərin əziz xatirəsini yaşatmaq, onların ailələrinə diqqət və qayğı göstərmək, Vətən qarşısındakı misilsiz xidmətlərini daim ehtiramla yad etmək hər birimizin mənəvi borcudur.
Şəhid ailələrinin üzvləri dövlətin göstərdiyi diqqət və qayğıdan məmnun olduqlarını bildirmişlər.
Sabir ƏLİYEV,
"Azərbaycan"
677jpg_1790033437.jpg)
