Şəmkirdə Azərbaycan Respublikasının Prezidenti İlham Əliyevin sərəncamı ilə təsdiq edilmiş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"ndan irəli gələn vəzifələr və bu istiqamətdə görülən işlər müzakirə edilmişdir.
Müşavirədə qeyd edilmişdir ki, dövlət proqramında müəyyənləşdirilən hədəflərə uyğun olaraq aqrar sahənin inkişafı, istehsalın və məhsuldarlığın artırılması, müasir texnologiyaların tətbiqinin genişləndirilməsi və fermerlərin fəaliyyət imkanlarının artırılması istiqamətində çoxsaylı tədbirlər həyata keçirilmişdir. Dövlət proqramının icrası ilə bağlı təsdiq edilmiş İş Planına uyğun olaraq rayon ərazisində kənd təsərrüfatının müxtəlif istiqamətləri üzrə fəaliyyət göstərən təsərrüfatlara baxış keçirilmiş, fermerlərlə görüşlər təşkil olunmuş, onların qarşılaşdıqları problemlər yerində öyrənilmişdir.
Şəmkir Aqroparkında keçirilən görüşdə müəssisənin mövcud vəziyyəti, bağçılıq sahəsində planlaşdırılan tədbirlər, həmçinin su resurslarından səmərəli istifadə məqsədilə nəzərdə tutulan layihələrin müzakirəsi də aparılmışdır. Tədbirdə Şəmkir Rayon İcra Hakimiyyətinin başçısı Rəşad Tağıyev çıxış edərək, kənd təsərrüfatının rayonun sosial-iqtisadi inkişafında mühüm rol oynadığını qeyd etmiş, dövlət proqramından irəli gələn vəzifələrin icrası zamanı aidiyyəti dövlət qurumlarının koordinasiyalı fəaliyyətinin və fermerlərin qarşılaşdıqları problemlərin operativ həllinin mühüm əhəmiyyət kəsb etdiyini vurğulamışdır.
Bağçılıq və istixana təsərrüfatlarına baxış zamanı isə bu sahələrin inkişafı üçün mövcud imkanlar nəzərdən keçirilmişdir. Bildirilmişdir ki, dövlət proqramında intensiv bağçılığın genişləndirilməsi, yeni texnologiyaların tətbiqi, istixana təsərrüfatlarının müasirləşdirilməsi və istehsal imkanlarının genişləndirilməsi istiqamətində bir çox tədbir nəzərdə tutulmuşdur.
Müşavirədə o da bildirilmişdir ki, rayonun əlverişli iqlim şəraiti və formalaşmış aqrar infrastrukturu, həmçinin sahibkarların zəngin təcrübəsi bu sahələrin inkişafı üçün geniş imkanlar yaradır. Heyvandarlıq təsərrüfatlarında yüksək məhsuldar cins inəklərin sayının artırılması, yem bazasının gücləndirilməsi, baytarlıq xidmətlərinin əlçatanlığının təmin edilməsi və müasir təsərrüfat idarəçiliyinin tətbiqi ilə bağlı məsələlərə də diqqət yetirilmişdir. Dövlət proqramında heyvandarlığın inkişafı üzrə müəyyənləşdirilən hədəflərin rayonda həyata keçirilməsi, məhsuldarlığın yüksəldilməsi və istehsal imkanlarının artırılması istiqamətində işlərin davam etdirilməsinin vacibliyi qeyd edilmişdir.
Sabir ƏLİYEV,
"Azərbaycan"
677jpg_1790033437.jpg)
jpg_1790079788.jpg)
