Azərbaycan Avropanın enerji keçidində iştirak edəcək vacib tərəfdaşdır

Prezident İlham Əliyevin Dublində keçirilən Avropa Siyasi Birliyinin 9-cu Zirvə toplantısına dəvət olunması Azərbaycanın Avropa siyasi məkanında artan rolunun və ölkəmizlə aparılan siyasi dialoqun genişlənməsinin göstəricisidir. Zirvə toplantısında dövlət başçısının iştirakı Azərbaycanın Avropa ölkələri ilə münasibətlərinin mövcud səviyyəsini, eləcə də regional və beynəlxalq məsələlərin müzakirəsində fəal iştirakını nümayiş etdirir. 

Milli Məclisin deputatı Vüqar RƏHİMZADƏ qəzetimizə açıqlamasında dedi ki, 50-yə yaxın dövlət və hökumət başçısını bir araya gətirən bu platforma Avropanın təhlükəsizliyi, iqtisadi rəqabətqabiliyyətliliyi, enerji təminatı və nəqliyyat bağlantıları kimi mühüm məsələlərin müzakirəsi üçün geniş siyasi imkanlar yaradır. Prezident İlham Əliyevin bu sammitdə iştirak etməsi Azərbaycanın Avropa üçün dünyada söz sahibi olan, güclü və etibarlı tərəfdaş kimi qəbul edildiyini və ölkəmizlə siyasi təmasların daha da inkişaf etdirilməsinə böyük marağın olduğunu göstərən amildir. “Avropa ölkələrinin Azərbaycana marağının artması Prezident İlham Əliyevin beynəlxalq səviyyədə artan nüfuzu, ölkəmizin beynəlxalq münasibətlər sistemində mövqeyinin möhkəmlənməsi və regional, eləcə də qlobal məsələlərin həllində rolunun genişlənməsi ilə əlaqədardır. Bu maraq Avropa dövlət və hökumət başçılarının, Avropa İttifaqının yüksək vəzifəli nümayəndələrinin Azərbaycana səfərlərində, dövlətimizin başçısı ilə keçirilən görüşlərdə, eləcə də yeni əməkdaşlıq təşəbbüslərinin irəli sürülməsində aydın şəkildə özünü göstərir”, – deyə o əlavə etdi.

Deputat diqqətə çatdırdı ki, Avropa Siyasi Birliyi 2022-ci ildə yaradılmış Avropa İttifaqına üzv olan və olmayan dövlətləri ümumi siyasi və strateji məsələlərin müzakirəsi üçün bir araya gətirən dialoq platformasıdır. Bu formatın əsas üstünlüyü müxtəlif siyasi mövqelərə malik ölkələrin liderlərinə ortaq maraq doğuran məsələləri birbaşa müzakirə etmək, qarşılıqlı məsləhətləşmələr aparmaq və əməkdaşlıq imkanlarını nəzərdən keçirmək şəraiti yaratmasıdır. Azərbaycan bu platformada iştirak etməklə öz milli maraqlarını Avropa liderləri səviyyəsində təqdim edir, regional təhlükəsizlik, enerji, nəqliyyat və iqtisadi əməkdaşlıqla bağlı mövqeyini çatdırır. Eyni zamanda, ölkəmiz Avropanın gələcəyinə dair müzakirələrdə yalnız müşahidəçi deyil, konkret təşəbbüsləri və regional imkanları olan tərəfdaş kimi iştirak edir. 

V.Rəhimzadə qeyd etdi ki, Azərbaycanın Avropa üçün strateji əhəmiyyətini şərtləndirən əsas istiqamətlərdən biri enerji təhlükəsizliyidir: “2022-ci ildə Azərbaycanla Avropa İttifaqı arasında enerji sahəsində strateji tərəfdaşlığa dair Anlaşma Memorandumunun imzalanması bu əməkdaşlığın yeni mərhələsinin əsasını qoyub. Cənub Qaz Dəhlizi vasitəsilə Avropaya təbii qaz tədarükünün genişlənməsi ölkəmizin enerji təchizatının şaxələndirilməsindəki rolunu daha da artırıb. Prezident İlham Əliyev Dublin sammiti çərçivəsində keçirilən “Rəqabətqabiliyyətli Avropanın qurulması - innovasiya, bağlantılar və əlçatan enerji” mövzusunda dəyirmi masada çıxışı zamanı Azərbaycanın Avropanın enerji təhlükəsizliyinə verdiyi töhfələrə toxunub. Dövlət başçısı Azərbaycan ilə Avropa İttifaqı arasında enerji sahəsində strateji tərəfdaşlığa dair 2022-ci ildə imzalanmış Anlaşma Memorandumunu qeyd edib və bildirib ki, o vaxtdan bəri ölkəmiz Avropa İttifaqına qaz təchizatını 8 milyard kubmetrdən 13 milyard kubmetrə qədər artırıb. Bu faktlar Azərbaycanın enerji tərəfdaşlığının konkret nəticələrini nümayiş etdirir”. 

Deputat vurğuladı ki, Azərbaycanın Avropa ilə əməkdaşlığı ənənəvi enerji resursları ilə məhdudlaşmır. Ölkəmizin bərpaolunan enerji potensialı, Xəzər dənizinin külək enerjisi imkanları, günəş enerjisi layihələri və Mərkəzi Asiya ilə yaşıl enerji bağlantılarının yaradılması istiqamətində görülən işlər gələcək əməkdaşlıq üçün yeni perspektivlər açır. Qara dənizin dibi ilə elektrik kabelinin çəkilməsi layihəsi də Azərbaycanın yaşıl enerjinin Avropa bazarlarına çatdırılmasında iştirak imkanlarını genişləndirəcək. Beləliklə, Azərbaycan yalnız mövcud enerji tələbatının ödənilməsinə töhfə verən ölkə deyil, həm də Avropanın gələcək enerji keçidində iştirak edəcək vacib və etibarlı tərəfdaşdır.

Əsmər QARDAŞXANOVA,

“Azərbaycan”