Ermənistanda konstitusiya dəyişiklikləri üzrə Şura seçki sistemi ilə bağlı qərarlar qəbul edəcək
Ermənistanda müxalifət planlaşdırdığı aksiyalarla baş nazir Nikol Paşinyanı hakimiyyətdən uzaqlaşdırmağı hədəfləyir. Müxalifətçilər keçiriləcək etirazlara səbəb kimi hakimiyyətin yürütdüyü uğursuz siyasəti göstərirlər.
Keçmiş hərbi xunta isə yaranmış vəziyyətdən istifadə edərək Qarabağdan köçən ermənilər vasitəsilə ölkədəki xaosu daha da dərinləşdirməyə çalışır. Elə siyasi proseslərdə də onlardan yararlanaraq fərqli atmosfer yaratmağı düşünürlər.
Artıq Ermənistanın rəhbərliyi bütün reallıqları etiraf edir və çıxış yolunu Azərbaycanla münasibətlərin normallaşmasında görür. Lakin müxalifət bu prosesi pozmağa cəhd göstərir.
Ermənistan parlamentinin sədri Alen Simonyan isə bildirib ki, ölkədə parlament müxalifəti mövcud deyil. Sadəcə, parlamentin növbəti çağırışında özlərinə yer tapmaq üçün digər siyasi qüvvələrin sıralarında yer axtaran müəyyən şəxslər var. Onları heç kim dinləmir, küçədə isə yeddi nəfəri belə toplaya bilməzlər.
"Hraparak" nəşri "Tarixi" qərar elan olunacaq" başlıqlı məqaləsində yazıb ki, konstitusiya dəyişiklikləri üzrə Şura ötəngünkü iclasında seçki sisteminin ən çox tənqid olunan müddəasından imtina etməyə qərar verib: "Əgər parlament seçkilərinin birinci turunda sabit çoxluq formalaşmırsa, siyasi qüvvələr də koalisiya yaratmaq barədə razılığa gəlmirlərsə, ikinci tur keçirilir və orada ən çox səs toplamış iki qüvvə iştirak edir".
Nəşrə görə, Şuranın bu qərarı ötən gün müxalifətçi siyasətçilərin iştirakı olmadan qəbul olunub: "Gözlənilir ki, tezliklə hakimiyyət və onların tərəfdarları bu müddəadan imtinanı gurultulu şəkildə "tarixi qərar" kimi təqdim edəcəklər, çünki onun mahiyyəti məcburi qaydada sabit çoxluq formalaşdırmaq idi. İndi bu müddəa ləğv olunur, amma onun nə ilə əvəzlənəcəyi aydın deyil".
Qeyd edilib ki, dəyişikliklərin konsepsiyasında hökumətin formalaşmaması ilə bağlı 3 variant nəzərdə tutulur: "Birinci variant - Ermənistan prezidentinə səlahiyyət verilir ki, "azlıq hökuməti" formalaşdırsın, parlamenti buraxsın və ən çox deputat qrupu olan fraksiyaya baş nazir təklif etmək imkanı versin. Təbii ki, Paşinyan reytinqə malik olmasa da, inzibati resurs hesabına önə çıxacaq. İkinci variant - İrəvan meri seçkilərinin modeli tətbiq olunur: ən çox səs toplayan qüvvənin nümayəndəsi baş nazir olur, bu halda da azlıq hökuməti yaranacaq. Qismən hakimiyyətə sərf etməyən üçüncü variant isə azlıq hökumətini istisna edir. Bu halda parlament hüquqi qüvvə ilə o vaxta qədər buraxılacaq ki, hər hansı qüvvə çoxluq əldə etsin və ya koalisiya yaratsın. Bu da təhlükəlidir. Çünki kollektiv məsuliyyətsizlik vəziyyəti yaranacaq. Bununla belə, hətta yeni konstitusiya layihəsi bu şəkildə qəbul edilsə də, qarşıdakı 2026-cı il seçkilərinə bu dəyişikliklər şamil olunmayacaq".
Hər halda baş verənlər Ermənistanı qarşıdakı dövrdə mürəkkəb proseslər gözlədiyini göstərir.
Elçin CƏFƏROV,
"Azərbaycan"
