Ermənistanı idarə edən şəxslər ölkədə korrupsiya və rüşvət sistemini daim genişləndirmələri ilə seçiliblər.  İndi ölkədə elə bir yüksəkçinli məmur yoxdur ki, şəxsi biznesi olmasın, yaxud da vəzifədə olarkən hansısa yollarla böyük sərvət toplamasın. Ölkədə milli sərvətlərin yarıdan çoxu mütəmadi və sistematik şəkildə məmurlar tərəfindən oğurlanmaqdadır. 

Bu arada bəlli olub ki, 2023-cü ilin sentyabrında Ermənistan Xarici İşlər Nazirliyinə büdcədən ölkənin Londondakı səfirliyi üçün xidməti bina almaq məqsədilə 16 milyon 670 min 800 funt-sterlinq məbləğində vəsait ayrılıb.

İrəvanda binanın alınması prosesi kəskin tənqid olunub. Siyasi şərhçi İşxan Saruksyan qeyd edib ki, Qarabağ müharibəsində məğlubiyyətdən sonra Ermənistan-Azərbaycan sərhədinin çox ciddi təchizat və möhkəmləndirmə işlərinə ehtiyacı var, bunun üçün külli miqdarda vəsait lazımdır. Hökumət dövlət sərhədini təchiz etmək əvəzinə, büdcə pulunu Ermənistanın İngiltərədəki səfirliyinin binasının alınmasına sərf etmək qərarına gəlib. Hələ bu azmış kimi vurğulanır ki, Fransanın paytaxtı Parisdə ölkənin 3-cü prezidentinə  məxsus tarixi dəyərə malik bina var. Ermənistanın Fransadakı səfirliyinin uzun sürən danışıqları nəticəsində satıcı binanı 23 milyon avroya Ermənistan hökumətinə satmağa razılaşıb. 

Statistik məlumatlar və Ermənistan mediasında yayımlanan faktlarda ölkədə əhalinin 50 faizinin yoxsulluq həddə yaşadığı, həmçinin şəxsi mənzilinin olmaması qeyd edilir. Ermənistan mediasında yer alan məlumatlara görə, erməni xalqının acınacaqlı yaşayış vəziyyətində olduğu halda Paşinyan müxtəlif yollarla zənginləşmək cəhdlərindən əl çəkmir. London və Fransada səfirlik binalarına pul xərcələmək adı altında milyonlar ölkədən çıxarılaraq mənimsənilir. 

Bu arada Ermənistan İstintaq Komitəsinin rəhbəri Argişti Kyaramyan parlamentdə Paşinyanın partiyasının üzvlərinin qanunsuzluqlarını üzə çıxardıqdan sonra hakimiyyətin hədəfinə düşüb. "ArmLur.am" nəşri yazıb ki, Paşinyanın fraksiyasının "rədd edilmiş" deputatı Arpi Davoyan Ermənistan parlamentində keçiriləcək kollegiya iclasında Nikol Paşinyanın iştirakı ilə Kyaramyanın davranışını müzakirəyə çıxarmağı təklif edib. Qeyd edilib ki, Kyaramyanın cəsarətli açıqlamaları və bəyanatları Paşinyanın partiyasının üzvlərini qəzəbləndirib. 

İstintaq Komitəsinin sədri isə iqtidar deputatlarının təzyiqindən sonra bildirib: "Ölkədə elə bir adam yoxdur ki, mənim dediklərimlə bağlı replika ata bilsin".  O, sonra qeyd edib ki, Hovik Ağazaryanın oğlunun avtomobilləri işi üzrə ona zəng ediblər. "Mənə niyə zəng edirlər? Siz korrupsiyaya qarşı mübarizədən danışırsınız", - deyə Kyaramyan bildirib. 

Hakim fraksiyanın deputatı Arpi Davoyan hesab edir ki, Kyaramyan Ermənistanda kriminal vəziyyətlə bağlı Andranik Koçaryanın təşəbbüsü ilə keçirilən müzakirəni uğursuz edib. "Məlumata görə, hakim partiyanın üzvləri Kyaramyana da Qriqor Minasyanın taleyini yaşatmaq niyyətindədirlər və tezliklə İstintaq Komitəsi rəhbərinin istefaya göndərilməsi tələbi ilə yeni proses başlayacaq. Yaxud o həddə çatdıracaqlar ki, Kyaramyanın özü işdən çıxmaq üçün ərizə yazacaq", - deyə nəşr bildirib.

Bunlar hələ harasıdır. Ermənistan ən çox korrupsiyalaşmış ölkələr sırasında qalmaqda davam edir. Beynəlxalq təşkilatların bu ölkədə korrupsiya faktları ilə bağlı hesabatında bildirilir ki, korrupsiya ilə mübarizə tədbirləri hələ də kağız üzərindən əməli işə keçməyib. Qeyd olunur ki, vergi ödəyiciləri arasında keçirilən rəy sorğusu da bunu təsdiqləyir. Sahibkarlıqla məşğul olmaq istəyənlər külli miqdarda rüşvət ödədiklərini deyirlər. Onların Paşinyan hökumətinə inamı yoxdur. Ölkədə toplanan verginin korrupsiyaya qurşanmış rəsmilər və məmurlar tərəfindən mənimsənilməsi ilə bağlı çoxsaylı faktlar var. Rəyi soruşulanlar vergi qanunlarının vergi ödəyicisi olan iş adamlarına eyni dərəcədə tətbiq olunmadığını qeyd edirlər. Bildirilir ki, hazırda hakimiyyətdə olan qüvvələrin Ermənistanda bir neçə onillikdə mövcud olmuş diktaturaya son qoyulduğunu iddia etmələrinə baxmayaraq, ölkədə totalitar rejim hökm sürür və hakimiyyət yalnız özünə yaxın müəyyən çevrələrə dəstək verir. 

Baş nazir N.Paşinyanın öz siyasi rəqiblərini təqib etdiyini bildirən media portalları onun həyat yoldaşı Anna Akopyanın qeyri-qanuni kommersiya fəaliyyəti ilə də məşğul olmasına dair çoxsaylı məlumatların yayıldığını qeyd edirlər.

Bütün bunlar Hayastanı kifayət qədər narahat günlər gözlədiyindən, ölkənin üzləşdiyi ümumi böhranın daha da dərinləşəcəyindən xəbər verir.

Elçin CƏFƏROV,

"Azərbaycan"