Lakin Parisin müstəmləkə altında saxlamaq istədiyi ölkələrin xalqları artıq oyanıblar və öz haqlarını tələb edirlər

"Fransanın müstəmləkəçilik siyasəti XIX və XX əsrlərdə geniş coğrafiyada, xüsusən Afrika, Asiya və Karib dənizində aktiv olaraq tətbiq edilib. Bu siyasət iqtisadi, siyasi və mədəni təsirlərlə yanaşı, yerli xalqlara qarşı ciddi insan haqları pozuntuları ilə də müşayiət olunub".

Bu sözləri "Azərbaycan" qəzetinə Milli Məclisin deputatı Azər Badamov deyib. O bildirib ki, fransız müstəmləkəçiliyi mədəni assimilyasiya ideyası ilə yanaşı, resursların istismarı və yerli əhalinin hüquqlarının tanınmaması ilə də xarakterizə olunub. Bu siyasət müstəmləkə ölkələrində siyasi etirazlara, hərəkatlara və münaqişələrə səbəb olub. Fransanın müstəmləkə altında saxlamaq istədiyi ölkələrin xalqları artıq oyanıblar və öz haqlarını tələb edirlər. Artıq Fransa Afrika ölkələrindən biabırcasına qovulub, amma dənizaşırı ölkələrdə öz dominantlığını qorumağa çalışır. "Hesab edirəm ki, həmin ölkələrin xalqları da öz azadlıqlarına və hüquqlarına nail ola biləcəklər. Çünki XXI əsrdə müstəmləkəçiliyin və köləliyin davam etdirilməsi qəbulolunmazdır. Amma Fransa dövləti qara səhifəsini bağlamaq əvəzinə, öz hüquq və azadlıqları uğrunda mübarizə aparan aktivistləri, siyasi fəalları  həbs edir, işgəncələrə məruz qoyur və vətəndaşlıqdan çıxarır. Öz xalqının hüquqları uğrunda mübarizə aparan belə aktivistlərdən olan nigeriyalı Kema Sebanın Parisdə polislər tərəfindən saxlanılması da Fransanın belə addımlarından biridir.  Keba Seba Fransanın müstəmləkəçilik siyasətinin əsas tənqidçilərindən biridir. O, Fransanın Afrika və dənizaşırı ölkələrə vurduğu ziyanı, insanları köləlikdə saxlamasını, yerli xalqların milli sərvətlərini taladığını və hüquqlarını ciddi şəkildə tapdalamaqda davam etməsini dəfələrlə tənqid edib. Keba Seba Bakı Təşəbbüs Qrupunun Afrikada təşkil etdiyi Fransanın müstəmləkəçilik siyasətinə həsr olunmuş beynəlxalq konfransda iştirak edərək fikirlərini ifadə edib. Təbii ki, onun bu hərəkətləri Fransanı qıcıqlandırır", - deyə deputat əlavə edib.

Siyasətçi qeyd edib ki, oktyabrın 15-də onun Parisdə saxlanılması Fransanın çirkin əmələrindən əl çəkmək istəmədiyinin göstəricidir. Fransa dənizaşırı xalqları müstəmləkəçilikdə saxlayaraq, hüquqlar vermədiyi halda, özünü dünyada sanki demokratiya carçısı kimi təqdim etməyə çalışır, o cümlədən Afrika ölkələrindən qovulduğuna görə onun əvəzini Cənubi Qafqaza yerləşməklə çıxarmağa çalışır. Məhz Makronun çirkin planının tərkib hissələrindən biri də Ermənistanı silahlandırması və Azərbaycana qarşı qərəzli siyasətini davam etdirməsidir. 

A.Badamov bildirib ki, Fransa Cənubi Qafqazda yenidən gərginlik yaratmaq əvəzinə, özünün ləkəli tarixinin problemlərinin həlli ilə məşğul olsa yaxşıdır: "Bu baxımdan Keba Sebanın həbs olunması məsələnin həlli yolu deyil. Fransa müstəmləkəçilik siyasətindən əl çəkməli və yeni münaqişə ocaqlarını yaratmaq siyasətini dayandırmalıdır".

Ə.QARDAŞXANOVA,

"Azərbaycan"