"Son dövrdə ümumilikdə Azərbaycan-Ermənistan sülh prosesində müsbət dinamika müşahidə edilir. Həm Azərbaycan, həm də Ermənistan rəsmilərinin verdiyi açıqlamalardan da aydın olur ki, sülh sazişi layihəsinin artıq böyük hissəsi razılaşdırılıb".
Bu sözləri "Azərbaycan" qəzetinə Beynəlxalq Münasibətlərin Təhlili Mərkəzinin aparıcı məsləhətçisi Mətin Məmmədli deyib. Siyasi təhlilçi qeyd edib ki, bununla yanaşı, razılaşdırılmayan bəzi ciddi məsələlər də qalmaqdadır. Bu məsələlərə görə Ermənistanla sülh müqaviləsini və ya çərçivə sənədini imzalamaq hələ də mümkün deyil.
Ekspert yaxın perspektivdə sülh prosesi ilə bağlı müsbət mənada ciddi dəyişikliklərin olacağı qənaətində deyil. Onun sözlərinə görə, Ermənistan danışıqlar prosesində yenə ənənəsinə sadiq qalaraq ziddiyyətli mövqe nümayiş etdirir: "Azərbaycanın sülh layihəsi ilə bağlı müəyyən konkret tələbləri var. Bu da ondan ibarətdir ki, Ermənistan Azərbaycana qarşı özündə ərazi iddialarını ehtiva edən qanunvericilik sənədlərində, konstitusiyasında dəyişiklik etməlidir. Ancaq Ermənistan müxtəlif bəhanələrlə bu məsələdən yayınır, qeyri-müəyyən açıqlamalar verir. Belə görünür ki, Ermənistan sülh müqaviləsinə mane olan əsas məsələni yaxın zamanda həll etmək niyyətində deyil. Bu isə iki ölkə arasında aparılan danışıqlarda başlıca problemdir. Eyni zamanda digər vacib məsələlər də var".
M.Məmmədli qeyd edib ki, Ermənistanın Fransa, ABŞ, Hindistan və digər dövlətlərdən öldürücü silahlar alması, bu ölkələrlə hərbi əməkdaşlığını dərinləşdirməsi, dövlət büdcəsindən hərbiyə maliyyə vəsaitini artırması onun niyyətini göstərir. Vaxtilə Azərbaycan torpaqlarını işğal etmiş, təcavüzkar dövlət olan Ermənistanın intensiv silahlanması bütövlükdə sülh prosesinə mənfi təsir göstərir. Sülhə əngəl olan daha bir amil isə Ermənistanı himayə edən bəzi dövlətlərin, güc mərkəzlərinin, erməni lobbi və diasporunun Azərbaycana qarşı beynəlxalq müstəvidə apardığı qarayaxma kampaniyasıdır. "Xüsusilə COP29 tədbiri ərəfəsində ölkəmizə qarşı aparılan bu kampaniya intensivləşib. Bu da iki ölkə arasında sülh prosesinə olduqca mənfi təsir göstərir. Bütün bunları nəzərə alanda, yaxın zamanda Azərbaycan və Ermənistan arasında sülh müqaviləsinin imzalanması ehtimalı təəssüf ki, yoxdur. Ermənistanın belə mövqe nümayiş etdirdiyi şəraitdə bu ölkə ilə sülh sazişini imzalamağı gözləmək mümkün deyil", - deyə ekspert əlavə edib.
Siyasi təhlilçi vurğulayıb ki, Azərbaycan Cənubi Qafqazda davamlı sülhün olmasında, ölkələr arasında münasibətlərin normallaşmasında, kommunikasiya xətlərinin açılmasında, iqtisadi əlaqələrin yaranmasında və inkişaf etdirilməsində maraqlıdır. Azərbaycan bütün problemlərə, regiondaxili və regiondankənar təsirlərə baxmayaraq, bugünə qədər həyata keçirdiyi müstəqil siyasəti bundan sonra da davam etdirəcək.
Əsmər QABİLQIZI,
"Azərbaycan"
