Cari ilin yanvar-noyabr aylarında ölkə üzrə qeyri-neft-qaz sənaye məhsullarının istehsalı 4,8 faiz artıb. Ümumilikdə 11 ay ərzində 57,5 milyard manatlıq sənaye məhsulları istehsal edilib.
Dövlət Statistika Komitəsindən verilən məlumata görə, sənaye məhsullarının 60,6 faizi mədənçıxarma, 33 faizi emal, 5,4 faizi elektrik enerjisi, qaz və buxar istehsalı, bölüşdürülməsi və təchizatı, 1 faizi su təchizatı, tullantıların təmizlənməsi və emalı sektorlarında istehsal olunub.
Mədənçıxarma sektorunda əmtəəlik neft hasilatı 4,7 faiz azalıb, əmtəəlik qaz hasilatı isə 1,1 faiz artıb.
Emal sektorunda əczaçılıq məhsullarının istehsalı 94,9, ağacın emalı və ağacdan məmulatların istehsalı 60,9, kompüter, elektron və optik məhsulların istehsalı 49,9, toxuculuq sənayesi məhsullarının istehsalı 27,1, rezin və plastik kütlə məmulatlarının istehsalı 13,7, tütün məmulatlarının istehsalı 13,2, qida məhsullarının istehsalı 9,8, neft məhsullarının istehsalı 9,6, kimya sənayesi məhsullarının istehsalı 8,7 faiz artıb. Bununla yanaşı, içkilərin istehsalı 1,6, tikinti materiallarının istehsalı 3,4, maşın və avadanlıqların quraşdırılması və təmiri işləri 4,3, metallurgiya sənayesi məhsullarının istehsalı 8,6, maşın və avadanlıqların istehsalı 8,7, hazır metal məmulatlarının istehsalı 9,7, mebel istehsalı 10, elektrik avadanlıqlarının istehsalı 11,2, poliqrafiya məhsullarının istehsalı 18,7, dəri və dəri məmulatlarının, ayaqqabıların istehsalı 19,9, geyim istehsalı 20, kağız və karton istehsalı 26,2, avtomobil, qoşqu və yarımqoşquların istehsalı 33,9 faiz azalıb.
Hesabat dövründə sənayedə qeyri-dövlət sektorunun payı 82,2 faiz olub. İstehsalın ümumi həcmində sənaye məhsullarının çəkisi 88,8, sənaye xarakterli xidmətlərin göstərilməsi 11,2 faiz təşkil edib.
Cari ilin 11 ayında Naxçıvan Muxtar Respublikasında 441 milyon 468 min manatlıq sənaye məhsulları istehsal edilib ki, bu da 2024-cü ilin müvafiq dövründəkindən 14,1 faiz çoxdur. Bakıda isə 10 ayda 43 milyard manatlığa yaxın sənaye məhsulları istehsal edilib. Bu dövrdə paytaxtda istehsal olunan sənaye məhsullarının 73 faizi mədənçıxarma, 23,5 faizi emal, 2,6 faizi elektrik enerjisi, qaz və buxar istehsalı, bölüşdürülməsi və təchizatı, 0,9 faizi su təchizatı, tullantıların təmizlənməsi və emalı sektorlarının payına düşüb.
Rüstəm KAMAL,
"Azərbaycan"
