"Oktyabrın 26-da Gürcüstanda parlament seçkilərinin keçirilməsi nəzərdə tutulur. Əvvəlki seçkilərdən fərqli olaraq bu dəfə tam proporsional seçki sistemi olacaq. Bu da o deməkdir ki, hər bir partiya parlamentdə yer tuta bilər". 

Bu sözləri "Azərbaycan" qəzetinə Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev deyib. Deputat bildirib ki, parlamentə keçmək üçün 5 faizlik baryeri aşmaq lazımdır. Bir neçə partiya arasında rəqabət getməkdədir.

"Gürcü Arzusu" partiyasının bir sıra üstünlükləri var. Bunlar  hakim partiya statusu daşıması, maliyyə administrativ resurslarına malik olmasıdır. Vaxtilə Saakaşvilinin rəhbərlik etdiyi Birlik Milli Hərəkat Partiyası da seçkilərdə iddia ilə çıxış edir. 2003-cü ildən 2012-ci ilə qədər iqtidarda olan bu partiyanın güclü tərəfi keçmişdə iqtidar  partiyası olmasıdır. Zəif tərəfi isə vahid proqramının yoxluğu, hələ də yeni lider axtarışında olmasıdır. "Ümumiyyətlə, parlamentə düşməyə iddialı, həm milli dəyərlərə söykənən, həm də Qərbyönümlü partiyalar çoxdur. Hər bir partiya Gürcüstanın ərazi bütövlüyünü düşünür ki, ən mühüm məsələ də budur. Qərbin təsirindən asılı olmayaraq, əsas məsələ Gürcüstanın ərazi bütövlüyünün bərpa edilməsidir. Sonda seçim gürcü xalqının özünə aiddir", - deyə komitə sədri bildirib. 

A.Nağıyev qeyd edib ki, ABŞ-nin, Qərbin apardığı siyasət təkcə Gürcüstana aid deyil, bəzi coğrafiyaları da əhatə edir. Onlar bu yolla Cənubi Qafqazda mövqe tutmaq istəyirlər. Buna görə də bir sıra dövlətlərdən istifadə etməyə cəhd göstərirlər. Artıq Ermənistanı öz təsirləri altına salıblar. Çünki Ermənistanın müstəqil daxili və xarici siyasəti yoxdur, o, diktə altında işləyir. Qərb Gürcüstana da təzyiq göstərməklə, onun vasitəsilə regionda nüfuzlarını qaldırmağa çalışır. 

Gürcüstanın stratejiəhəmiyyətli dövlət olduğunu deyən komitə sədri bildirib ki, həm limanlarının mövcudluğuna görə fərqlənən, həm də beynəlxalqsəviyyəli kəmərlərin, digər makrolayihələrin Gürcüstan vasitəsilə həyata keçirilməsi ona olan marağı artırır.

Arzu Nağıyev vurğulayıb ki, Azərbaycanın Gürcüstanla geniş əlaqələri var: "Gürcüstan həm tərəfdaşımız, həm də dost ölkədir. Bu gün Gürcüstanın ən böyük vergi ödəyicisi SOCAR-dır. Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars kəmərləri, eyni zamanda yeni infrastrukturlarda Azərbaycan şirkətlərinin çalışması regionun inkişafına mühüm töhfələr verir. Orta dəhlizin işləməsi, logistik daşımalar və gələcəkdə Zəngəzur dəhlizi vasitəsilə daşımaların bir hissəsinin Gürcüstan limanları ilə baş tutması planlaşdırılır. Yəni iki ölkə arasında əlaqələr həm iqtisadi, həm siyasi, hətta hərbi sahədədir. Birgə hərbi təlimlər də böyük əhəmiyyət kəsb edir". 

A.Nağıyev bildirib ki, Gürcüstan Azərbaycan üçün mühüm strateji tərəfdaşdır. İki ölkə arasında əlaqələrin inkişafı regionun tərəqqisinə xidmət edir.

Əsmər QARDAŞXANOVA,

"Azərbaycan"