İlham Əliyev: "Ermənistan təhlükəli oyunlara qoşulub və İkinci Qarabağ müharibəsinin tarixçəsi onların yadından çıxmasın"
Həqiqət həmişə sadə və aydın olur!
O qədər sadə və aydın ki, kiminsə onu görməyəcəyinə və dərk etməyəcəyinə inana bilmirsən!
Oyunbazlıqlar isə süni şəkildə yaradılır.
Kifayət qədər biliyi və təcrübəsi olmayanlar qurulan oyunların mahiyyətini dərhal anlamağı bacarmırlar.
Amma hər şeyin zamana ehtiyacı olur.
Sonda üstü açılmayan və "müəllifləri" faş olmayan oyunlar qalmır.
"Dağlıq Qarabağ problemi" də bir oyun, Qərbin, dünya güclərinin yaratdıqları "beynəlxalq layihə" idi.
İki əsr davam etdi!
Sonda həqiqət yalana, ağıl hiyləyə üstün gəldi, "dəmir yumruq" isə bütün oyunbazlıqlara nöqtə qoydu!
Doğrudur, çətin sınaqlardan çıxdıq, böyük əziyyət və məşəqqətlər yaşadıq, Vətən övladlarını şəhid verdik, dözdük, gözlədik, gücləndik, möhtəşəm ordu yaratdıq, milli birliyə nail olduq, rəhbərimizin ətrafında birləşərək şərə qalib gəldik, torpaqlarımızı işğaldan azad etdik, şəhidlərimizin qisasını aldıq, düşmənlərimizi və onların havadarlarını biabırçı məğlubiyyətə uğratdıq, milli mənliyimizi geriyə qaytardıq!
İndi isə viran qoyulmuş yurdumuzu yenidən tikib-quraraq, əsl sahiblərini geriyə, doğma obalarına qaytarmaqla məşğuluq!
Amma oyunlar və oyunbazlıqlar hələ də davam edir!
Kimlərsə nəyəsə ümid edirlər, bizi daim sınağa çəkirlər.
Başına gələn başmaqçı olar demişlər.
Biz bütün sınaqlardan qalibiyyətlə çıxmağa daim hazırıq!
Qüdrətli dövlətimiz, güclü ordumuz, müdrik rəhbərimiz və sarsılmaz birliyimiz var!
***
"Qarabağ problemi" dünya gücləri tərəfindən türk dövlətlərinin birliyini pozmaq və birbaşa əlaqələrini qırmaq üçün yaradılan beynəlxalq layihə idi.
Bu layihənin "ideya müəllifi" və maliyyəçisi dünya erməniliyi, onun ABŞ, Fransa və Rusiyadakı güclü erməni diasporudur.
Adıçəkilən dövlətlərin, habelə Avropa İttifaqı və Avropa Şurasının müxtəlif ölkələrdən olan siyasətçiləri, parlament üzvləri, QHT-ləri erməni sifarişləri əsasında Azərbaycana qarşı bir sıra istiqamətlərdə mübarizə aparırlar.
Bu mübarizədə, əslində, hibrid müharibədə şər-böhtan, qaralama, dezinformasiya, feyk xəbərlər, habelə "insan haqlarının pozulması" kimi gülünc ittihamlar və digərləri yer tutur.
Lakin dərinə vardıqda bütün bunların bir mərkəzdən idarə olunan oyunbazlıqlardan başqa bir şey olmadığı görünür.
"Böyük Ermənistan" xülyasına hesablanan bu layihənin 1988-ci ildən aktivləşdirilməsi dünyada, o cümlədən keçmiş SSRİ-də baş verən proseslərlə bağlı idi.
Dünya erməniliyi yeni imkandan yararlanmaqla Azərbaycandan yenidən torpaq qoparmaq iştahasına düşmüşdü.
O vaxtdan indiyədək baş verən bir sıra mühüm hadisələrə və onların doğurduqları nəticələrə birlikdə diqqət yetirək.
***
"Sorosçu" baş nazir Paşinyan içib keflənərək, əslində, əmin olduğu həqiqəti dilə gətirdi: "Qarabağ Ermənistandır və nöqtə".
Paşinyan əsl siyasətçi və diplomat olmadığına görə açıq şəkildə və ucadan deyilməsi düzgün olmayanı ictimai formada dilə gətirmişdi.
Onsuz da hamı görürdü ki, "pərdələnmiş" formada böyük oyunlar gedir...
BMT dünyanın ən böyük və nüfuzlu qurumu sayılır.
Keçmiş Ermənistan-Azərbaycan Dağlıq Qarabağ münaqişəsi ilə bağlı bu təşkilat dörd qətnamə qəbul etmişdi və həmin qətnamələrdə Ermənistana məxsus silahlı birləşmələrin Azərbaycan ərazilərindən qeyd-şərtsiz çıxarılması tələb olunurdu!
Elə hallar olub ki, BMT-nin qərarı mürəkkəbi qurumamış icra edilib.
Dörd qətnamə icra olundumu?
YOX!
Niyə? BMT-nin buna gücü çatmadı?
YOX!
Heç öz qətnamələrinin icrasına real təşəbbüs belə göstərmədi!
Halbuki BMT daxil olmaqla bütün dünya bilirdi ki, Qarabağ Azərbaycan torpağıdır və heç kim, içi Ermənistanqarışıq, qondarma "dqr"-i tanımamışdı!
1992-ci ilin yazında Qarabağ münaqişəsinin həlli üçün ATƏT-in Minsk qrupu yaradıldı və qurumun tərkibinə dünyanın doqquz nüfuzlu ölkəsi daxil edildi.
ATƏT-in həmsədrlik institutu isə Rusiya, ABŞ və Fransadan ibarət oldu.
Otuz ilədək müddətdə sülh müqaviləsi bağlanması üçün yaradılan bu qurum gəldi, getdi, danışdı, bəyanat və açıqlamalar verdi, sülh müqaviləsinin maddələrini müzakirə etdi...
Real nəticəyə nail olmadı, çünki həmsədrlərin heç biri bunu istəmirdi, sadəcə, görüntü yaradırdılar.
Çünki əsl məqsəd ərazi işğalını əbədiliyə çevirmək, Azərbaycanı bununla barışdırmaq və Ermənistanın ərazisinə yeni torpaqlar qataraq onu genişləndirmək idi.
ATƏT-in Minsk qrupu Ermənistan SSR Ali Sovetinin və Dağlıq Qarabağın "Milli Şurası"nın "Ermənistan SSR-lə Dağlıq Qarabağın birləşdirilməsi haqqında" 1 dekabr 1989-cu il tarixli qərarını ləğv etdimi?
YOX!
Ermənistan hərbi birləşmələrinin Azərbaycan ərazisindən çıxarılmasını təmin etdimi?
YOX!
Tərəfləri ədalətli sülhə gətirdimi?
YOX!
Tərəfsiz, qərəzsiz oldumu?
YOX!
ATƏT öz səlahiyyətlərindən istifadə edərək Ermənistana hər hansı formada təsir, təzyiq göstərdimi, sanksiya tətbiq etdimi və ya bir dəfə bunu xatırlatdımı?
Yox!
Bu gün "arxaik əşya"ya çevrilən ATƏT-in Minsk qrupu buraxılmalıdır, özü də Ermənistan da bunun dəstəkçisi olmalıdır!
Bu, Müzəffər Ali Baş Komandan İlham Əliyevin şərtlərindəndir!
***
Otuz il doğma yurd-yuvasından qovulan, bütün varidatı talanan, qaçqın şəhərciklərinin sakinlərinə çevrilərək məşəqqətli ömür sürmək məcburiyyətində qalan azərbaycanlı məcburi köçkünlərin harayına beynəlxalq qurum və təşkilatlar, ABŞ və Fransanın senator, konqresmen və siyasətçiləri çatdılarmı, hallarına yanaraq qayğılarına qaldılarmı?
YOX!
Avropa İttifaqı, Avropa Şurası azərbaycanlı məcburi köçkünlərin insan haqlarını təkid və inadla qorudumu?
YOX!
Ermənistan Azərbaycanın yaşayış məntəqələrini dağıdaraq viran qoyanda, təbii sərvətlərimizi talayanda, mədəni, dini, tarixi abidələrimizi yerlə yeksan edəndə bu əməlləri müzakirələrə çıxardılarmı, erməni vandallarını qınadılarmı, vəhşiliklərini pislədilərmi?
YOX!
1915-ci ildə guya baş vermiş "erməni soyqırımı"nı xatırladan, nəhayət, Bayden tərəfindən "soyqırımı" ifadəsi işlədilən ABŞ prezidentləri bircə dəfə Xocalı soyqırımını dillərinə gətirdilərmi?
YOX!
***
Özünü dünyada demokratiyanın və insan haqlarının qoruyucusu kimi aparan ABŞ, əslində, ikili standartların yaradıldığı və qorunduğu məkandır.
ABŞ Konqresi isə erməni diasporunun anti-Azərbaycan fəaliyyətinin mərkəzinə və ruhvericisinə çevrilib.
Ötən ay Konqresdə "Dağlıq Qarabağın süqutundan sonra Azərbaycanda insan haqları" adlı dinləmə keçirilmişdir.
Dinləmələrdə "Artsax" respublikasının ombudsmanı" adlı birisi - Geqam Stepanyan da iştirak etmişdir.
Görəsən, otuz il Qarabağdan zorakılıqla qovulan azərbaycanlıların pozulmuş hüquqlarını bir dəfə xatırlamayan ABŞ-nin konqresmenləri erməniəsilli, Ermənistan vətəndaşlığı pasportunu daşıyan hayların könüllü şəkildə Qarabağı tərk etmələrindən niyə belə dərin narahatlıq hissi keçirirlər?
Onların geri qaytarılması barədə ağzı köpüklənə-köpüklənə danışarkən niyə otuz il əvvəl zorakılıqla doğma torpaqlarından qovulan qərbi azərbaycanlıların da qaytarılması barədə bircə kəlmə belə söz demirlər?
Məgər insan haqları azərbaycanlılara şamil edilmir?
Əslində, Quantanamo həbsxanasını saxlayan dövlətin heç insan haqlarından danışmağa mənəvi haqqı yoxdur!
Ədalət seçmə qaydasında tətbiq olunmamalıdır!
Beynəlxalq hüquq insanların yalnız bir qisminə münasibətdə işlədilməməlidir!
İnsan hüquqlarının müdafiəsində ayrı-seçkiliyə yol verilməməlidir!
Bəs bu ögey-doğmalıq nədir?
Qərəzkarlıqdan, bədxahlıqdan, yoxsa düşmənçilikdən doğan münasibətdir?!
Yoxsa ikili standartların bütün sahələrə nüfuz etmiş əlamətləridir?
***
Elə ki, 44 günlük Zəfər müharibəsi başladı, ABŞ-nin də, Fransanın da, Aİ-nin və AŞPA-nın da yadına möhkəm və ədalətli sülhün yaradılması düşdü...
Vəzifələri ikiəsrlik münaqişəni barışla yoluna qoymaq olan dövlətlər və təşkilatlar Azərbaycan Prezidentinə zəng edərək hərbi əməliyyatın dayandırılması barədə xahiş-minnətə başladılar...
NİYƏ?
Ona görə ki, Ermənistan bütün cəbhəboyu məğlub olurdu, böyük itkilərə məruz qalırdı?
Əgər Azərbaycan uduzaraq geri çəkilsəydi, onda Paşinyana zəng çalaraq müharibənin dayandırılmasını istəyərdilərmi?
İnanmırıq!
Bəlkə də sevinərdilər ki, Azərbaycana təzyiq etmək üçün əllərinə yeni imkan düşüb!
Müzəffər Ali Baş Komandan İlham Əliyevin qoyduğu şərtlər əsasında üçtərəfli Bəyanat imzalanaraq, II Qarabağ müharibəsi Azərbaycanın möhtəşəm qələbəsi ilə başa çatdı!
Bundan sonra daha iki dəfə uğurlu əməliyyat keçirilərək Azərbaycanın ərazi bütövlüyü və dövlət suverenliyi təmin edildi.
Azərbaycan Konstitusiyasını qəbul edərək Azərbaycanın qanunları əsasında yaşamaq istəməyən separatçılar və terrorçular, digər erməni əhalisi təhlükəsizlikləri təmin olunmaqla ölkəmizdən çıxıb, vətəndaşı olduqları dövlətə getdilər.
Beləliklə, ikiəsrlik Qarabağ münaqişəsinə birdəfəlik son qoyuldu!
Hazırkı mərhələdə Azərbaycanın irəli sürdüyü, beynəlxalq hüququn norma və prinsiplərinə cavab verən beş maddədən ibarət təkliflər əsasında sülh müqaviləsinin hazırlanması və imzalanması, sərhədlərin delimitasiya və demarkasiyası prosesi başlayıb.
Sülh danışıqlarında vasitəçilik etməkdən ötrü əldən-ayaqdan gedənlər çoxdur.
Amma onların heç biri ədalətli, obyektiv olmağa, Cənubi Qafqaza sülh və əmin-amanlıq gətirməyə can atmırlar.
Məqsədləri sülh danışıqlarında iştirak etməklə nəsə qazanmaq, Cənubi Qafqaza soxularaq öz maraqlarını təmin etməkdir!
Azərbaycan Prezidenti İlham Əliyev isə belə vasitəçilərin "köməyindən" istifadə etmək niyyətində deyil, məqsədi bu bölgədə möhkəm sülh və əməkdaşlıq yaranması, buradakı ölkələrin mövcud imkanlardan bərabər və ədalətli istifadə edə bilmələridir!
Təəssüf ki, açıq, qarşı-qarşıya döyüşdə məğlub olanların arxasındakılar bu gün "müharibə"ni konqreslərdə, senatlarda, parlament assambleyalarında davam etdirirlər.
Azərbaycan torpaqlarını işğaldan azad etdikdən sonra hərbi əməliyyatları dayandırdı, qalib tərəf olsa da, sülh təklifi ilə çıxış etdi.
Ermənistan isə kimlərəsə, nələrəsə güvənərək sülh müqaviləsini imzalamaqdan yayınır.
Azərbaycan Prezidentinə minnətçi düşənlər sülh müqaviləsinin tezliklə imzalanmasına səmimi kömək göstərmək əvəzinə Ermənistanı silahlandırır, darmadağın edilmiş ordusunun dirçəldilməsi üçün ona dayanmadan maliyyə dəstəyi göstərirlər.
Ərazi məsələləri iclaslarda həll olunmur!
Bunu ötən otuz ilin təcrübəsi də göstərdi!
Biz öz ərazimizi müharibə yolu ilə azad etdik!
Bunu da bütün dünya gördü!
İndi hansısa senatda, konqresdə, assambleyada kimsə nəsə danışmaqla heç nə dəyişməyəcəkdir!
Bölgədəki vəziyyəti, ab-havanı yalnız Azərbaycanın şərtləri əsasında bağlanan sülh müqaviləsi dəyişə bilər!
***
Otuz ildən çoxdur ki, Azərbaycanın qərb bölgələri ilə Naxçıvan arasında quru yolla əlaqə ermənilər tərəfindən kəsilib.
Nə qatar gedə bilir, nə də avtomobillər.
Hətta dəmiryol xəttini belə söküb dağıdıblar.
Nəticədə Azərbaycan öz ərazisinin bir hissəsinə gedib gələ bilmir.
Nə ərzaq, nə də digər yüklər daşınır.
Bir zaman Azərbaycan Laçın dəhlizini bağlayanda "humanitar fəlakət" deyib haray salan dövlətlər, beynəlxalq təşkilatlar, KİV-lər indi niyə özlərini lallığa və korluğa qoyaraq səslərini belə çıxarmırlar?
* Məgər bu, qeyri-humanist hərəkət deyil?
* Məgər bu, insan hüquqlarının pozulması deyil?
* Məgər bu, beynəlxalq hüququn tapdalanması deyil?
Niyə biz Ermənistanın Qarabağa göndərdiyi ərzaq TIR-larının yolunu dəyişəndə "dünya qopub-dağıldı", min bir oyunbazlıq başladı, amma ermənilər otuz ildir Naxçıvana gedən yolumuzu bağlı saxlasalar da, dinib danışan yoxdur!
Utanmasan oynamağa nə var ki...
***
Hər şey sadə və aydındır!
Ermənilər 1923-cü ildə sovet Rusiyasının iradəsi və qərarı ilə Azərbaycan ərazisində süni şəkildə yaradılan keçmiş DQVM-də separatizm hərəkatına başladılar.
SSRİ-nin birinci və sonuncu prezidenti M. Qorbaçov və ondan sonrakı dövrdə Moskva bu separatizmə müxtəlif formada dəstək verdi.
Həm də təkcə dəstəklə kifayətlənmədi, Azərbaycan ərazilərinin işğalında ermənilərin yardımçısına çevrildi, onlara silah və sursatla, hətta canlı qüvvə ilə kömək göstərərək 20 faiz torpaqlarımızın düşmənə verilməsinə şərait yaratdı.
Otuz il ərzində yaşayış məntəqələri viran qoyuldu, dini, tarixi, mədəniyyət abidələrimiz, hətta qəbristanlıqlarımız belə dağıdıldı, təbii sərvətlərimiz, şəxsi əmlakımız talan olunaraq oğurlandı...
Azərbaycan xalqı özündə güc tapdı, qüdrət tapdı, rəhbəri ətrafında sıx birləşərək işğala son qoydu, ərazi bütövlüyünü, dövlət suverenliyini bərpa etdi!
Diz çökdürülərək kapitulyasiya aktına imza atdırılan düşmən isə yenidən havadarlarına güvənərək sülhdən yayınmağa çalışır, revanşa hazırlaşır.
Bu dəfə ermənipərəstlər yenidən birləşərək Azərbaycana qarşı hibrid müharibəyə başlayıblar!
* ABŞ vasitəçilik iddiasında olsa da, Ermənistana durmadan maliyyə yardımları edir, silah göndərir, birgə təlimlər keçirir, hərbi arsenalının bərpasına çalışır.
* "Xristian evi" sayılan Avropa İttifaqı haylara təkcə maliyyə yardımı göstərməklə kifayətlənmir, "siyasi dəstək"də verir, Azərbaycana qarşı sistemli şər-böhtan kampaniyası təşkil edir.
* Otuz il torpaqlarımızı işğalda saxladılar!
* Otuz il ATƏT-in Minsk qrupu ilə imitasiya etdilər!
* Otuz il bütün beynəlxalq qurumlarda Ermənistanı müdafiə etdilər, onların işğalçı, talançı, quldur simalarını pərdələdilər!
Otuz il haylara silah verib maliyyələşdirdilər, onlarla əl-ələ verərək Azərbaycanın təbii sərvətlərini istismar etdilər!
Otuz il işğalı qanuniləşdirməyə, əbədilləşdirməyə çalışdılar!
SONRA NƏ OLDU?
Otuzillik oyunbazlığa Müzəffər Ali Baş Komandan İlham Əliyev 44 gündə hünər və cəsarətlə son qoydu!
İndi Qarabağda nə separatçı var, nə qondarma qurumlar, nə əldəqayırma parlament...
Azərbaycan İlham Əliyevin rəhbərliyi ilə bütün oyunlara da son qoydu!
Bütün bunlar köhnə və keçilmiş yoldur!
Nəticəsi də bəllidir: iflasa uğramış üsul və metodlardır!
Artıq Azərbaycanla oyunbazlıqlar keçmir!
Azərbaycan rəhbəri İlham Əliyev bütün hoqqa və oyunlara son qoymağı məharətlə bacarır!
Heç kəs Cənubi Qafqazı qarşıdurma və müharibə ocağına çevirə bilməyəcəkdir!
Azərbaycanın söz sahibi olduğu bu bölgə İlham Əliyevin istədiyi kimi, sülh və əməkdaşlıq məkanı olacaqdır!
Bəxtiyar SADIQOV
