İslam Əməkdaşlıq Təşkilatı (İƏT) Mədəniyyət Festivalı çərçivəsində zəngin yaradıcılıq ideyalarının necə uğurlu və dayanıqlı peşə fəaliyyətinə çevrilə biləcəyinə həsr olunan “Yaradıcı və mədəni sənayelərdə məşğulluq imkanları” adlı növbəti panel müzakirəsi keçirilib.
AZƏRTAC xəbər verir ki, panelin məqsədi yaradıcı insanların öz istedadlarını bazar dəyərinə çevirmə yollarını, onu peşəkar biznes modellərinə uyğunlaşdırma imkanlarını, eləcə də bu yolda qarşılaşdıqları çətinlikləri müzakirə etməkdən ibarət olub.
Müzakirədə moda, dizayn, zərgərlik, sənətkarlıq və sosial sahibkarlıq kimi müxtəlif sahələrdə uğur qazanmış yerli və xarici məruzəçilər iştirak ediblər. Onlar yaradıcı yanaşma ilə sahibkar düşüncəsinin vəhdətindən yaranmış uğurlu brendlərin formalaşma hekayələrini bölüşüblər.
“Azerbaijan socks” şirkətinin təsisçisi Tereza Qamlin bildirib ki, brendinin missiyası ənənəvi Azərbaycan sənətkarlığını sevgi ilə dünyaya tanıtmaqdır. O, regionlara səfərləri zamanı hər bölgəyə xas özünəməxsus corab naxışlarını toplayır və sənədləşdirir, çünki hər bölgənin öz rəsmi və “imzası” mövcuddur. Onun sözlərinə görə, xalçalardan fərqli olaraq corablar tez köhnəlir və atılır, bununla da unikal naxışlar da yox olur. Bu səbəbdən o, əsas işinin həmin naxışların qorunması olduğunu vurğulayıb.
“Resm Jewelry” zərgərlik şirkətinin təsisçisi Rasmina Qurbətova bildirib ki, kommunikasiya, korporativ idarəetmə və maliyyə infrastruktur sahələrində Dünya Bankında onillik fəaliyyətdən sonra o, əvvəlcədən düşünülmüş strategiyaya deyil, hər şeydən əvvəl həvəsə əsaslanaraq yaradıcı sənayeyə keçmək qərarı verib. Onun sözlərinə görə, brendin uğurlu başlanğıcında biznes, marketinq və kommunikasiya sahələrində topladığı təcrübə və bu biliklərin yaradıcı düşüncə ilə orqanik vəhdəti mühüm rol oynayıb.
“Muslim Agency”nin təsisçi direktoru Bilal Qassam da şəxsi təcrübəsini bölüşərək, həkimlikdən yaradıcı sənayelərə keçid yolundan qısa şəkildə danışıb. O qeyd edib ki, mədəniyyətin roluna dair araşdırmalar, şəxsi şirkətini qurmaq, ailəvi səyahətlər və incəsənətə dönüş onu bu gün təqdim etdiyi yaradıcı layihələrə gətirib çıxarıb. Həmin layihələrdən biri sərgidə nümayiş olunub.
Panel müzakirəsinin sonunda “Atelier Azure”un təsisçisi Türkan Məmmədova və İnvestisiya, İnnovasiya və Rəqəmsal İnkişaf Agentliyinin rəhbəri Ağahüseyn Əhmədov yaradıcı potensial, sahibkar yanaşması və sistemli dövlət dəstəyinin birləşməsinin Azərbaycanda mədəni və yaradıcı sənayelərin, həmçinin innovativ startapların inkişafı üçün əlverişli mühit formalaşdırdığını bildiriblər.
Müzakirə zamanı xüsusi diqqət aşağıdakı mövzulara yönəlib:
— Yaradıcılıqdan gəlirli biznesə gedən yol: ideyanın bazara çıxarılması, ilkin resursların idarə edilməsi, brendinq strategiyalarının işlənməsi;
— Qadın sahibkarların rolu: yaradıcı sektorun inkişafına qadınların töhfəsi, eləcə də öz brendlərini formalaşdırarkən üzləşdikləri sosial və iqtisadi çağırışlar;
— Dəyərlər üzərində qurulmuş biznes modeli: yaradıcı bizneslərin islam dəyərləri və sosial məsuliyyət prinsipləri əsasında qurulması;
— Yerli brendlərin qlobal bazara çıxışı: “Made in Azerbaijan” brendlərinin beynəlxalq arenada təşviqi və ixrac potensialının artırılması;
— İnnovasiya və əmək bazarının rolu: İƏT ölkələrinin əmək ekosistemində yaradıcı sahənin gələcəyin peşə istiqamətlərindən biri kimi inkişaf perspektivləri.
jpg_1767211798.jpg)
