Siyasi iflic, iqtisadi çöküş, dramatik sarsıntılar - bütün bunlar Qərbi Avropanı yaxın gələcəkdə gözləyir. Amerikanın Bloomberg Agentliyinin yeddi müəllifinin fikrincə, "bu qəddar dünyada Avropanın öz yerini qoruyub saxlamaq üçün, demək olar ki, vaxtı yoxdur".  

Aydın olur  ki, Avropa İttifaqı bütün cəbhələrdə zərbələrə məruz qalır. Bir çox ölkələrdə siyasi kursun kəskin dəyişməsini müdafiə edən və Brüsselin siyasətindən son dərəcə narazı olan sağ hərəkatlar güclənir. Avropa iqtisadiyyatının lokomotivi sayılan Almaniyada ən böyük fabriklər bağlanır. Bir çox sənaye sahələri Amerikaya köçürülür.

Brüsseldəki Azad Universitetinin professoru Quntram Volf  yaranmış acınacaqlı vəziyyətlə bağlı deyir: "Əgər siz geosiyasi güc olmaq istəyirsinizsə, bilməlisiniz ki, əsas rıçaq iqtisadiyyatın qüdrətidir". 

Alimin gəldiyi qənaətə əsasən, Avropada əmək məhsuldarlığı  iyirmi il əvvəlki illə müqayisədə, sadəcə olaraq, fəlakətli həddədir. Volf hesab edir ki, Avropa İttifaqı xarici çağırışlara cavab verə bilmir, getdikcə bürokratiya və daxili parçalanmalar içində boğulur.

Hətta qalmaqallı Fransa prezidenti Emmanuel Makron da bunu etiraf edir: "Əgər biz növbəti iki-üç ildə həmişəki kimi yaşamağa davam etsək, Aİ əsas oyunçulardan biri kimi beynəlxalq arenadan çıxacaq". 

Avropa Parlamentinin rəhbəri Roberta Metsola isə bildirib ki, blok genişlənərsə, Avropa İttifaqının mövcud iqtisadi modeli dağılacaq.

"Mövcud iqtisadi model 32 və ya 33 üzvlə tab gətirməyəcək, amma indi biz bunu müzakirə etməliyik, necə ki, artıq parlamentdə diskussiyalara başlamışıq", - deyə Metsola vurğulayıb. O, bəzi ölkələrə Aİ-yə tam üzvlükdən əvvəl də güzəştlər verməyi təklif edib. Məsələn, bir sıra ticarət maneələrini aradan qaldırmaq olar.

 Yunanıstanın maliyyə naziri Kostis Hatsidakisin bildirdiyinə görə, təcili tədbirlər görülməsə, eniş geridönməz olacaq.

 Bəs söhbət hansı hərəkətlərdən və tədbirlərdən gedir?

Bloomberg Agentliyi böhrandan belə bir çıxış yolunun olduğuna işarə edir: "Rusiya ilə ticarət əlaqələrini bərpa etmək..." 

Bildirilir ki, Aİ iqtisadiyyatı Rusiyanın enerji resurslarından imtina etdikdən və Moskvaya qarşı sanksiyalar tətbiq etdikdən sonra artıq yaxşı vəziyyətdə deyil. Üstəlik,  Ukrayna hər il ən azı 10 milyard subsidiya iddiasındadır. 

Politoloqların fikrincə, texniki baxımdan Avropa iqtisadiyyatı belə bir yükə tab gətirməyəcək.

Rizvan CƏFƏROV,

"Azərbaycan"