Azərbaycan Respublikasının İnsan hüquqları üzrə müvəkkili (ombudsman) Səbinə Əliyeva Özbəkistan Respublikasının İnsan Hüquqları üzrə Milli Mərkəzinin direktorunun birinci müavini Mirzatillo Tillabayev və Özbəkistan Elmlər Akademiyasının Dövlət və Hüquq İnstitutunun direktoru Murodjon Turqunov ilə görüşüb.
AZƏRTAC xəbər verir ki, görüşdə müvəkkil Azərbaycan ilə Özbəkistanın sıx dostluq və qardaşlıq münasibətlərinə malik olduğunu, müxtəlif sahələrdə, o cümlədən insan hüquq və azadlıqlarının müdafiəsi istiqamətində səmərəli əməkdaşlıq əlaqələrinin mövcudluğunu bildirib, işğaldan azad edilmiş Füzuli şəhərində Özbəkistan tərəfindən məktəbin inşa olunduğunu minnətdarlıq hissi ilə xatırladıb.
İnsan hüquq və azadlıqlarının müdafiəsi sahəsində həyata keçirdiyi fəaliyyəti barədə qonaqlara ətraflı məlumat verən ombudsman beynəlxalq qurumlarla əməkdaşlığa əhəmiyyət verildiyini, beynəlxalq təşkilatlar, eləcə də xarici ölkələrin ombudsman və milli insan hüquqları institutları ilə əlaqələrin mövcud olduğunu qeyd edib.
Bildirilib ki, “Azərbaycan Respublikasının İnsan hüquqları üzrə müvəkkili (ombudsman) haqqında” Konstitusiya Qanununa edilmiş dəyişikliklər sayəsində əlilliyi olan şəxslərin və uşaq hüquqlarının müdafiəsi, ayrı-seçkiliyin qarşısının alınması və digər sahələrdə mandatı genişlənib.
Ölkəmizin cari ildə COP29-a ev sahibliyi edəcəyini diqqətə çatdıran S.Əliyeva tədbirin yüksək səviyyədə təşkili istiqamətində hazırlıq işlərinin getdiyini, həmçinin ombudsman və milli insan hüquqları institutlarının Bakı Forumunun keçiriləcəyini söyləyib.
Ombudsman, eyni zamanda, Milli Preventiv Mexanizmin fəaliyyətindən bəhs edib, şəxslərin öz iradəsi ilə tərk edə bilmədikləri yerlərə başçəkmələrin həyata keçirildiyini, rəftar və saxlanma şəraitinin araşdırıldığını vurğulayıb.
Görüşdə qarşılıqlı maraq doğuran bir sıra digər məsələlər və gələcək əməkdaşlıq perspektivləri barədə də fikir mübadiləsi aparılıb.
