Ermənistan 2025-ci ildə də təşkilata üzvlüyünün dondurulmasını davam etdirəcək
Rusiyanın orbitindən uzaqlaşmaq, ərazisindəki rus hərbi bazalarını çıxarmaq Ermənistanın baş naziri Nikol Paşinyanın qarşısında duran prioritet məsələdir və nəyin bahasına olursa-olsun, bu tələbi reallaşdırmağa çalışır. Bu istiqamətdə növbəti addım 2025-ci ildə də Ermənistanın Kollektiv Təhlükəsizlik Müqaviləsi Təşkilatında (KTMT) iştirakının dondurulması qərarıdır. Belə qənaətə gəlmək olar ki, Paşinyan təşkilatı tərk etmək barədə Qərbin qoyduğu tələbi yerinə yetirməkdədir.
Bundan öncəki açıqlamalarında Ermənistan baş naziri bir çox problemlərin yaranmasında Rusiyanı günahkar hesab edərək deyib ki, Moskvanın hərbi mövcudluğu İrəvanın təhlükəsizliyinə təhdid yaradır.
"Əgər biz indi faktiki olaraq fəaliyyətimizi dondurmuşuqsa, məsələlər həllini tapmasa, de-yure də bunu edəcəyik" - deyən baş nazir konkret olaraq Moskvanı təxribata çəkməyə çalışır və müəyyən jestlərlə Kremli qıcıqlandırmağa cəhd edir. Deməli, rəsmi İrəvan çox açıq tezislərlə Rusiya ilə əməkdaşlığı mənasız sayır və ya bu birgə fəaliyyətdən birmənalı formada imtina edir. Bütün bunlar Avropa İttifaqının və Qərb institutlarının hazırladığı planauyğun şəkildə həyata keçirilir. Buna görə də, Paşinyan maksimum şəkildə diplomatik qaydada Moskva ilə münasibətlərinə son qoymaq üçün ölkəsinin təhlükəsizlik məsələlərinə diqqət çəkir.
Ermənistanın Xarici Kəşfiyyat Xidmətinin (XKX) regiondakı hərbi-siyasi vəziyyətə dair ilk hesabatında deyilir ki, İrəvanın Kollektiv Təhlükəsizlik Müqaviləsi Təşkilatında (KTMT) üzvlüyünün dondurulması prosesinin dayandırılması üçün əsas yoxdur. "Təsis müqaviləsinin müddəalarına baxmayaraq, KTMT-nin nizamnamə məqsədləri olan Cənubi Qafqazın problemlərinə cavab vermək qabiliyyətinin olmaması 2025-ci ildə çətin ki dəyişsin. Hesab edirik ki, Ermənistanın KTMT-də üzvlüyünün dondurulması üçün əsasların 2025-ci ildə aradan qalxması ehtimalı azdır" - hesabatda qeyd olunur.
Ermənistan Xarici Kəşfiyyat Xidməti 2026-cı ilin iyununda ölkədə keçiriləcək parlament seçkiləri öncəsi mümkün xarici müdaxilə cəhdləri barədə də xəbərdarlıq edib. Onların məlumatına görə, bəzi ölkələr respublikada sabitliyi pozmaq üçün cəmiyyətin geniş təbəqələrinə təsir göstərməyə çalışacaq. Söhbətin konkret olaraq hansı ölkələrdən getdiyi açıqlanmır.
Erməni sosioloq Artur Paronyan deyib ki, daxili təzyiq altında növbədənkənar seçkiyə getdikdə, hakimiyyət, bir qayda olaraq, uduzur və ya vəziyyəti daha da pisləşir: "Güman edirəm ki, xarici təzyiq də var. Bu xarici təzyiqin problemi seçkilər deyil, bu anti-Rusiya xəttini davam etdirmək, yəni Aİ-yə üzv olmaq, KTMT-dən çıxmaqdır, amma hakimiyyətin faktiki siyasi legitimliyi yoxdursa, bu, mümkün deyil".
Paronyan bildirib ki, Ermənistan hakimiyyətindən bu addımları atmaq tələb olunur və bunun üçün seçkilərə getməlidirlər. Əgər Paşinyanın partiyası seçkilərdə 25-30 faiz səs alsa, bu, onların Ermənistandan təhlükəsiz qaçmalarının qarantıdır.
Beləliklə, bütün bunlar onu deməyə əsas verir ki, İrəvan bu istiqamətdə yaxın vaxtlarda daha kəskin və maraqlı addımlar ata bilər. Görünən odur ki, Hayastanda anti-Rusiya ritorika və bəyanatları artmaqda davam edəcək.
Bu arada İrəvanda qiymət artımı və vergi artımı ilə əlaqədar vətəndaşlar hökumət binası qarşısında etirazlarını bildiriblər. Etirazçılar bir vaxtlar baş nazir Nikol Paşinyanın "Bu, xalqın qapısıdır, onu açıb istədikləri kimi içəri girə bilər" dediyini əsas gətirərək insanlar binaya girməyə cəhd ediblər.
Elçin CƏFƏROV,
"Azərbaycan"
