Prezident İlham Əliyevin Davosda keçirdiyi görüşlər bunu bir daha təsdiq etdi
İsveçrənin Davos şəhərində yanvarın 21-dən öz işinə başlayan ənənəvi Dünya İqtisadi Forumu maraqlı müzakirələrlə əlamətdar oldu. Sayca 55-ci olan bu forum bu dəfə "İntellektual əsrdə əməkdaşlıq" devizi altında təşkil olunmuşdu. Forumda 130-dan çox ölkədən 2 min siyasətçinin, iş adamının, qeyri-hökumət təşkilatlarının nümayəndələrinin, o cümlədən 60 dövlət və hökumət başçısının iştirakı müzakirə olunan məsələlərə qlobal səviyyədə olan maraqdan xəbər verir.
Azərbaycan aktual məsələlərin müzakirəsində fəaldır
Davos Forumunun keçirilməsində əsas məqsəd dövlət və hökumət başçılarını, beynəlxalq təşkilatları, elm adamlarını, nüfuzlu siyasətçiləri, iqtisadçıları, biznesmenləri birliyə cəlb etmək, onların arasında əlaqə yaratmaq və dünyada yaranmış iqtisadi problemlərin birgə aradan qaldırılmasına nail olmaq, yeni beynəlxalq iqtisadi layihələrin həyata keçirilməsini müzakirə və təşkil etməkdir. Davos İqtisadi Forumunun əhəmiyyətini artıran mühüm göstəricilərdən biri də dünyanın birillik iqtisadi gündəliyinin müəyyən edilməsidir.
Son illərdə keçirilən Davos Forumu isə daha çox qlobal siyasi və iqtisadi kataklizmlərin yaşandığı dövrə təsadüf edir. Dünyanın siyasi qütbləri arasında artan gərginliklər, Avrozonadakı iqtisadi çətinliklər, Yaxın Şərqdə baş verən qarşıdurmalar, Ukrayna müharibəsi Davos Forumunun da gündəliyinə təsir göstərir. Elə 55-ci forum da belə bir qlobal konyunktur şəraitində keçirildi. Təbii ki, bu cür tədbirlər və əvvəldən müəyyən olunmuş mövzuların müzakirəsi sonrakı dövrlərdə qlobal məsələlərə təsirsiz ötüşmür.
Qlobal müzakirələrə Azərbaycan da öz töhfəsini verir. Çünki ölkəmiz dünyada etibarlı tərəfdaş kimi tanınır və qəbul edilir. Forumun sessiyalarında müzakirə olunan məsələlərin təməlində Azərbaycanın mövqeyi və onun qazandığı uğurlar da var. Dünya İqtisadi Forumunda Azərbaycan Prezidenti İlham Əliyevin iştirakına maraq həmişə böyük olub. Bu maraq Prezident İlham Əliyevin keçirdiyi görüşlərdən də aydın görünür. Azərbaycan Prezidentinin hər il keçirilən Davos İqtisadi Forumunda iştirakı dünyanın siyasi elitasının, nəhəng biznes strukturlarının və nüfuzlu KİV-in də diqqət mərkəzində olur. Dövlət başçısının keçirdiyi çoxsaylı görüşlər, iştirak etdiyi sessiyalar siyasi-iqtisadi dairələr, media qurumları tərəfindən maraqla izlənilir.
Əsas diqqətçəkən məqamlardan biri də foruma qatılan ölkələrin Azərbaycanın dünyada və regionda rolunu yüksək qiymətləndirməsi və bəşəriyyəti narahat edən risklərin aradan qaldırılmasında ölkəmizin mövqeyi ilə hesablaşmalarıdır. Bu baxımdan da forum rəhbərliyi hər il yanvar ayında keçirilən toplantıda Azərbaycanın da təmsil olunmasında maraqlıdır.
Səmərəli və məhsuldar görüşlər
Davos İqtisadi Forumu siyasi liderlər, biznes dairələrini və vətəndaş cəmiyyəti institutlarını təmsil edən şəxslər arasında görüş üçün fürsətdir. Bu baxımdan məhz qarşı tərəfin müraciətinə əsasən, Prezident İlham Əliyevlə görüşlərin keçirilməsi dövlət başçısına olan qlobal maraqdan xəbər verir. Bu, Prezident İlham Əliyevin yüksək siyasi nüfuzunun göstəricisidir.
Prezident İlham Əliyevin Davosa builki səfəri də ötən illərdə olduğu kimi, olduqca səmərəli və məhsuldar keçdi. Bunu İlham Əliyevin qarşı tərəfin müraciətlərinə əsasən, Almaniya Kansleri Olaf Şolts, İsrail Dövlətinin Prezidenti İsxak Hersoq, Ukrayna Prezidenti Volodimir Zelenski, Latviya Prezidenti Edqars Rinkeviçs, İraq Prezidenti Əbdüllətif Camal Rəşid, Xorvatiya Respublikasının Baş naziri Andrey Plenkoviç, İraq Kürdüstan Regionunun Baş naziri Məsrur Bərzani, ABŞ-nin Xristian Liderlər Konqresinin rəhbəri Conni Mur, Avropa Yenidənqurma və İnkişaf Bankının (AYİB) prezidenti Odile Reno-Basso, "OliverWyman Group" şirkətinin Baş icraçı direktoru Nik Studer, "The Goldman Sachs Group Inc." şirkətinin qlobal məsələlər üzrə prezidenti Cared Kohen, "DP World" şirkətlər qrupunun sədri və icraçı direktoru Sultan Əhməd bin Sulaim, "Carlsberg Group" şirkətinin Müşahidə Şurasının sədri Henrik Poulsen və Baş icraçı direktoru Yakob Aarup-Andersen ilə keçirdiyi görüşlər də təsdiq edir.
Prezident İlham Əliyevin Davosa builki səfər qrafiki də ötən illərdə olduğu kimi zəngindir. Və bu zənginlik 55-ci dəfə keçirilən Davos İqtisadi Forumunun Azərbaycan üçün uğurlu olacağından xəbər verir. Çünki bu forum Azərbaycanın dünya birliyində və regiondakı yerini və mühüm rolunu, Azərbaycanın inkişafının dayanıqlı olduğunu bir daha beynəlxalq ictimaiyyətə təqdim etdi.
Rəşad CƏFƏRLİ,
"Azərbaycan"
