"Prezident İlham Əliyevin öz təsir və əhatə dairəsinə görə dünyanın ən böyük forumu hesab olunan Davos İqtisadi Forumunda iştirakı və dövlət başçıları, aparıcı şirkətlərin rəhbərləri ilə görüşləri ölkəmizin gələcək iqtisadi inkişafı üçün yeni perspektivlər açır. Ulu Öndər Heydər Əliyevin ölkəyə rəhbərlik etdiyi illərdə də Azərbaycan bu foruma böyük önəm verib və onun fəal iştirakçılarından olub".
Bu sözləri "Azərbaycan" qəzetinə Milli Məclisin Aqrar siyasət komitəsinin sədri Tahir Rzayev deyib. Komitə sədri bildirib ki, dünyanın ən nüfuzlu iqtisadi platformalarından sayılan forumda dünya liderləri, ictimai-siyasi xadimlər, görkəmli mütəxəssislər, beynəlxalq səviyyəli şirkətlərin rəhbərləri bir araya gələrək iqtisadiyyatın mövcud durumunu və problemlərini müzakirə edir, əlaqələrin genişləndirilməsi üçün tədbirlər müəyyənləşdirirlər.
Azərbaycan da Davos İqtisadi Forumunda iştirak etməkdə maraqlıdır. Forumun təşkilatçıları da Azərbaycanın bu tədbirə qatılmasını yüksək dəyərləndirir və qarşılıqlı fikir mübadilələrini əhəmiyyətli hesab edirlər. Uzun illərdir bu forumda iştirakımız məqbul sayılır və Azərbaycan öz təşəbbüskarlığı ilə dövlətlər arasında seçilməkdədir: "Ulu Öndər Heydər Əliyev 1995-ci ildə ilk dəfə olaraq bu yüksəksəviyyəli tədbirdə iştirak edib və dövlətimizin mövqeyini ortaya qoyub. Ümummilli Lider hələ o illərdə forumun keçirilməsinin əhəmiyyətini yüksək qiymətləndirmiş, beynəlxalq əlaqələrin genişləndirilməsinin faydalı olduğunu və ölkəmizin iqtisadi gücünün artırılmasına imkanlar yaratdığını bildirmişdi. 2002-ci ildə Nyu Yorkda keçirilən beynəlxalq forumda isə Ulu Öndərimiz dünyanı narahat edən bir çox məsələyə, xüsusilə terrorizmə, separatizmə öz kəskin münasibətini bildirmiş, bu mübarizədə dünya ölkələrinin birləşməsinin vacibliyini qeyd etmişdi. Dahi rəhbər erməni faşizminə diqqəti cəlb etməklə, Azərbaycanın təcavüzə məruz qaldığını dünya ictimaiyyətinə çatdırmışdı". Komitə sədrinin sözlərinə görə, dünyanın əksər ölkə rəhbərlərinin, beynəlxalq təşkilatların təmsilçilərinin iştirak etdiyi belə bir tədbirdə Azərbaycan həqiqətlərini dünyaya bəyan etmək, bunun üçün dövlət rəhbərlərini birliyə səsləmək və müəyyən məqsədlərə nail olmaq, əlbəttə, erməni təcavüzünün kökünü kəsmək üçün əsaslar hazırlamaq baxımından çox əhəmiyyətli idi. Heydər Əliyev bu missiyanı siyasi müdrikliklə yerinə yetirirdi. O, ölkəmizin dünya iqtisadi sisteminə inteqrasiya olunmasının əsasını qoymaqla zamanı qabaqlayır və hazırkı inkişafımız üçün perspektivlər yaradırdı.
Komitə sədri xatırladıb ki, Prezident İlham Əliyev 2007-ci ildən Davos İqtisadi Forumunda iştirak edir və çıxışları, qaldırdığı qlobal məsələlər, verdiyi müsahibələr, keçirdiyi görüşlərlə bu tədbirə yeni ab-hava gətirir. Əlbəttə, bu, Azərbaycanın beynəlxalq aləmdə qazandığı yüksək nüfuza yeni bir töhfədir. Azərbaycanın Cənubi Qafqazda lider kimi tanınması, sosial-iqtisadi sahədə qazanılan uğurlu nəticələr, ölkəmizin Avropanın enerji təhlükəsizliyinin təmin olunmasındakı rolu, beynəlxalq əməkdaşlığa imkanlar yaradılması və bu məqamların, nəticələrin bəyan edilməsi, qiymətləndirilməsi, gələcək inkişaf üçün stimul yaratması yeni uğurlara hesablanıb və bunun əsasında dövlət başçısının siyasi kursu durur.
Tahir Rzayev qeyd edib ki, Davos Forumunun regional iclasının 2013-cü ildə Bakıda keçirilməsi Azərbaycanın nəinki iqtisadi, eləcə də beynəlxalq əməkdaşlıq sahəsində ən layiqli və etibarlı tərəfdaş olduğunu dünyaya sübut edib və ölkəmizin imkanlarını daha da genişləndirib: "Cənab İlham Əliyevin Davosa builki səfəri və tədbirdə fəal iştirakı bunun əyani nümunəsidir. Prezidentimizin İsrailin, İraqın, Latviyanın prezidentləri, Almaniyanın kansleri, bir çox tanınmış şirkət rəhbərləri ilə görüşləri, CGTN telekanalına verdiyi müsahibə dünyanın diqqət mərkəzindədir. Bu görüşlərdə dünyanı narahat edən məsələlər, iqtisadiyyatın şaxələndirilməsi, investisiyaların cəlb edilməsi, sərmayələrin artırılması, əməkdaşlığın daha da genişləndirilməsi, biznes mühitinin formalaşdırılması, iş adamları arasında birbaşa təmasların yaradılması, forumların keçirilməsi əsas müzakirə mövzusu olub".
T.Rzayev bildirib ki, Prezident İlham Əliyevin Almaniyanın kansleri Olaf Şoltsla görüşü xüsusi maraq doğurub. Görüşdə Azərbaycan-Almaniya münasibətlərinin yaxşılaşdırılması, əlaqələrin genişləndirilməsinin önəmi vurğulanıb. Azərbaycanın Avropa İttifaqı ilə əməkdaşlığının inkişaf etdirilməsi müzakirə edilib və perspektivlər nəzərdən keçirilib. Cənubi Qafqaz regionunda sülhün və əmin-amanlığın təmin olunmasının əhəmiyyəti və zəruriliyi bildirilib, bu istiqamətdə səylərin artırılması və qüvvələrin birləşdirilməsi vacib hesab edilib.
Sonda komitə sədri vurğulayıb ki, Davos İqtisadi Forumu və dövlətimizin başçısının tədbirdə fəal iştirakı ölkəmizin gələcək inkişafı, özünü daha yaxından tanıtdırması, gələcək mühüm layihələrdə iştirak etməsi üçün imkanlara sahib olması baxımından çox əhəmiyyətlidir. Dövlətimiz və rəhbərimiz bu imkanları dəqiq müəyyənləşdirdiyinə görədir ki, Azərbaycan nəinki regionda, eləcə də dünyada öz yeri, sözü və uğurları olan bir dövlət kimi tanınır, seçilir və qiymətləndirilir.
Əsmər QARDAŞXANOVA,
"Azərbaycan"
