Vitali Kliçkonun son açıqlamasına görə, Kiyevə edilən hava hücumu zamanı azı 11 nəfər yaralanıb.
Paytaxtın üçdəbiri hazırda işıqsız qalıb. V.Kliçko hava hücumu zamanı baş verən partlayışlar nəticəsində Kiyevin havasında çirklənmənin yüksək olduğunu da açıqlayıb. Əhalidən pəncərələri açmamaq və çoxlu su qəbul etmək tövsiyə olunub.
Kiyev şəhər Hərbi Administrasiyasının rəhbəri Timur Tkaçenko isə bildirib ki, hazırda Kiyevin 10-a yaxın lokasiyasında dağıntılar qeydə alınıb. Bunların əksəriyyəti hündürmərtəbəli yaşayış binalarıdır.
Dağıntılar altında insanların qaldığı istisna edilmir.
Hava hücumu artıq 8 saatdan artıqdır davam edir.
10:24
Kiyev şəhər meri Vitali Kliçkonun açıqlamasına görə, şəhərə hava hücumu zamanı 5 nəfər yaralanıb, onlardan 4-ü xəstəxanaya yerləşdirilib.
Kiyevin Qoloseyev, Obolon, Darnitsk, Desnyansk rayonlarında mülki infrastrukturlara ziyan dəyib.
Təcili yardım xidmətləri hadisə yerindədir.
Qeyd edək ki, hava hücumu 7 saatdan artıqdır davam edir.
08:04
Dekabrın 27-nə keçən gecədən başlayaraq Rusiya qoşunları Kiyev şəhərinə və vilayətinə kütləvi hava hücumu həyata keçirir.
AZƏRTAC-ın xüsusi müxbirinin verdiyi məlumata görə, 5 saata yaxındır davam edən çoxkombinasiyalı hava hücumu zamanı Kiyevdə intensiv partlayış səsləri eşidilir. Hava hücumu zamanı müxtəlif tipli raketlər və zərbə dronlar tətbiq olunur.
Ukraynanın Energetika Nazirliyinin məlumatına görə, hava hücumunun əsas hədəfi enerji infrastrukturudur. Artıq Ukrayna paytaxtının bəzi ərazilərində qəza enerji kəsintiləri baş verir.
Hazırda Kiyevdə insanlar sığınacaqlarda məskunlaşıb.
jpeg_1766737545.jpeg)
