Növbəti prezident etibarlı olmaq istəyirsə, hakimiyyəti yenidən fransızlara qaytarmağı öhdəsinə götürməlidir.
AZƏRTAC xəbər verir ki, bu fikri Fransanın xarici işlər naziri və MoDem partiyasının vitse-prezidenti Jan-Noel Barro bazar günü Versalda keçirilən və təxminən 700 nəfərin iştirak etdiyi “Demokratiya bayramı” tədbirində çıxışı zamanı 2027-ci il prezident seçkiləri ilə bağlı fikirlərini bölüşərkən deyib.
Nazirin sözlərinə görə, prezident seçkilərinin ifrat sağçı Milli Birlik (RN) və solçu “Əyilməz Fransa” (LFI) tərəfindən ələ keçirilməsi təhlükəsi mövcuddur. Barro bu iki siyasi qüvvəni fərqli, lakin demokratiya və Fransa üçün ölümcül zəhərlər adlandırıb. O hesab edir ki, hər iki düşərgə “günah keçisi” axtarır: RN üçün “xarici, müsəlman və ictimai televiziya”, LFI üçün isə “varlı, yəhudi və jurnalist” hədəfə çevrilir.
Emmanuel Makronun 2017-ci ildən müttəfiqi olan Barro Fransada demokratik yorğunluq yarandığını bildirib. Onun fikrincə, bu vəziyyət elitaların dünya dəyişikliklərinə uzun illər göz yumması və orta təbəqə ilə xalq arasında artan narazılığı inkar etməsi nəticəsində meydana çıxıb.
Xarici işlər naziri dövlət idarəçiliyində daha geniş mərkəzsizləşmə, nəsillər arasında yeni sosial müqavilə və ballı pensiya sisteminin tətbiqi kimi məsələləri prioritet hesab etdiyini deyib. O, həmçinin məcburi mülki və ya hərbi xidmətin nəzərdə tutulduğu “vətəndaşlıq paktı”nı və sosial şəbəkələrin Fransanın qaydalarına əməl etmədiyi halda tam bloklanmasını təklif edib.
Barro bu təşəbbüslərin növbəti prezidentin vəzifəsinin ilk 100 günü ərzində referendum yolu ilə xalqın müzakirəsinə çıxarılmalı olduğunu vurğulayıb.
Barro prezidentliyə namizəd olmadığını xatırladaraq qeyd edib ki, “namizəd olmamaq susmaq üçün səbəb deyil”. O, seçki kampaniyası ərəfəsində bir sıra islahat təklifləri də irəli sürüb.
