Fransanın Nansi şəhəri yaxınlığındakı Tomblen qəsəbəsində paraşüt tullanışı üçün həyata keçirilən tanışlıq uçuşu faciə ilə nəticələnib. Mülki təyyarənin qəzaya uğraması nəticəsində göyərtədə olan 11 nəfərin hamısı həlak olub.
AZƏRTAC xəbər verir ki, hadisənin səbəbi hələlik məlum deyil və faktla bağlı Paris Prokurorluğunun Kollektiv qəzalar üzrə bölməsi tərəfindən istintaq başladılıb. Alman qeydiyyatlı “Pilatus” tipli təyyarə yerli aerodromdan havaya qalxdıqdan cəmi bir neçə saniyə sonra qəfil idarəetməni itirib və demək olar ki, şaquli şəkildə yerə çırpılıb. Şahidlərin sözlərinə görə, təyyarə yüksəliş mərhələsində olarkən mühərrikin səsi kəsilib və aparat sağa dönərək sürətlə yerə düşüb. Rəsmilər təyyarədə texniki nasazlıq baş verdiyini ehtimal etsələr də, qəzanın dəqiq səbəbi hələ müəyyən edilməyib.
Qəza nəticəsində pilot, beş paraşüt təlimatçısı və ilk paraşüt tullanışını həyata keçirən beş iştirakçı həyatını itirib. Yerli mənbələrin məlumatına görə, həlak olan həvəskar iştirakçıların əksəriyyəti sərbəst çalışan tibb bacıları olub. Onlar isti hava şəraitində gərgin iş rejimindən sonra istirahət məqsədilə bu uçuşu seçmişdilər.
Təyyarə uçuş-enmə zolağının yaxınlığındakı otlaq sahəsinə düşüb. Hadisə yerinə 50 yanğınsöndürən, çoxsaylı polis və jandarma əməkdaşları cəlb olunub. Təyyarənin yaşayış məntəqəsinə və avtomobil yollarına yaxın əraziyə düşməsinə baxmayaraq, yerdə xəsarət alan olmayıb. Faciə qurbanlarının yaxınlarının bir qismi paraşüt tullanışını izləmək və lentə almaq üçün aerodromda olub və qəzanı öz gözləri ilə görüb. Onlara və hadisənin şahidlərinə psixoloji yardım göstərilir.
Fransa Mülki Aviasiya Təhlükəsizliyi üzrə Araşdırmalar Bürosunun (BEA) məlumatına görə, bu hadisə hərbi və kommersiya aviasiyası istisna olmaqla, ölkədə ümumi aviasiya sahəsində son illərin ən ağır təyyarə qəzası hesab olunur. İstintaqı Hava Nəqliyyatı Jandarması aparır. Müstəntiqlər təyyarənin texniki vəziyyətini, uçuş məlumatlarını və qəzanın başvermə şəraitini araşdırırlar. Tomblen və Nansi bölgəsində dərin hüzn hökm sürür, yerli hakimiyyət orqanları isə qurbanların xatirəsinə anım məkanı yaradıb.
