Şuşa Qlobal Forumu dezinformasiyaya qarşı mübarizədə mühüm platformaya çevrilir

"Beynəlxalq aləmdə saxta xəbərlərin bilərəkdən və ya bilməyərəkdən geniş şəkildə yayılması, eləcə də belə məlumatların müxtəlif ictimai proseslərə mənfi təsiri son illərdə xüsusilə izlənməkdədir. Dünyada baş verən geosiyasi proseslər fonunda "Yalan məlumatların ifşası: Dezinformasiyaya qarşı mübarizə"  mövzusunda keçirilən  II Şuşa Qlobal Media Forumu Azərbaycanın informasiya diplomatiyası istiqamətində ciddi uğurudur".

Milli Məclisin deputatı Kamran Bayramov qəzetimiznə açıqlamasnda bildirib ki, dövlət başçısının Azərbaycan həqiqətlərinin dünyaya çatdırılması istiqamətində müəyyən etdiyi düzgün strategiya öz effektini verir. II Şuşa Qlobal Media Forumunda 50-yə yaxın ölkədən 150-dən çox xarici qonağın, o cümlədən 30-a yaxın ölkənin informasiya agentliyi, 3 beynəlxalq təşkilat və 82 media qurumunun iştirakı baş verən hadisələr barədə daha dolğun məlumatların əldə edilməsinə yol açdı. Forumda Prezident İlham Əliyev xüsusilə qeyd etdi ki, absurd bir vəziyyətdir ki, humanitar böhrana məruz qalan, bir milyon qaçqını olan, işğal edilmiş əraziləri tamamilə dağıdılan bir ölkə sanksiyalara məruz qalıb. Azərbaycan uzun illər dezinformasiyadan əziyyət çəkən, haqq səsi eşidilməyən tərəf kimi mübarizə aparmalı olduğundan bu gün oxşar situasiyalarda olan dövlətlərin yanında yer alaraq onlara dost dəstəyi göstərməyə davam edir. Dövlətimiz kiçik ada dövlətləri ilə əməkdaşlıq edərək, bu ölkələrin inkişafına dəstək olmaq üçün müxtəlif iqtisadi və maliyyə yardımları göstərir. 

"Prezident İlham Əliyev forumdakı çıxışında dünyanın ikili standartlara əsaslanan siyasətindən bəhs edərək bildirdi ki, biz bəzən açıq, ictimai şəkildə, bəzən də pərdəarxası mesajlarımızı veririk ki, Azərbaycanın maraqları Cənubi Qafqazda təmin edilməlidir: "Kimsə bizim maraqlarımızı görməzdən gəlməyə çalışsa, əlbəttə ki, onlar yanılacaqlar və uğursuzluğa düçar olacaqlar. Biz əlbəttə ki, ABŞ-də prezident seçkilərinin nəticələrindən asılı olmayaraq, mən səmimi deyirəm ki, anti-Azərbaycan fəaliyyətin bir hissəsi prezident seçkisi ilə bağlıdır. Onlar ermənilərin səslərini qazanmaq istəyirlər. Ona görə də, zənnimcə, məqsəd məhz, elə bundan ibarət idi. Mən tamamilə obyektiv olmağa çalışıram. Ümid edirəm ki, seçkidən sonra ABŞ-də və Avropada Azərbaycan haqqında, bizim potensialımız, rolumuz haqqında daha yaxşı anlayış olsun. Yəni biz şou qurmuruq, öyünmürük. Biz bilirik potensialımız nədən ibarətdir və bunu bizimlə əməkdaşlıq edən hər kəs bilir. Bu potensialdan xoş niyyət, xoş məram, konsolidasiya, tərəfdaşlıq üçün istifadə edilməlidir və biz demonizasiya qurbanı olmamalıyıq".

K.Bayramov qeyd edib ki, Azərbaycanın təşəbbüsü, Birləşmiş Ərəb Əmirlikləri və Braziliyanın dəstəyi ilə "Troyka"nın təsis edilməsi ideyası da günümüzün beynəlxalqsəviyyəli ən mühüm mütərəqqi yeniliklərindəndir. Bu platforma, iqtisadi-siyasi əməkdaşlığı gücləndirmək üçün bir vasitə kimi nəzərdə tutulur və Azərbaycanın beynəlxalq təşkilatlarda fəal iştirakının göstəricisidir. Ölkəmizin xarici siyasəti çərçivəsində ətraf mühitin qorunması və karbon tullantılarının azaldılması da mühüm yer tutur. Böyük ölkələrə bu sahədə məsuliyyətlərini yerinə yetirmək üçün çağırışlar edir və qlobal miqyasda ekoloji problemlərin həllində fəal iştirak edir. Azərbaycanın bu sahədəki təşəbbüsləri və səyləri beynəlxalq səviyyədə yüksək dəyərləndirilir.

Qarabağ, Şərqi Zəngəzur və Naxçıvanın coğrafi baxımdan eyni region olaraq "yaşıl enerji" zonası elan edildiyini xatırladan deputat vurğulayıb ki, bu bölgələr günəş-elektrik enerjisi baxımından böyük potensiala malikdir. "Yaşıl enerji" zonaları olaraq elan edilməsi, ərazilərin iqtisadi inkişafı və ətraf mühitin qorunması baxımından mühüm əhəmiyyət kəsb edir. Azərbaycanın bu sahədəki təşəbbüsləri, ölkənin enerjidə özünü təmin etməsi və ekoloji cəhətdən təmiz enerji mənbələrinə keçidinə böyük töhfə verəcək. Bütün bu görülən tədbirlər COP29-a hazırlıq kontekstində Azərbaycanın bu sahədəki inkişafını və xüsusi əhəmiyyət kəsb edən planlarını bir daha göstərir. Bu gün əminliklə qeyd edə bilərik ki, ölkəmiz bu mühüm qlobal konfransa evsahibliyi etməklə beynəlxalq aləmdə nüfuzunu daha da artıracaq, ekoloji gündəliyə sadiqliyini bir daha nümayiş etdirəcək.

K.Bayramov bildirib ki, ölkəmizin xarici siyasəti, beynəlxalq arenada mövqeyinin gücləndirilməsi, iqtisadi inkişafının təmin edilməsi və regional təhlükəsizliyin qorunması istiqamətində fəal və çoxşaxəli strategiyaya əsaslanır: "Ölkəmiz enerji resurslarının səmərəli istifadəsi və qlobal bazarlara çıxışının təmin edilməsi ilə yanaşı, regional və beynəlxalq əməkdaşlığın gücləndirilməsinə xüsusi diqqət yetirir. Eyni zamanda Azərbaycanın beynəlxalq təşkilatlarda fəal iştirakı və digər ölkələrlə strateji tərəfdaşlıq əlaqələri qurması qlobal siyasətdə rolunu artırır. Azərbaycanın təşəbbüsləri və həyata keçirdiyi layihələr, onun beynəlxalq arenada nüfuzunun artmasına və dünya miqyasında tanınmasına səbəb olur".

Əsmər QARDAŞXANOVA,

"Azərbaycan"