Rəşad İlham oğlu Mikayılzadə 1995-ci il sentyabrın 30-da Lerik rayonunun Camaşəir kəndində dünyaya göz açıb. Bakı şəhərindəki 240 nömrəli tam orta məktəbi bitirdikdən sonra Sumqayıt Dövlət Universitetinə qəbul olunub. Ali təhsilini başa vurduqdan sonra Vətən qarşısındakı övladlıq borcunu yerinə yetirmək üçün hərbi xidmətə yollanıb. Əsgəri xidmətini cəbhə bölgəsində yerləşən hərbi hissədə yerinə yetirib.

2015-ci ildə ölkəmizdə keçirilən I Avropa Oyunlarının könüllüsü olub. Üzərinə düşən vəzifələri vaxtında və layiqincə yerinə yetirib. Avropa Oyunları zamanı göstərdiyi nümunəvi könüllü xidmətə görə mükafatlandırılıb.

2020-ci il sentyabrın 27-də erməni təxribatı nəticəsində Vətən müharibəsi başlayanda Rəşad Mikayılzadə tay-tuşlarından geri qalmadı. Könüllü olaraq döyüşə yollandı. Torpaqların azadlığı naminə yenidən əyninə hərbi forma geyindi. Onun erməni qəsbkarlarına qarşı ilk döyüşü Füzuli rayonu uğrunda oldu. Daim ön sıralarda vuruşan Rəşad silah yoldaşları ilə dəqiq atəşlə erməni işğalçılarına zərbələr endirməkdə fərqləndilər. Füzuli rayonu qəsbkarlardan azad olunandan sonra onları Xocavənd istiqamətinə göndərdilər. Qarabağ işğalçılardan addım-addım azad olunduqca Rəşad sevinir, ürəyi açılırdı. Bir vaxtlar o, işğalda qalmış torpaqlar uğrunda vuruşmağı arzulamışdı. İndi arzusuna çatmışdı, Qarabağı erməni qəsbkarlarından azad edənlərin ön sırasındaydı.

Xocavənddən sonra Rəşadgili Şuşa uğrunda gedən döyüşlərə cəlb etdilər. 2020-ci il noyabrın 8-də ordumuzun gücü, qüdrəti sayəsində Azərbaycanın musiqi beşiyi Şuşa işğaldan azad olundu. Şuşanın yağı caynağından xilas olunmasına Rəşad da çox sevindi. Bunda xidməti olduğu üçün qürurlandı, ömrünün ən gözəl anlarını yaşadı.

Noyabrın 9-u idi. Döyüşlər daha çox işğaldan yenicə azad olunmuş Şuşa ətrafında gedirdi. Əsgər Rəşad Mikayılzadə həmişəki kimi yenə də ön sıralarda vuruşurdu. Ötəngünkü döyüşdə ağır itkilər verib geri çəkilən yağılar olub-qalan gücünü toplayıb əks-hücuma keçmişdilər. Düşmən onların komandirini vurmağa çalışırdı. Həmin an Rəşad böyük qəhrəmanlıq göstərərək özünü komandirin qarşısına atıb onu xilas etdi. Amma özü şəhid oldu.

Əsgər Mikayılzadə bir payız günündə dağlar qoynunda dünyaya gəlmişdi. Elə bir payız günündə də dağlar qoynunda  - 2020-ci il noyabrın 9-da Şuşa ətrafında gedən döyüşlərdə canından keçdi. Cəsarəti, hünəri ilə qəhrəmanlıq tariximizə yeni səhifələr yazdı.

Ərazi bütövlüyümüzün təmin edilməsi uğrunda gedən döyüş əməliyyatlarında göstərdiyi igidliyə və cəsarətə görə Azərbaycan Prezidenti İlham Əliyevin sərəncamları ilə Mikayılzadə Rəşad İlham oğlu ölümündən sonra "Vətən uğrunda", "Döyüşdə fərqlənməyə görə", "Xocavəndin azad olunmasına görə" medalları ilə təltif edildi.

Vətən uğrunda şəhid olanlar heç vaxt unudulmur. Rəşad Mikayılzadə də yaddaşlarda cəsur əsgər kimi qalacaq. Daim hörmətlə anılacaq, böyük ehtiramla xatırlanacaq.

V.MƏHƏRRƏMOV,

"Azərbaycan"