“Heydər Əliyev - suveren Azərbaycanın konstitusionalizminin və parlamentarizminin banisi” mövzusunda beynəlxalq konfrans keçirilib  

Müstəqil Dövlətlər Birliyinin Parlamentlərarası Assambleyasının (MDB PA) iştirakçısı olan dövlətlərdə Demokratiyanın, parlamentarizmin inkişafının və vətəndaşların seçki hüquqlarına riayət olunmasının monitorinqi beynəlxalq İnstitutu (DİMBİ) Bakı filialının təşkilatçılığı ilə Azərbaycan Respublikası Konstitusiyasının 30 illiyinə və Azərbaycan parlamentinin 107 illiyinə həsr olunmuş “Heydər Əliyev- suveren Azərbaycanın konstitusionalizminin və parlamentarizminin banisi” mövzusunda beynəlxalq konfrans keçirilib.

AZƏRTAC xəbər verir ki, konfransı MDB PA DİMBİ Bakı filialının direktoru Ramin Rzayev açaraq, filialın əməkdaşları və ekspertləri tərəfindən aparılmış elmi-tədqiqat işinin nəticəsi olaraq hazırlanmış nəşrlər barədə məlumat verib. Bildirib ki, nəşrlər Azərbaycan xalqının Ümummilli Lideri Heydər Əliyevin ölkədə konstitusionalizm və parlamentarizmin formalaşmasında və inkişafında tarixi rolunun və çoxşaxəli xidmətlərinin hərtərəfli və sistemli təhlilinə həsr olunub. R.Rzayev, həmçinin vurğulayıb ki, Prezident İlham Əliyevin rəhbərliyi dövründə ictimai-siyasi, sosial-iqtisadi və mədəni sahələrdə əldə olunmuş mühüm nailiyyətlər, eləcə də Azərbaycanın beynəlxalq mövqelərinin möhkəmlənməsi Ulu Öndər Heydər Əliyevin uzaqgörən strateji xəttinin ardıcıl və uğurlu şəkildə davam etdirilməsinin bariz göstəricisidir.

MDB Parlamentlərarası Assambleyası Şurası Baş katibinin müavini – Azərbaycan Respublikası Milli Məclisinin MDB Parlamentlərarası Assambleyasında səlahiyyətli nümayəndəsi Aydın Cəfərov tədbir iştirakçılarına MDB PA Şurası Katibliyinin rəhbəri – Baş katib Dmitri Arkadyeviç Kobitskinin adından salamlama nitqini çatdırıb. O, konfransın təşkilinə göstərilən dəstəyə görə Azərbaycan Respublikasının Milli Məclisinə və MDB PA Şurası Katibliyinə minnətdarlığını bildirib.

Tədbirdə çıxış edən deputatlar Arzu Nağıyev, Nizami Səfərov və Göydəniz Qəhrəmanov Azərbaycanda parlamentarizm ənənələrinin inkişafının, konstitusionalizmin nəzəri və praktiki aspektlərinin dərindən öyrənilməsinin dövlətçilik quruculuğunun təkmilləşdirilməsi baxımından mühüm əhəmiyyət daşıdığını vurğulayıblar. Onlar, həmçinin Azərbaycan Respublikasının Konstitusiyasının qəbul edilməsində Ümummilli Lider Heydər Əliyevin müstəsna rolunu xüsusi qeyd ediblər.

MDB PA DİMBİ-nin direktor müavini Yelena Yeremenko çıxışında Azərbaycanda “Konstitusiya və Suverenlik İli” çərçivəsində belə bir tədbirin keçirilməsinin aktuallığını qeyd edib.

Konfrans iştirakçıları Azərbaycan Respublikasının Konstitusiyasının ölkənin hüquq yaradıcılığı sistemində əsas baza rolunu oynadığını, eləcə də Ulu Öndər Heydər Əliyevin dövlətçilik ənənələrinin banisi kimi tarixi rolunu xüsusilə qeyd ediblər.

Tədbirin sonunda bu ilin noyabr ayında keçirilmiş “Dünya ölkələrinin seçki sistemləri” VI beynəlxalq tələbə internet-olimpiadasının qalibləri mükafatlandırılıb.

Sonda konfrans iştirakçılarına MDB PA DİMBİ Bakı filialı və ekspertləri tərəfindən hazırlanan, Azərbaycan Respublikasının Konstitusiyası və parlamentinin tarixini əks etdirən “Heydər Əliyev – suveren Azərbaycanın konstitusionalizminin banisi” və “Azərbaycan Respublikasında parlamentarizmin formalaşması: tarix və müasirlik” adlı kitablar təqdim edilib.