“Waymo” şirkəti son üç il ərzində Çin avtomobil istehsalçısı “Zeekr” tərəfindən hazırlanmış robotaksi modelini sınaqdan keçirib və təkmilləşdirib. Kommersiya mərhələsinə keçid ərəfəsində isə avtomobilin adının dəyişdirildiyi açıqlanıb.
İndiyədək “Zeekr RT” adı ilə tanınan robotaksi bundan sonra “Ojai” adlanacaq. Yeni ad ABŞ-nin Los-Ancelesə yaxın ərazidə yerləşən, yaradıcı mühit və sağlam həyat tərzi ilə seçilən Ojai yaşayış məntəqəsindən ilhamlanıb. Adın tələffüzü “oh-hay” formasındadır.
“Waymo”nun rəsmi nümayəndəsi Kris Bonelli bildirib ki, bu addımın əsas məqsədi Amerika ictimaiyyətinin “Zeekr” brendini kifayət qədər tanımamasıdır. Rebrendinq sərnişinlərlə ünsiyyətə də təsir edəcək — gələcəkdə robotaksi istifadəçiləri avtomobil tərəfindən “Oh hi” ifadəsi və adları ilə qarşılanacaq.
“Waymo” və “Zeekr” arasında əməkdaşlıq 2021-ci ildən davam edir. 2022-ci ildə Los-Ancelesdə keçirilən təqdimat zamanı sükan çarxı olmayan konsept robotaksi nümayiş olunmuşdu. Lakin CES 2026 sərgisində təqdim edilən “Ojai” modelində artıq sükan mövcuddur.
Keçmiş “Zeekr RT” olan “Ojai” Finiks və San-Fransisko şəhərlərində genişmiqyaslı sınaqlardan keçirilib. Avtomobil 13 kamera, 4 lidar, 6 radar, xarici səs qəbulediciləri və sensorlar üçün xüsusi mini şüşəsilənlərlə təchiz olunub. Texniki göstəricilər əvvəlki kimi qalsa da, dizaynda dəyişiklik edilib və avtomobilin rəngi mavi tonlardan daha çox gümüşü çalara keçib.
Hazırda “Waymo” əməkdaşları San-Fransisko və Finiks şəhərlərində bu robotaksidən sifariş əsasında istifadə edə bilirlər. Bu mərhələ adətən xidmətin yaxın zamanda geniş ictimaiyyətə açılacağından xəbər verir.
“Waymo” hazırda Atlanta, Austin, Los-Anceles, Finiks və San-Fransiskoda fəaliyyət göstərir. Şirkət növbəti il ərzində Denver, Las-Veqas və London daxil olmaqla daha 12 yeni şəhərdə robotaksi xidmətini işə salmağı planlaşdırır.
Ülkər XASPOLADOVA,
“Azərbaycan”
jpg_1767946983.jpg)
jpg_1767211798.jpg)
