Sentyabrın 25-də Mərkəzi Seçki Komissiyası 9-cu çağırış Dövlət Dumasına deputat seçkilərinin yekun nəticələrini açıqlayıb. Bu barədə RBC telekanalı xəbər verir.
Hakim "Vahid Rusiya" partiyası 349 yer (federal dairədə 140 və təkmandatlı seçki dairələrində 209), Rusiya Federasiyası Kommunist Partiyası 37 yer (federal dairədə 32 və təkmandatlı seçki dairələrində 5), Rusiya Liberal Demokrat Partiyası isə 23 yer (federal dairədə 21 və 2 təkmandatlı seçki dairəsində) qazanıb. "Yeni insanlar" Partiyasının yeni Dövlət Dumasında 19 yeri var və hamısı federal dairədəndir. "Ədalətli Rusiya" 17 yerə malikdir (federal dairədə 13 və təkmandatlı seçki dairəsində 4).
Mərkəzi Seçki Komissiyasının rəhbəri Ella Pamfilovanın sözlərinə görə, "Rodina" Partiyası bir yerə malikdir və dörd yeri müstəqil namizədlər qazanıb.
Beləliklə, hakim partiya hazırda Dövlət Dumasının bütün doqquz çağırışı üçün rekord sayda yerə sahibdir.
MSK sədri bildirib ki, yeni deputatlar arasında xüsusi hərbi əməliyyatın 46 iştirakçısı var. Parlament seçkilərində fəallıq 59,8 faiz olub ki, bu da 2016-cı və 2021-ci illərdən daha yüksəkdir. Sədr həmçinin 33 bölgədə (Moskva da daxil olmaqla) məsafədən elektron səsvermənin nəticələrini açıqlayıb. "Vahid Rusiya" səslərin 50,79 faizini toplayıb, ikinci yerdə "Yeni insanlar" (13,04 faiz), üçüncü yerdə isə Rusiya Federasiyasının Kommunist Partiyası (11,45 faiz) qərarlaşıb. Rusiya Liberal Demokrat Partiyası (LDPR) səslərin 8,97 faizini, "Ədalətli Rusiya" isə 6,34 faizini toplayıb. Pensiyaçılar Partiyası 3,1 faiz, "Yaşıllar" 3,04 faiz, "Rusiya kommunistləri" 1,43 faiz, "Rodina" 1,38 faiz və Birbaşa Demokratiya Partiyası 0,45 faiz səs qazanıb.
Rizvan CƏFƏROV,
"Azərbaycan"
677jpg_1790033437.jpg)
