Dövlət başçısının yerlərdə vətəndaş müraciətlərinə obyektiv şəkildə baxılması, vətəndaş məmnunluğunun təmin edilməsi ilə bağlı müvafiq sərəncam və tapşırıqlarının icrasına Qazax rayonunda da operativ yanaşılır.
Xüsusilə də şəhid ailələri və müharibə iştirakçılarının sosial qayğılarının öyrənilməsi və həlli daim diqqətdə saxlanılır. Ən əsası da vətəndaş məmnunluğunun təmin olunması məqsədilə rayon icra hakimiyyətinin və aidiyyəti xidmət sahələrinin məsul əməkdaşları tərəfindən müraciətlər vətəndaşların iştirakı ilə yerində araşdırılır, mövcud problemlərin həlli istiqamətində müvafiq tədbirlər həyata keçirilir.
Mən Qarabağ döyüşlərində iştirak edib yaralanmışam, 1-ci qrup əliləm. Ailə üzvlərim çox olduğundan dolanışığımız olduqca çətinləşib. Bu barədə rayon icra hakimiyyətinə müraciət etdim. Çox çəkmədi ki, rayon icra hakimiyyətinin rəhbəri və şəhər bələdiyyəsinin sədri evimə gəlib, vəziyyətimlə maraqlandılar. İcra başçısı aidiyyətı qurumların nümayəndələrinə tapşırıqlar verdi, az bir zamanda çətinliklərimiz aradan qaldırıldı. Bir müddətdən sonra şəhər bələdiyyəsi ailəmizi nəzarətə götürdü. Bundan başqa, bir sıra məsələlərin həlli istiqamətində də bizə köməklik göstərildi.
Məlumat üçün qeyd edim ki, 2019-cu ildə rayon rəhbərliyi tərəfindən yaşadığım evin dam örtüyü də tamamilə yenilənmiş, otaqlarda döşəmə dəyişdirilmiş, köhnə qapılar yenisi ilə əvəz olunmuş, həyətə çınqıl döşənmişdir. Evin giriş hissəsinə beton tökülmüşdür.
Hörmətli redaksiya! Müharibə veteranlarına göstərilən diqqət və qayğıya görə ölkə rəhbərinə dərin minnətdarlığımızı bildiririk.
İlham HACIYEV,
Qazax şəhər Əliağa Şıxlinski küçəsinin sakini, 1-ci qrup əlil
