Hazırda baş verən iki qlobal xarakterli müharibə dünya iqtisadiyyatını böhranlı vəziyyətə salaraq istehlak mallarının qiymətlərini artırmaqla yanaşı, inflyasiyaya səbəb olur. Həm Rusiya ilə Ukrayna, həm də İran ilə ABŞ arasında baş verən silahlı toqquşmalar dünya enerji bazarına birbaşa mənfi təsir göstərir. İqtisadiyyatın əsas hərəkətverici qüvvəsi olan enerji resurslarının qiymətlərinin artması isə zəncirvari reaksiya kimi bütün məhsulların qiymətlərinin yüksəlməsinə gətirib çıxarır ki, bu da yanacağı idxal edən ölkələr üçün daha böyük çətinliklər yaradır.
Bu sözləri AZƏRTAC-a açıqlamasında Milli Məclisin deputatı Sadiq Qurbanov deyib.
O bildirib ki, Prezident İlham Əliyevin Almaniyaya rəsmi səfəri və səfər çərçivəsində imzalanan sənədlər rəsmi Bakının həyata keçirdiyi enerji siyasətinin nə qədər dəqiq və uzaqgörən olduğunu deməyə əsas verir. Dünyada Azərbaycandan da çox neft və qaz ehtiyatlarına malik olan ölkələr var. Lakin bu ölkələri ayrı-ayrılıqda nəzərdən keçirsək görərik ki, onlar praqmatik siyasi xətt yürüdə bilməyib, təbii ehtiyatlar yalnız şəxsi varlanmaq üçün və daxili siyasətdə alət olaraq istifadə edilib. Təbii ehtiyatlar heç bir strategiya olmadan xammal kimi xaricə satılıb və əldə edilən gəlirlər milli iqtisadiyyatı deyil, siyasi qrupların hakimiyyət uğrunda mübarizəsinə sərf olunub: “Lakin Azərbaycanda əsası xalqımızın Ümummilli Lideri Heydər Əliyev tərəfindən qoyulan neft strategiyası ölkəmizin inkişafına xidmət edir. Prezident İlham Əliyev müasir dövrün trendini diqqətlə izləyərək təbii qazın ixracını həm iqtisadi, həm də siyasi dividentlər qazanmaq üçün istifadə edir”.
Deputat deyib: “İlk növbədə ölkədə geniş infrastruktur yaradılıb ki, bu da iqtisadiyyatın digər sahələrinin də inkişafına stimul verir. Məhz neft gəlirləri hesabına Bakı-Tbilisi-Qars dəmir yolu, Cənub Qaz Dəhlizi, Bakı Beynəlxalq Dəniz Ticarət Limanı və bir sıra başqa beynəlxalq ticarətdə əhəmiyyətli rol oynayan layihələr həyata keçirilib. Bu layihələr Trans-Xəzər Beynəlxalq Nəqliyyat Marşrutunun (Orta Dəhliz) yaranmasına və Avropa ilə Çin arasındakı ticarət əlaqələrinin inkişafında ölkəmizin mühüm logistika mərkəzinə çevrilməsinə gətirib çıxarıb. Mütəxəssislərin hesablamasına görə, 2030-cu ilə kimi Orta Dəhlizlə yükdaşımanın həcmi 11 milyon tona çatacaq. Konteyner tranzitinin həcmi isə 130 min TEU-yə qədər arta bilər. Bu qədər yükün daşınması üçün Orta Dəhlizin davamı kimi Zəngəzur dəhlizinin aktuallığı daha da artacaq. Yüklər Avropadan Türkiyəyə və Zəngəzur dəhlizi ilə Mərkəzi Asiya və Çinə çatdırılacaq. Orta Dəhlizin dünya siyasətində və Avrasiyada artan önəmi, keçdiyi marşrutun təhlükəsizliyi, qısalığı və ucuzluğu, eləcə də hansı dövlətlərə aid olması baxımından əhəmiyyətlidir. Məsələyə bu aspektdən yanaşdıqda Prezident İlham Əliyevin Almaniyaya səfəri zamanı “Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə”nin imzalanmasının təsadüfi xarakter daşımadığını görərik”.
Sadiq Qurbanov qeyd edib ki, Birgə Bəyannamədə enerji ilə yanaşı, nəqliyyat, tranzit, investisiya, kənd təsərrüfatı və başqa sahələrdə də strateji xarakter daşıyan əməkdaşlıq nəzərdə tutulub: “Bu da qeyd etdiyimiz kimi ölkəmizə iqtisadi dividentlə yanaşı, həm də siyasi dəstək qazandırır. Bu siyasi dəstək ondan ibarətdir ki, Azərbaycanın ərazi bütövlüyü və suverenliyi Avropa institutları tərəfindən qarant altına alınır. Çünki başda Almaniya olmaqla, Avropa iqtisadi maraqlarını siyasi ambisiyalara qurban verərək Azərbaycana qarşı hər hansı bir təhdidin reallaşmasına imkan verməz. Bu, Prezident İlham Əliyevin Azərbaycana beynəlxalq aləmdə qazandırdığı ən böyük uğurdur”.
