Prezident İlham Əliyevin Böyük Britaniya və Şimali İrlandiya Birləşmiş Krallığının Baş naziri Endi Börnhemə ünvanladığı təbrik məktubu iki ölkə arasında münasibətlərin dinamik inkişafından xəbər verir. Ölkə rəhbərinin də vurğuladığı kimi, Azərbaycan Birləşmiş Krallıqla münasibətlərin hərtərəfli inkişafına xüsusi əhəmiyyət verir. Böyük Britaniya şirkətləri Azərbaycanda həm neft, həm də qeyri-neft sektorunda uğurla fəaliyyət göstərirlər və bu əlaqələr uzun illərdir davam edir. Eyni zamanda işğaldan azad olunmuş ərazilərdə Birləşmiş Krallığın şirkətlərinin yer alması və bu gün həmin ərazilərdə aparılan bərpa və quruculuq işlərində yaxından iştirak etmələri ölkələrimiz arasında əməkdaşlığın yüksək səviyyədə olduğunu bir daha təsdiqləyir.
Milli Məclisin deputatı Tural GƏNCƏLİYEV qəzetimizə açıqlamasında deyib ki, Azərbaycan-Birləşmiş Krallıq əlaqələri çox dərin köklərə bağlıdır və iki ölkə arasında münasibətlər ölkəmizin müstəqilliyini hələ yeni qazandığı günlərdən başlayıb. Həmin dövrdən bəri ölkəmizin neft-qazının Avropaya ixracı üçün Böyük Britaniyanın və şirkətlərinin Azərbaycana yatırdıqları investisiyalar, böyük layihələrin - Bakı-Tbilisi-Ceyhan neft kəmərinin, daha sonra "Cənub qaz dəhlizi"nin çəkilməsi, TANAP və TAP layihələrinin inkişaf etdirilməsi, eyni zamanda, Britaniyanın BP kimi böyük şirkətinin on milyardlarla dollar investisiya yatırması əlaqələrimizin nə qədər sıx olduğunu göstərir. "Böyük Britaniya və Şimali İrlandiya Birləşmiş Krallığı özünəməxsus ölkədir və dünyada güc mərkəzlərindən biri olaraq Azərbaycanla münasibətlərini sırf ikitərəfli konteksdə Avropa İttifaqından, ABŞ-dən ayrı və müəyyən cəhətləri nəzərə almaqla inkişaf etdirir. Böyük Britaniya və Azərbaycan arasında iqtisadi əlaqələrlə yanaşı, siyasi, hərbi və təhlükəsizlik sahələrində də əməkdaşlıqlar illər boyu inkişaf edib. Böyük Britaniya Azərbaycan-Ermənistan münaqişəsinin davam etdiyi və daha sonrakı dövrdə obyektiv, ədalətli mövqe nümayiş etdirən tərəf kimi imic formalaşdırıb və rəsmi Bakı ilə həmişə praqmatik münasibətlər qurmağa çalışıb. Çünki Birləşmiş Krallıq Sovet İttifaqı dağılandan sonra Qafqazın, Xəzər hövzəsinin və bu xüsusda Azərbaycanın dəyərini, strateji vizyonu olan ölkə olduğunu yaxşı anlayırdı. Bu baxımdan Azərbaycanla münasibətlərini məhz o vaxtdan yüksək səviyyədə qurub", - deyə o əlavə edib.
Deputat qeyd edib ki, Prezident İlham Əliyevin Böyük Britaniya və Şimali İrlandiya Birləşmiş Krallığının Baş naziri Endi Börnhemə ünvanladığı təbrik məktubu Azərbaycanın yeni hökumətlə də münasibətlərinin yüksək səviyyədə inkişaf edəcəyini göstərir. Bu əlaqələr həmçinin başqa parametrləri də əhatə edir. Parlamentlərarası dostluq qrupları, işçi qruplar öz fəaliyyətini davam etdirir, qarşılıqlı səfərlər, parlamentarilərin fəaliyyəti intensiv xarakter daşıyır.
T.Gəncəliyev bildirib ki, Azərbaycan-Böyük Britaniya əlaqələri həmçinin humanitar, iqtisadi, ticarət, kommunikasiya xətləri baxımından da yüksək səviyyədədir: "Bir sözlə, Britaniya hazırda istər Rusiya-Ukrayna müharibəsi, istərsə də Yaxın Şərqdə - İran ətrafındakı müharibə kontekstində Azərbaycanı böyük Avrasiyanın strateji, ən dəyərli açar ölkəsi kimi görür. Birləşmiş Krallıq Orta dəhlizin, "Şərq-Qərb" marşrutunun önəmini, xüsusilə Azərbaycanın burada oynadığı əsas rolu dəyərləndirir. Xüsusilə postmünaqişə dövründə ölkəmizin yeni reallıq formalaşdırdığını və "orta güc" kimi özünü göstərdiyini bilir. Buna görə də Azərbaycanla ikitərəfli əlaqələrini genişləndirir və möhkəmləndirir".
Deputat yekunda vurğulayıb ki, Böyük Britaniya-Azərbaycan əlaqələrinin genişlənməsi üçün böyük imkanlar mövcuddur və münasibətlər bundan sonra da yüksələn xətlə inkişaf edəcək.
Əsmər QARDAŞXANOVA,
"Azərbaycan"
