Prezident İlham Əliyevin 25 may 2026-cı il tarixli sərəncamı ilə təsdiq edilmiş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı" aqrar sektorun dayanıqlı və innovasiya əsaslı inkişafı, istehsal potensialının artırılması və müasir texnologiyaların tətbiqinin genişləndirilməsi istiqamətində mühüm hədəflər müəyyən edir.
Dövlət proqramının əsas prioritetləri sırasında kənd təsərrüfatında intensiv və rəqabətqabiliyyətli istehsalın genişləndirilməsi, məhsuldarlığın yüksəldilməsi, su və torpaq ehtiyatlarından səmərəli istifadə, aqrar dəyər zəncirinin inkişaf etdirilməsi, emal və logistika imkanlarının artırılması, yerli istehsal və ixrac potensialının gücləndirilməsi xüsusi yer tutur. Bu baxımdan, Goranboy rayonunda dövlət proqramının icrası istiqamətində çoxsaylı tədbirlər həyata keçirilir. Xüsusilə rayonda pambıqçılığın inkişafına diqqətlə yanaşılır. Hər il bu sahədə uğurlu göstəricilərə nail olan ağ qızıl ustaları bu il də sahələrdə bol məhsul yetişdirmişlər. Keçən il 1 983,3 hektar pambıq əkən rayon sakinləri ümumilikdə 6029,61 ton pambıq tədarük edərək hər hektardan 30,4 sentner məhsul əldə etdilər.
Cari ildə bu rəqəmi artırmaq əzmində olan rayon sakinləri bütün imkanlardan səmərəli istifadə etməklə daha çox məhsul tədarük etməyi qarşılarına məqsəd qoymuşlar. Bunun üçün rayondakı iri pambıqçılıq təsərrüfatları əkin sahələrini bir qədər də genişləndirmişlər. "Azərpambıq" MMC 615,6 hektarda, "Prime Cotton" MMC 426,5 hektarda, "EDEN Aqro" MMC 304 hektarda, "Goran-Cotton" MMC 146,5 hektarda pambıq əkmişdir.
Rayonda pambıq əkən ayrı-ayrı fermerlər də bu il bol məhsul yetişdirməyi qarşılarına məqsəd qoymuşlar. Məsələn, Şəhriyar Həmidov 49 hektarda, Elşad Səfərv 18 hektarda, Səadət Mirzəyeva 14,4 hektarda keçənilki göstəricini yeniləmək üçün əllərindən gələni əsirgəmirlər.
Qeyd edək ki, rayon icra hakimiyyəti pambıqçılığın inkişafını sürətləndirmək üçün təsərrüfatlara hər cür dəstək göstərir. Tez-tez pambıqçılıqla məşğul olan təsərrüfatlarda olan rayon rəhbərliyi və mütəxəssislər fermerlərlə görüşür, mövcud vəziyyətlə yaxından tanış olurlar. Elə bu günlərdə rayon rəhbərliyi mütəxəssislərlə, eləcə də pambıqçılıqla bağlı yaradılmış qərargahın üzvləri ilə birlikdə Şəhriyar Həmidova məxsus pambıq sahələrində mövcud vəziyyətlə tanış olmuşdur. Baxış zamanı təsərrüfatın mövcud istehsal imkanları, tətbiq olunan aqrotexniki tədbirlər, məhsuldarlığın artırılması istiqamətində görülən işlər və növbəti mərhələdə həyata keçirilməsi nəzərdə tutulan işlər barədə məlumat əldə etmişlər. Tanışlıq zamanı təsərrüfatın genişləndirilməsi ilə bağlı layihə də nəzərdən keçirilmişdir. Qeyd edilmişdir ki, mövcud əkin sahəsinin əlavə 26 hektar artırılaraq ümumilikdə 75 hektara çatdırılması nəzərdə tutulmuşdur. Bunun icrası nəticəsində hər hektardan məhsuldarlığın 55 sentnerə, ümumi məhsul istehsalının isə 210,7 tondan 412,5 tona çatdırılması nəzərdə tutulmuşdur. Bundan başqa, istehsal prosesində müasir aqrar yanaşmaların tətbiqinin genişləndirilməsi, resurslardan səmərəli istifadə və məhsuldarlığın yüksəldilməsi ilə bağlı məsələlər də müzakirə edilmişdir. Bildirilmişdir ki, pambıqçılığın inkişaf etdirilməsi Goranboy rayonunun aqrar potensialından səmərəli istifadə olunmasına, əkin sahələrinin genişləndirilməsinə, məhsuldarlığın artırılmasına və kənd təsərrüfatı istehsalının yüksəldilməsinə töhfə verə bilər.
S.ƏLİYEV,
"Azərbaycan"
