2026-2030-cu illəri əhatə edən Avropa İttifaqı-Azərbaycan Tərəfdaşlıq Prioritetləri sənədinin layihəsi ilkin olaraq razılaşdırılıb
Müasir dünya nizamının ciddi təlatümlərlə və geosiyasi gərginliklərlə üzləşdiyi bir dövrdə Azərbaycan özünün müstəqil, qətiyyətli və milli maraqlara əsaslanan xarici siyasət kursunu inamla davam etdirir. Bu siyasətin mühüm istiqamətlərindən biri olan Azərbaycan-Avropa İttifaqı (Aİ) münasibətləri inkişaf yolu keçərək bu gün tamamilə yeni, strateji mərhələyə qədəm qoyur.
Münasibətlərdəki bu yeni strateji reallıq elə bu günlərdə Bakıda keçirilən vacib görüşlə daha bir real nəticəsini verib. Belə ki, 2-3 iyun 2026-cı ildə Bakı şəhərində Azərbaycan ilə Avropa İttifaqının nümayəndə heyətləri arasında yeni hərtərəfli saziş layihəsi üzrə həlledici danışıqlar aparılıb. Konstruktiv ruhda keçən müzakirələrin mühüm nəticəsi olaraq, 2026-2030-cu illəri əhatə edən Avropa İttifaqı-Azərbaycan Tərəfdaşlıq Prioritetləri sənədinin layihəsi ilkin olaraq razılaşdırılıb.
Yeni hərtərəfli saziş üzrə aparılan danışıqlar çərçivəsində Azərbaycan Respublikasının aidiyyəti dövlət qurumlarının nümayəndələri Avropa İttifaqından olan həmkarları ilə birlikdə saziş layihəsinin müxtəlif bölmələri üzrə məhsuldar müzakirələr aparıblar. Bir sıra istiqamətlərdə irəliləyişlər əldə edilib və danışıqların növbəti mərhələləri ilə bağlı planlar müəyyən edilib.
Görüşün yekununda tərəflər yeni ikitərəfli saziş layihəsi üzrə danışıqların həm onlayn, həm də fiziki görüşlər formatında intensiv şəkildə davam etdirilməsi barədə tam razılığa gəliblər.
Səmimi və şəffaf fəaliyyət
Rəsmi Bakının beynəlxalq arenada nümayiş etdirdiyi etibarlı tərəfdaş imici və qətiyyətli mövqeyi Brüsseli regiondakı köhnəlmiş stereotiplərdən əl çəkməyə və yeni reallıqları qəbul etməyə vadar edir.
Azərbaycan hər zaman tərəfdaşlıq münasibətlərində səmimi və şəffaf fəaliyyət prinsiplərinə sadiq qalsa da, bunu da demək lazımdır ki, ötən illər ərzində Avropa İttifaqı daxilindəki müəyyən dairələrin ölkəmizin uğurlarına qarşı qeyri-konstruktiv və ikili-standartlı mövqe tutduğunun şahidi olmuşuq. Xüsusilə Azərbaycanın öz ərazi bütövlüyünü və suverenliyini tam təmin etməsindən sonra Ermənistanla münasibətlərin normallaşdırılması prosesində Aİ-nin bəzi addımları regional sülhə töhfə vermək məqsədindən uzaq olub.
Bu qəbuledilməz fəaliyyətin ən bariz nümunəsi Ermənistan-Azərbaycan sərhədinin Ermənistan tərəfində yerləşdirilən Aİ-nin müşahidəçi missiyasıdır. Adı "mülki" olsa da, mahiyyətcə kəşfiyyat alətinə çevrilən bu qrup "binokl diplomatiyası" həyata keçirərək regionda gərginlik yaratmaqdan başqa işə yaramır.
O da reallıqdır ki, Brüsselin bu cür qərəzli və tarazlığı pozan addımları ikitərəfli münasibətlərə kölgə salsa da, Bakının iradəsinə və qətiyyətinə heç zaman təsir edə bilməyib.
Qərb tərəfindən tətbiq edilən bütün siyasi təzyiqlərə və qeyri-obyektiv yanaşmalara rəğmən, Azərbaycan öz milli maraqlarını qətiyyətlə qoruyub. Rəsmi Bakı heç bir kənar təsirə boyun əyməyərək, Cənubi Qafqazda əsas güc olduğunu və beynəlxalq ədalətə əsaslanan siyasət yürütdüyünü həyata keçirdiyi əməli addımlarla sübut edir.
Etibarlı tərəfdaş
Zaman keçdikcə dərinləşən qlobal siyasi-iqtisadi böhranlar və xüsusilə Qərbin iqtisadi təhlükəsizlik qayğıları Avropa İttifaqını yürütdüyü yanlış siyasətdən əl çəkməyə məcbur etdi. Brüssel anladı ki, regionun əsas logistik və enerji ünvanı məhz Azərbaycandır.
Bu gün Azərbaycan regional və qlobal səviyyədə etibarlı enerji tərəfdaşı kimi çıxış edir. Ölkəmizin ən böyük üstünlüklərindən biri odur ki, heç vaxt öz zəngin enerji resurslarından digər dövlətlərə qarşı siyasi təzyiq vasitəsi kimi istifadə etməyib. Hazırda Azərbaycan qazını idxal edən 16 ölkədən 10-nun məhz Avropa İttifaqının üzvü olması bu reallığın daha bir təsdiqidir.
Eyni zamanda beynəlxalq nəqliyyat dəhlizlərinin kəsişməsində yerləşən Azərbaycan Avropa ilə Asiyanı birləşdirən Orta dəhlizin aparıcı qüvvəsidir. Yüklərin sürətli və təhlükəsiz daşınması, həmçinin logistik şaxələndirmə baxımından Aİ-nin Azərbaycana olan ehtiyacı qaçılmazdır.
Bu reallıq mayın 5-də Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallasın Bakıya səfəri zamanı da etiraf olundu. Kaya Kallas Prezident İlham Əliyevlə görüşündə Azərbaycanın Avropanın enerji təhlükəsizliyindəki rolunu yüksək qiymətləndirərək, münasibətləri yeni səviyyəyə qaldırmaqda maraqlı olduqlarını bəyan etdi.
Sözügedən görüşdə Prezident İlham Əliyev ölkəmizlə Avropa İttifaqı arasında enerji, bağlantılar, təhlükəsizlik, ticarət və digər sahələrdə əməkdaşlığın perspektivlərinə toxundu. Dövlətimizin başçısı Avropa İttifaqının Azərbaycanın əsas ticarət tərəfdaşlarından biri, eyni zamanda ölkəmizin enerji təhlükəsizliyinin təmin olunması baxımından həmişə Avropa İttifaqının etibarlı tərəfdaşı olduğunu vurğuladı.
O da vurğulandı ki, hazırda Azərbaycanla Avropa İttifaqının gündəliyində rəqəmsal transformasiya, süni intellekt, bərpaolunan enerji və digər sahələrdə əməkdaşlıqla bağlı məsələlər var.
Aİ-nin Xarici siyasət və təhlükəsizlik məsələləri üzrə ali nümayəndəsi Kaya Kallasın, eləcə də bu ilin 11 mart tarixində Aİ Şurasının prezidenti Antonio Koştanın ölkəmizə səfərləri Brüsselin Bakı ilə münasibətlərə yüksək qiymətinin göstəricisidir.
Prezident İlham Əliyevlə Aİ Şurasının prezidenti Antonio Koştanın mətbuata birgə bəyanatında Azərbaycan-Avropa İttifaqı tərəfdaşlığının strateji əhəmiyyəti vurğulanaraq, təhlükəsizlik, enerji və nəqliyyat sahələri də daxil olmaqla, son dövrdə keçirilmiş yüksəksəviyyəli görüşlərin müsbət dinamikasına əsaslanaraq siyasi dialoqun və praktiki əməkdaşlığın daha da dərinləşdirilməsinə sadiqlik ifadə olunub.
Liderlər uzunmüddətli vacib enerji tərəfdaşlığını xatırladaraq, Avropanın enerji təchizatının şaxələndirilməsində etibarlı tərəfdaş kimi Azərbaycanın rolunu xüsusi qeyd ediblər.
Göründüyü kimi, Azərbaycan dövlətinin milli maraqlara əsaslanan mövqeyi və qətiyyətli iradəsi Aİ-ni birtərəfli yanaşmalardan uzaqlaşaraq qarşılıqlı faydalı əməkdaşlıq müstəvisinə keçməyə sövq edib. İyunun ilk günlərində Bakıda 2026-2030-cu illəri əhatə edən Avropa İttifaqı-Azərbaycan Tərəfdaşlıq Prioritetləri sənədinin layihəsinin ilkin olaraq razılaşdırılması da bunu sübut edir.
Bütün bunlar onu da təsdiqləyir ki, qarşılıqlı etimada əsaslanan yeni münasibətlər həm Bakının, həm də Brüsselin ortaq regional maraqlarına xidmət edən yeganə düzgün yoldur.
Yasəmən MUSAYEVA,
"Azərbaycan"
