"Son dövrlərdə Avropa Parlamentinin ölkəmizə qarşı qəbul etdiyi qətnamələr Azərbaycan ictimaiyyətində ciddi narahatlıq doğurur. Bu qətnamələr ölkəmizin müstəqil siyasətinə və daxili işlərinə müdaxilə kimi qiymətləndirilir və Azərbaycan hökumətinin həyata keçirdiyi islahatları təhrif edir".
Bu sözləri "Azərbaycan" qəzetinə Milli Məclisin deputatı Kamran Bayramov deyib. O bildirib ki, martın 13-də Avropa Parlamentinin qəbul etdiyi qətnamə Azərbaycanın beynəlxalq hüquq və suverenlik prinsiplərinə qarşı haqsız bir addımdır. Azərbaycan Respublikası Milli Məclisinin Beynəlxalq münasibətlər və parlamentlərarası əlaqələr komitəsi bu qətnaməni qəti şəkildə rədd edərək Avropa Parlamentinə etiraz məktubu göndərib. Komitə qətnamənin əsassız və qeyri-obyektiv olduğunu vurğulayaraq AP-nin Azərbaycanın müstəqil siyasətini və beynəlxalq mövqeyini hədəf aldığını qeyd edib. "Milli Məclis belə qətnamələrin Azərbaycanla Avropa Parlamentinin münasibətlərinə mənfi təsir göstərəcəyini və ikitərəfli əməkdaşlığına zərər verəcəyini bildirərək, AP-ni obyektiv və ədalətli yanaşmaya çağırıb. Hazırda məhkəmə qarşısına çıxarılan şəxslər hərbi əsirlər deyil, Azərbaycan qanunvericiliyini pozmuş, ədalətli və şəffaf məhkəmə prosesi çərçivəsində məsuliyyətə cəlb edilmiş təqsirləndirilən şəxslərdir. Bütün tərəflər belə bir reallığı qəbul etməlidirlər ki, Azərbaycan öz xalqını və ərazisini qanunsuz işğaldan və silahlı separatizmdən qorumaq kimi suveren hüququnu həyata keçirir. Beləliklə, Avropa Parlamentinin qətnaməsi sülhü və ya ədaləti deyil, düşmənçiliyi qızışdırmaq və birtərəfli siyasi gündəliyi təşviq etmək cəhdidir", - deyə siyasətçi əlavə edib.
Onun sözlərinə görə, qətnamədə əks olunan bəzi məsələləri qurumun anti-Azərbaycan ritorikasının pik həddi hesab etmək olar. Burada yenə də erməni sevgisi, azərbaycanofobiya və riyakarlıq açıq-aydın hiss olunur. Xatırladaq ki, Bakıda məhkəməsi keçirilən şəxslər çoxsaylı cinayətlər törətməkdə təqsirləndirilirlər. Aydındır ki, qatı ermənipərəst mövqeyi ilə seçilən Avropa Parlamentinin üzvləri üçün bir "həqiqət" var ki, o da qərəz və ikili yanaşmadır. Dəfələrlə bunun şahidi olmuşuq. Məhkəməyə təzyiq yolunu seçən Avropa Parlamentinin üzvləri hər vəchlə çalışırlar ki, təqsirləndirilən şəxslər qərardad çıxarılmadan azad olunsunlar. Demək olar ki, dünya məhkəmə tarixində belə hal baş verməyib.
K.Bayramov qeyd edib ki, Avropa parlamentariləri tərəfindən barələrində konkret ittihamlar olan şəxslərin hərbi əsir kimi qələmə verilməsi hiddət doğurur: "Halbuki həmin şəxslər konkret cinayət əməllərinə görə məhkəmə qərarları əsasında saxlanılıblar. Bu şəxslərin "hərbi əsir" kimi qələmə verilməsi həm cinayət-prosessual qanunvericiliyin tələblərinə, həm də beynəlxalq hüququn prinsiplərinə tamamilə ziddir".
Deputat diqqətə çatdırıb ki, Milli Məclisin sözügedən komitəsi avropalı parlamentariləri yenidən düşünməyə, revanşist qüvvələri dəstəkləməməyə və qarşılıqlı hörmət və anlaşmaya əsaslanan konstruktiv dialoqa çağırır: "Avropa Parlamentini sülhə və barışığa qarşı yönələn siyasi motivli hərəkətlərə yol verməkdənsə, ədalət və suverenlik prinsiplərinə hörmət bəsləməyə çağırırıq. Yalnız haqq-ədalət və qarşılıqlı anlaşma sayəsində Cənubi Qafqazda həqiqi sabitlik əldə edilə bilər".
Əsmər QARDAŞXANOVA,
"Azərbaycan"
jpg_1766048684.jpg)
