İsraillə iqtisadi əməkdaşlığın inkişafı müzakirə olunub

İqtisadiyyat naziri Mikayıl Cabbarovun rəhbərlik etdiyi nümayəndə heyəti İsrailə işgüzar səfər edib.

Nazirlikdən AZƏRTAC-a bildirilib ki, səfər çərçivəsində Azərbaycan-İsrail iqtisadi əməkdaşlığının inkişafına dair bir sıra görüşlər keçirilib, müzakirələr aparılıb.

İsrail Dövlətinin Prezidenti İsxak Hersoq Azərbaycanın iqtisadiyyat naziri Mikayıl Cabbarovu qəbul edib. Qəbul zamanı Azərbaycan və İsrail xalqları arasında tarixi və mədəni əlaqələr vurğulanıb, dövlət başçılarının təşəbbüsləri sayəsində münasibətlərin strateji müttəfiqlik səviyyəsində olduğu diqqətə çatdırılıb. Tərəflər qarşılıqlı əlaqələrin istiqamətləri və iqtisadi əməkdaşlıq məsələlərini nəzərdən keçiriblər. Həmçinin ölkəmizin Mərkəzi Asiyaya çıxış nöqtəsi kimi dəyərləndirilməsi, ikitərəfli və çoxtərəfli formatlarda əlaqələrin inkişafı perspektivləri haqqında fikir mübadiləsi aparılıb.

İsrailin energetika və infrastruktur naziri Eli Kohenlə görüşdə enerji sahəsində səmərəli qarşılıqlı münasibətlərin qurulduğu, bu istiqamətdə işbirliyinin gücləndirilməsi məqsədilə işlərin davam etdirildiyi qeyd edilib, iqtisadi tərəfdaşlığın inkişafı imkanları diqqətə çatdırılıb. Azərbaycanın İsrailin enerji təhlükəsizliyində rolu, bu ölkənin qaz yataqlarının istismarında SOCAR-ın təcrübəsindən istifadənin önəmi qeyd olunub. Görüş zamanı iqtisadi sferada əhəmiyyətli təşəbbüs və layihələr, enerji gündəliyinin prioritet istiqamətləri dəyərləndirilib.

İsrailə səfər çərçivəsində bu ölkənin Eksklüziv İqtisadi Zonasında (EEZ) “I” blokunda kəşfiyyat üçün lisenziyaların təqdim edilməsi mərasimi keçirilib. Tədbirdə iqtisadiyyat naziri Mikayıl Cabbarov, SOCAR-ın prezidenti Rövşən Nəcəf, İsrailin enerji və infrastruktur naziri Eli Koen və digər rəsmi şəxslər iştirak ediblər. Bu, SOCAR-ın Azərbaycandan kənarda ilk kəşfiyyat layihəsidir. Lisenziyalar SOCAR-ın beynəlxalq mövqeyinin möhkəmlənməsi və innovativ təcrübələrdən yararlanması baxımından strateji üstünlüklərə malikdir.

İsrailin iqtisadiyyat və sənaye naziri Nir Barkatla görüşdə ölkələrimizin iqtisadi işbirliyinin genişləndiyi vurğulanıb. Azərbaycanda əlverişli biznes və investisiya mühiti haqqında məlumat verilib. Ölkələrimizin investisiya işbirliyinin prioritetləri, sənaye zonaları çərçivəsində tərəfdaşlıq, biznes nümayəndələrinin işgüzar əlaqələri, rəqəmsal inkişaf üzrə təcrübə mübadiləsi və s. məsələlər nəzərdən keçirilib.

Səfərdə, həmçinin SOCAR və “Union Energy” şirkəti tərəfindən Eksklüziv İqtisadi Zonasında birgə kəşfiyyat işlərinin aparılması üzrə Anlaşma Memorandumu imzalanıb. Sənədi SOCAR-ın prezidenti Rövşən Nəcəf və “Union Energy” şirkətinin icraçı direktoru Oded Nagar imzalayıblar. Vurğulanıb ki, sənədin icrası tərəflərin beynəlxalq əməkdaşlıq şəbəkəsinin genişləndirilməsinə və yeni enerji ehtiyatlarına çıxışına təkan verəcək.

İsrailin xarici işlər naziri Gideon Saar ilə görüşdə İsraillə strateji müttəfiqlik, ikitərəfli münasibətlərin müxtəlif aspektləri, iqtisadi-ticarət əlaqələrinin perspektivləri haqqında fikir mübadiləsi aparılıb.

İsrailin Maliyyə Nazirliyində nazir, Azərbaycan Respublikası Hökuməti ilə İsrail Dövləti Hökuməti arasında Birgə Komissiyanın həmsədri Zeev Elkinlə görüşdə əməkdaşlığın müxtəlif istiqamətlər üzrə inkişaf etdiyi bildirilib. Tərəflər qarşılıqlı biznes və ticarət əlaqələrinin dəstəklənməsi barədə fikirlərini bölüşüb, Hökumətlərarası Komissiyanın fəaliyyətində səmərəliliyin artırılması istiqamətində müzakirə aparıblar.