Ağ Evdən növbəti qərar

"Amerikanın səsi" və "Azadlıq radiosu"nun maliyyəsi kəsildi

 Prezident Donald Trampın Amerika Birləşmiş Ştatlarının Qlobal Media Agentliyinin (USAGM) ləğv edilməsi haqqında sərəncamından sonra bu hökumət təşkilatına daxil olan "Amerikanın səsi" və "Azad Avropa/Azadlıq Radiosu" fəaliyyətini dayandırıb.

Şirkətin baş direktoru Maykl Abramovitzin sözlərinə görə, "Amerikanın səsi"nin 1300-dən çox əməkdaşı məzuniyyətə göndərilib.

İşçilər üçün bu qərar gözlənilməz olub. Radiostansiyanın əməkdaşlarından biri sosial şəbəkədə yazıb: "Biz bu səhər Trampın əmrindən xəbər tutduq və demək olar ki, dərhal e-poçt bildirişləri aldıq ki, növbəti bildirişə qədər işçilər məzuniyyətə göndərilir. Bizə hətta şəxsi əşyaları götürmək üçün ofisə getməyimiz qadağan edilib, biletlərimiz ləğv edilib, iş yazışmalarına və çatlara giriş bağlanıb".

Ağ Evin internet saytında dərc edilən bəyanatda "Amerikanın səsi" "radikal təbliğatda" və "anti-Tramp məzmunu" yaymaqda günahlandırılıb. Trampın USAGM üzrə müşaviri təyin edilən K.Leyk da agentliyin fəaliyyətini kəskin tənqid edib: "Həqiqətdən güclü heç nə yoxdur. Xəbər təşkilatları bu səlahiyyətdən təbliğat aparmaq, ideologiyaları aşılamaq və Amerika maraqlarına zidd hərəkət etmək üçün sui-istifadə edirlər. İctimaiyyətin mediaya inamı sarsılıb. Bizim vəzifəmiz bu inamı bərpa etməkdir". 

Qeyd olunur ki, "Amerikanın səsi" həftəlik 48 dildə 360 milyondan çox dinləyiciyə və tamaşaçıya çatır. Radiostansiya 1942-ci ildə nasist Almaniyasının təbliğatına qarşı çıxmaq üçün yaradılmışdır. "Azadlıq radiosu" 1950-ci ildən fəaliyyət göstərir, Şərqi Avropanın kommunist ölkələrində, 1953-cü ildən isə keçmiş SSRİ-də yayımlanmağa başlayıb.

İllik büdcəsi 950 milyon dollar olan USAGM "Azadlıq radiosu"nu da maliyyələşdirib.

 Əslində, soyuq müharibənin bu alətləri 1992-ci il yanvarın 1-də SSRİ-nin dağılmasından, Rusiyada və ittifaq respublikalarında kapitalist inqilabının qələbəsindən sonra bağlanmalı idi.

Nəticə gözlənildiyi kimi kədərlidir. Aydın inkişaf məqsədləri və rəqabət olmadan hər iki radiostansiya onilliklər ərzində dəyişməmiş aparıcıların şəxsi təbliğat və təşviqat "sahələrinə" çevrilib. "Səslərin" rəsmi missiyası Amerika dəyərlərini bütün dünyaya yaymaqdır. Bununla belə, Amerikanın özündə demokratik hökumətdən miras qalan solçu dəyərlər sistemi ilə Tramp və onun tərəfdaşlarının ifrat sağçı dəyərləri arasında şiddətli ideoloji mübarizə gedir.

Ağ Ev "Amerikanın səsi"nə qarşı aşağıdakı iddialarla çıxış edib:

- agentliyin rəhbərliyi "çox vaxt solçu qərəzliyi əks etdirən təkəbbürlü, yaramaz bir təşkilata çevrilib". O, "jurnalist standartlarının pozulmasına və yanlış idarəetməyə" yol verir;

- "Amerikanın səsi"nin əməkdaşlarına "bəyanatlardan sitat gətirmək istisna olmaqla", HƏMAS və onun üzvlərini terrorçu adlandırmamaq əmri verilib;

- "Amerikanın səsi"nin bir çox müxbirləri qərəzsizliyi unudaraq, dəfələrlə Tramp əleyhinə şərhlər dərc ediblər;

- "Amerikanın səsi" Hanter Bayden notbuk hekayəsində "Rusiyanın Trampın xeyrinə qalmaqalın yaranmasında rol oynadığına dair iddiaları" dəstəkləyib və "Baydenlə birlikdə oyun qurub";

- "Amerikanın səsi" sığınacaq istəyən transgender əcnəbilərin ABŞ-yə miqrasiyasını dəstəkləyib və s.

Qeyd edək ki, fəaliyyəti boyu qarayaxma və feyk xəbərlər yaymaqla məşğul olan, informasiya təbliğatını erməni maraqlarına uyğun aparan bu radiolar bütün zamanlarda Azərbaycanın əleyhinə işləyblər və xeyrimizə heç nə yaymayıblar. Azərbaycanda keçirilən istənilən seçki kampaniyası, beynəlxalq toplantı, yarış, forumlardan öncə çirkin kampniyalar həyata keçirib erməni maraqlarına xidmət ediblər.  

Xatırladaq ki, amerikalı milyarder İlon Mask  hələ ötən ayın əvvəlində "Azadlıq" və "Amerikanın səsi" radiolarını bağlamağa çağırıb və bildirib: "Artıq heç kim onlara qulaq asmır. Bunlar sadəcə olaraq hər il ABŞ vergi ödəyicilərinin 1 milyard dollar pulunu yeyərək öz-özünə danışan çılğın radikal solçulardır". 

Gözlənildiyi kimi, psevdodemokratlar və feyk yayanlar üçün nəticə kədərli oldu... 

Rizvan CƏFƏROV,

"Azərbaycan"