Naxçıvan Muxtar Respublikası Dövlət Energetika Xidməti COP29 tədbirləri çərçivəsində və Naxçıvanın "yaşıl enerji" zonası elan olunması ilə əlaqədar "yaşıl enerji" təşəbbüslərini təbliğ etmək, bu sahədə görülən işləri ictimaiyyətə çatdırmaq məqsədilə media nümayəndələri üçün mediatur təşkil edib. 

 Mediatur çərçivəsində muxtar respublikada qurulan və istismar olunan müxtəlif alternativ və bərpaolunan enerji stansiyalarına səfər olub.

Xidmətin rəis müavini, rəis vəzifələrini müvəqqəti icra edən Məhərrəm Abbasov media təmsilçiləri qarşısında çıxış edərək Naxçıvanın "yaşıl enerji" potensialından söz açıb. Rəis müavininin sözlərinə görə, bu gün Naxçıvandakı stansiyaların generasiya gücü 244.8 MVt-dır. Amma yaxın illərdə 1500 MVt güc əlavə olunaraq enerji istehsalının 5 dəfə artırılması planlaşdırılır.

 O, dövlət proqramına əsasən "yaşıl enerji" istehsalı üçün 7992 ha ərazi ayrıldığını qeyd edib: "Artıq investisiya prosesi başlayıb. Yerli və xarici şirkətlərlə memorandum imzalanıb. İlkin mərhələdə gücü 30 meqavat olan yeni günəş-elektrik stansiyası tikiləcək. Artıq bu stansiyasının tikilməsi üçün 688 hektar ərazi də ayrılıb". 

Daha sonra media nümayəndələri Culfa Külək-Elektrik və Külək-Günəş Hibrid-elektrik stansiyalarına səfər ediblər. Stansiyaların sahə müdiri Ayaz Hüseynov qeyd edib ki, Culfada 3.3 hektar sahədə yerləşən və gücü 1.1 Mvt olan külək günəş-elektrik stansiyası yaradılıb. Stansiyada gücü 280 Vatt olan 3520 ədəd günəş panelləri və 20 ədəd gücü 50 kvt olan invertorlar quraşdırılıb. Həmçinin 12 ədəd gücü 10 Kvt olan külək turbini və 12 ədəd invertor quraşdırılıb. Hibrid-elektrik stansiyası ötən il 1 milyon 600 min Kvt/saat enerji istehsal edib.

Ərazidə, eyni zamanda ümumi gücü 0.3 Mvt  olan külək-elektrik stansiyası da yerləşir. Stansiyada 10 ədəd gücü 30 Kvt olan külək turbini və 30 Kvt gücündə olan invertor quraşdırılıb. Bu stansiya ANE şirkəti və yerli mütəxəssislər tərəfindən ərsəyə gətirilib.

Jurnalistlər daha sonra Araz Su-Elektrik Stansiyası ilə tanış olublar. Məlumat verilib ki, stansiya Ulu Öndər Heydər Əliyevin təşəbbüsü ilə tikilib istismara verilib. Stansiyanın ümumi generasiya gücü 22 meqavatdır. Araz dəryaçasının nominal su tutumu 1 milyard 250 milyon kubmetrdir, xüsusi hallarda qısa müddətdə 1 milyard 320 milyon kubmetrə qədər su yığıla bilər. 

Əsmər QARDAŞXANOVA,

"Azərbaycan"